Onlayn ictimai-siyasi qəzet
Tiflisə də “İsgəndər” atsaydılar-Zelenskinin sitəmi
Bu adam ölkəsini dünyanın yardımına möhtac edib, maaşları və pensiyaları belə xarici fondlar ödəyir, o isə avropalı müttəfiqləri ilə məsləhətləşib Gürcüstanı sanksiya tətbiq etməklə hədələyir...
Nə qədər dili ayarsız biri olasan ki, hər gün düşmən dediyin ordu kəndləri, qəsəbələri əlinə keçirərkən, ölkənin üzərində paramparça edilmək kimi planlar qurularkən, sən xalqına gecə müraciətində Gürcüstan hakimiyyətinin qeybətini edəsən. Zelenski bildirib ki, Gürcüstanda mövcud hakimiyyət ölkəni Rusiyadan asılı vəziyyətə salmağa çalışır: “Bu, yalnız Gürcüstan xalqının deyil, həm də bütün regionun problemidir.
Gürcüstan hakimiyyəti hazırda öz xalqına qarşı utancverici addımlar atır. Moskvanın Gürcüstan hakimiyyətini tərifləməsi isə onların kimin üçün çalışdığını açıq şəkildə göstərir. Onlar Gürcüstan üçün deyil, başqa qüvvələr üçün çalışırlar və bu məqsədlə etirazları yatırırlar.” Zelenski deyib ki, Ukrayna bu məsələdə hüquqi reaksiya hazırlayır və Avropa ölkələri ilə birgə konkret tədbirlər üzərində işləyir. “Mən artıq müvafiq sanksiya qərarlarının hazırlanması barədə göstəriş vermişəm” deyə, Zelenski vurğulayıb.
Zelenskinin xalqa müraciətlərinin çoxdan reallıqla əlaqəsi yoxdur ki, bunun da bir səbəbi var: Ukraynada söz sahibi Zelenski deyil. Onun bircə dəfə belə tarixi qərar vermək şansı oldu- müharibəyə ölkəsini sürükləməyə bilərdi, tarixdə bu cür mənfi işarələrlə qalmazdı. İndi də nə vaxt desələr müharibəni bitir, bitirəcək.
Gürcüstanda baş verənlər Zelenskinin ona görə xoşuna gəlmir ki, “Gürcü Arzusu” ölkəni yenidən Qərbin yalan-palan vədlərlə dolu “Avromeydan”a çevirməyə imkan vermir, onun kuratorlarının planlarını pozur. Ukraynanın prezidentlik müddəti bitmiş lideri öz ölkəsinin dərdini çəkmək əvəzinə, Gürcüstan hakimiyyətinə sitəm etməsi həm də başadüşüləndir. Ölkəsini Qərbin qorxunc planlarından qorumaq istəyənlər üçün Ukrayna ən pis nümunədir. Son günlər “Gürcü Arzusu” bu konteksdə Ukraynanın adını tez- tez xatırladırlar.
Zelenski konsert zallarında Putini öz replikaları ilə güldürəndə Saakavşili kimisi Qərbin ağlına uyub bütün ölkəni az qala Rusiyanın işğalına sürükləmişdi. Saakaşvili indi həbsdədir, Zelenski bu savaşda daha şərəfli sonluq nəsib olmasa, Qərb onu da kimlərinsə əli ilə həbsə atdıra bilər. Bu adam ölkəsini dünyanın yardımına möhtac edib, maaşları və pensiyaları xarici fondlar ödəyir, o isə avropalı müttəfiqləri ilə məsləhətləşib Gürcüstanı sanksiya tətbiq etməklə hədələyir.
Ukrayna Gürcüstan münasibətləri müharibə başlayandan sonra pisləşib. Tiflis Rusiyaya qarşı sanksiyalara qoşulmadı, amma Ukraynanın ərazi bütövlüyünə dəstəyini daima ifadə edib. Dostunu, düşmənini seçmək hər bir dövlətin öz seçimidir. Ukrayna hakimiyyəti və Qərb emissarları isə istəyirdi ki, Gürcüstan zatən heç bir diplomatik münasibətləri olmayan Rusiyaya qarşı ikinci cəbhə açsın, günlərin birində bir “İsgəndər” də Tiflisə atılsın. Tiflis buna getmədi, Qərbin planlarını pozdu.
Rusiya pisdir, işğalçıdır, amma heç bir ölkənin Ukraynanın, Brüsselin və ya Vaşinqtonun istəyi ilə Moskvaya savaş açmaq kim öhdəliyi də yoxdur. Ukrayna Rusiya ilə “qaz vurub qazan doldurmağı” hələ dekabrın sonunda dayandıracaq, amma Tiflisi də, elə Bakını da Rusiya ilə işbirliyində suçlayırlar. Zelenskinin bəyanatında bizə də toxundurmaq istədiyi var, bunun üzərinə çox getməyək...
Qərb Gürcüstanda çeviriliş cəhdinin alınmadığının fərqindədir. Bu cür aksiyalar məsələn, bu gecə sakitliyi pozulan Fransada ən azı ayda bir dəfə olur, yəni Gürcüstan hakimiyyətinin bu aksiyalara əvvəldən hazırlığı var. Ona görə etirazçılara 2014-cü ildə Kiyevin baş meydanında olduğu kimi silah paylamasalar, dinc etirazlar davam edə bilər. Gənclərin xüsusi fəallıq etdiyi “atəşfəşanlıq davası” inqilabi-romantika janrında hələ maraqlı görünür, amma nəticəsizlik tezliklə bu küçə romantikasını da bitirə bilər.
Gürcülər praqmatizmi sevirlər, Avropa İttifaqı Ukrayna savaşına cəlb olunması səbəbindən çətin günlər yaşayır, bu təşkilatda sosial və iqtisadi problemlərlə yanaşı, ciddi fikirayrlıqları var. Fransanın baş naziri də bu gün “düşdü”, davamı da olacaq. Ukrayna bu təşkilatın qapısı arxasında hələ neçə il gözləyəcək, Gürcüstan isə bu yalanla davam etmək zorunda deyil.
Gürcüstan Rusiya ilə münasibətlərinin bərpası üçün “U dönüşü” olmayacaq, amma bu böyük ölkənin bazarları milyardlarla qazanc deməkdir, bu əlaqələrdən gürcü xalqı və dövləti Avropadan daha çox qazana bilər. Avropa İttifaqının fermerləri indi öz malını sata bilmirlər, Rusiya bazarını itiriblər. Gürcüstan ora üzv olub, nə satacaq, nə qazanacaq? Gürcüstan hakimiyyətini Rusiyaya işləmək ittihamı Avropa İttifaqının şantajının davamıdır, Zelenskinin də o anti-Gürcüstan kampaniyasına dəstəyi anlaşılandı.
Rusiyanın düşmənçiliyi bəlli, bəs, Zelenskinin xalqına verib -alamadığı nədir, bunu iki ildir hələ də anlamıram…
Nazim SABİROĞLU,
Musavat.com
Nazim SABİROĞLU 
XƏBƏR LENTİ
05 Aprel 2025
ŞƏRHLƏRŞƏRH YAZ