Onlayn ictimai-siyasi qəzet
Sülhməramlılar, yoxsa separatçıların döyüş yoldaşları? – Rusiya 2025-ə hazırlaşır, bəs biz?
Artıq buna zərrəcə şəkk-şübhə yox ki, Rusiya Qarabağda nəinki mülki ermənilərin, həm də çoxminlik silahlı quldurun qalmasında maraqlıdır. Çünki Moskva bunsuz ərazimizdə özünün uzunmüddətli hərbi mövcudluğunu təmin edə bilməyəcəyinin fərqindədir. O üzdən ruslar üç ildir silahlı-silahsız ermənilərin üstündə əsir.
Eyni səbəbdən 10 noyabr kapitulyasiya sənədinin 4-cü bəndinə çoxdan tüpürmüş bədməramlı kontingentin axır vaxtlar quldur-banditlərlə faktiki “ət-dırnaq” olması əsla təsadüfi deyil. Azərbaycan Müdafiə Nazirliyinin yaydığı məlumata görə isə son günlər “sülhməramlılar”ın Qarabağda separatçıların hərbi yüklərini müşayiət eləməsi intensivləşib. Bu himayəyə arxayın olan separatçı-kriminal ünsürlər də nəinki döyüş mövqelərini möhkəmləndirməyə, eyni zamanda yeni istehkamlar yaratmağa çalışırlar. Nazirliyinin yaydığı kadrlardan həmçinin görünür ki, separatçıların mövqelərinə təchizatların çatdırılmasını müşayiət edən Rusiya “sülhməramlıları” qanunsuz erməni silahlı birləşmələrinin üzvləri ilə az qala, döyüş yoldaşları kimi, yəni legitim hərbçilər kimi danışırlar.
Qısası, müvəqqəti nəzarətimizdən kənarda qalan torpaqlarımızda “sülhməramlı”-separatçı dostluğu və ittifaqı günbəgün möhkəmlənir. Yeri gəlmişkən, oyuncaq rejimin “bayraq” adlandırdığı əski parçası hərbi kontingentin Xocalıdakı qərargahı önündə, Rusiya bayrağı ilə yan-yana boşuna asılmayıb ki...
Aydındır ki, Moskva bir ovuc dığanı qara qaş-gözünə görə bizdən qorumur. Kremlin təbii ki, bölgədə öz maraqları var və bu maraqlara naminə o, şeytanla da işbirliyinə gedər. Necə ki, gedir - iblis erməni ilə “çaşka-lojka”dır, Azərbaycana qarşı ən “etibarlı” vasitə qismində yenə əsasən “erməni kartı”ndan istifadə edir.
Rusiyalı politoloq-türkoloq Viktor Nadeyin-Rayevski erməni saytlarından birinə müsahibəsində bu xüsusda deyib ki, Moskva üçün Qarabağın itirilməsi Qafqazın itirilməsi deməkdir ki, bu da ondan ötrü qəbuledilmızdir. Rusiyanın Qarabağa, Azərbaycana, ərazi bütövlüyümüz və suverenliyimizə münasibəti bax, bu bircə cümlədə dəqiq əksini tapıb. Çünki Nadeyin-Rayevski öz ağzı ilə danışmır. Onu danışdıranlar var...
İşə bax, sanki Qarabağ rusun dədə-baba torpağıdır, bunlara I Pytordan da əvvəl, İvan Qroznı dönəmindən qalıb. Halbuki Qarabağ – sahibini işarə edən adı üstündə! Siz kimsiniz torpağımızın taleyi ilə bağlı hökm verirsiniz?
Hər şey qırağa, götürüb 22 fevral (2022) Moskva Bəyannaməsini soxasan bu üzdəniraq türkoloqun gözünə, amma o biri yandan baxıb görəndə ki, söhbət Ukraynaya təcavüz edən, beynəlxalq hüquq hərləməyən, atdığı imzaya tüpürən bir dövlətdən gedir, qalırsan belə...
Təkrar edirik, bu təkcə hansısa rusiyalı ekspertin baxışı, mövqeyi deyil, Kreml kabinetlərində hökm sürən ovqatın təzahürüdür. Rəsmi Moskva böyük ehtimalla, məhz belə şəxslərin dilindən Bakıya mesaj göndərir ki, 2025-ci ildə rus bədməramlı qüvvələri Qarabağdan çıxarmaq heç də asan olmayacaq!
Yəni ki, Moskva separatçı ünsürlərin əli ilə ən müxtəlif hoqqalardan, oyunlardan çıxacaq, “Rus icması” layihəsi, hətta Donbas, Abxaziya ssenarilərini işə salmağa çalışacaq. Nadeyin-Rayevski əslində bunun anonsunu verir bizə.
Bu, prezidentinin imzası qara qəpiyə dəyməyən, götürdüyü yazılı öhdəliyi imza atdığı kağızın dəyəri qədər də olmayan, o səbəbə heç bir dostu-zadı olmayan təhlükəli, yırtıcı bir dövlət. Odur ki, hazır olmalıyıq. İşimizi möhkəm tutaq, indidən kontur-tədbirlər haqda düşünək.
Moskvanın bütün mümkün gedişlərinə qarşı əks-gedişlərimiz, “A”, “B”, “C” variantlarımız olmalıdır. Sözsüz ki, qardaş Türkiyə ilə birgə, onunla tandemdə...
Zahid SƏFƏROĞLU
Zahid SƏFƏROĞLU 
YAZARIN DİGƏR YAZILARI
20 Noyabr 2024
19 Noyabr 2024
15 Noyabr 2024
13 Noyabr 2024
11 Noyabr 2024
06 Noyabr 2024
29 Oktyabr 2024
23 Oktyabr 2024
21 Oktyabr 2024
16 Oktyabr 2024
14 Oktyabr 2024
09 Oktyabr 2024
04 Oktyabr 2024
26 Sentyabr 2024
25 Sentyabr 2024
19 Sentyabr 2024
13 Sentyabr 2024
09 Sentyabr 2024
30 Avqust 2024
05 Avqust 2024
30 Iyul 2024
19 Iyul 2024
26 Iyun 2024
22 Iyun 2024
19 Iyun 2024
12 Iyun 2024
11 Iyun 2024
03 Iyun 2024
01 Iyun 2024
29 May 2024
ŞƏRHLƏRŞƏRH YAZ