Onlayn ictimai-siyasi qəzet
“Şlyapa Zahid”in cinayət işindən iş ayrılıb - Xüsusilə külli miqdarda mənimsəmə cinayəti araşdırılır
Bakı Ağır Cinayətlər Məhkəməsində hakim Novruz Kərimovun sədrliyi ilə Müdafiə Nazirliyinin(MN)sabiq işçisi Zahid Niftəliyevin cinayət işi üzrə məhkəmə prosesi davam edir.
Musavat.com xəbər verir ki, Dövlət Təhlükəsizliyi Xidmətində (DTX) başlanmış cinayət işi üzrə 42 milyon manatlıq mənimsəmə müəyyən olunub.
Məhkəmə prosesində şahid Yalçın Ələkbərov ifadə verib. O, bildirib ki, "R.S" şirkətinin ictimaiyyətlə əlaqələr şöbəsində işləyib. Şirkətin rəhbəri əcnəbi olub. Şahid qeyd edib ki, şirkət tenderdə qalib gəlib və hərbi hissədə yataqxananın tikilməsini həyata keçiriblər. Onun sözlərinə görə, şirkətin rəhbəri həm Azərbaycanda, həm də İngiltərədə yaşayıb. Yalçın Ələkbərov bildirib ki, tenderdə işin əvvəlində 440 min manat pul köçürülüb. Müqavilədə göstərilən puldan 2 milyon dollar qalıb və həmin pulun köçürülməsində problemlər yaranıb: "Bununla bağlı məhkəmə çəkişməmiz oldu. Çünki pulu ala bilmirdik. Nəhayət, 4 ildən sonra pulu ala bildik. Həmin pulun məhkəmə qərarı ilə alınması mümkün oldu".
Sualları cavablandıran şahid ibtidai istintaq zamanı verdiyi ifadəsini təsdiqləyib. Daha sonra onun ibtidai istintaq zamanı verdiyi ifadəsinin bir hissəsi elan olunub. Həmin ifadədən məlum olur ki, tikinti işlərinin görülməsi üçün müqavilənin dəyəri 7 milyon dollar olub. İfadədə qeyd olunub ki, Goranda hərbi hissədə yataqxananın tikilməsi və digər təmir işlərinin görülməsi nəzərdə tutulub. Daha sonra Zahid Niftəliyevin vəkili Əli Adıgözəlov vəsatətlə çıxış edib. Vəkil Zahid Niftəliyevin 2015-ci ilin 14 aprel, 15 iyul, 3 dekabr, 2016-ci ilin 25 fevral, 7 mart, 15-24 iyun, 30 iyul, 22, 27 və 29 dekabr tarixlərində telefon danışıqlarının, onun əhatə dairəsinin müəyyən edilməsi üçün mobil operatora sorğu verilməsini istəyib. Hakim bildirib ki, bu məsələyə novbəti iclasda münasibət bildiriləcək. Qeyd edək ki, Zahid Niftəliyev iki il əvvəl rüşvətalma ittihamı ilə həbs edilib, Tərtər Hərbi Məhkəməsi onun əməlini tövsif edərək şərti cəza verib. Azadlığa buraxıldıqdan sonra o, Dövlət Təhlükəsizliyi Xidmətinin (DTX) İstintaq baş idarəsi tərəfindən həbs edilib. İstintaq dövründə Gəncə Apelyasiya Məhkəməsi dövlət ittihamçısının Tərtər Hərbi Məhkəməsinin hökmündən verdiyi protesti təmin edib. Qərara əsasən Zahid Niftəliyev vəzifə saxtakarlığında və külli miqdarda rüşvət almaqda təqsirli bilinərək 8 il 6 ay azadlıqdan məhrum edilib. Hazırda DTX-də istintaqı yekunlaşdırılmış iş üzrə hərbçilər arasında “Şlyapa Zahid” ləqəbi ilə tanınan Zahid Niftəliyev öz adına formal şirkət açaraq "AtaBank" ASC-dən götürülmüş 42 milyon manat krediti ödəməməkdə təqsirləndirilir. İttihama əsasən, Zahid Niftəliyev məqsədyönlü şəkildə həmin məbləğdə kredit almaq məqsədilə “Şahin-CO” adlı şirkət yaradıb, şirkət təsərrüfat və maliyyə vəziyyəti barədə "AtaBank" ASC-yə saxta məlumatlar təqdim etməklə 2016-cı ildə 12 ay müddətinə 42 milyon 470 min 885 manat kredit alaraq, təyinatı üzrə istifadə etməməklə xüsusilə külli miqdarda ziyan vurub. O, götürülmüş kreditin ləğv prosesində olan "AtaBank" ASC-yə ödənilməsi ilə bağlı məhkəmə qətnamələrini qərəzli olaraq icra etməyib. Xüsusilə külli miqdarda mənimsəmə cinayətində iştirakı araşdırılan digər şəxslərlə bağlı DTX-də cinayət işi ayrılıb. Növbəti proses mayın 7-də davam edəcək.
E.MƏMMƏDƏLİYEV,
Musavat.com
XƏBƏR LENTİ
04 Aprel 2025
03 Aprel 2025
ŞƏRHLƏRŞƏRH YAZ