Onlayn ictimai-siyasi qəzet
Səudiyyə Fransadan qırıcı alır?
Səudiyyə Ərəbistanı özünün Hərbi Hava Qüvvələri üçün çoxməqsədli “Rafale” qırıcılarının alınması imkanını Fransa ilə müzakirə edir. Bu barədə TASS-a iki mənbə məlumat verib.
Agentliyin həmsöhbətlərinin sözlərinə görə, Səudiyyə Ərəbistanının müdafiə naziri ilə bu ölkədə rəsmi səfərdə olan Fransa Silahlı Qüvvələrinin naziri arasında keçirilən görüşdə xüsusilə “Dassault Aviation” şirkətinin istehsalı olan “Rafale” qırıcılarının alınması məsələsi müzakirə olunub. Mənbələrdən biri bildirib ki, Səudiyyə Ərəbistanı istehsalçı tərəfindən müəyyən ediləcək potensial razılaşmanın şərtlərindən asılı olaraq 200-ə qədər təyyarə almağı düşünür.
“Uzunmüddətli dövrdə Krallıq 100-dən 200-ə qədər “Rafale” qırıcısı əldə edə bilər ki, bu da hazırda orduda xidmətdə olan “F-15” və “Eurofighter Typhoon”ların sayı ilə təqribən müqayisə olunur”, - mənbə bildirib. Eyni zamanda agentliyin həmsöhbəti qeyd edib ki, Səudiyyə Ərəbistanı ilə Fransa arasında danışıqlar ilkin mərhələdədir, ona görə də hazırda tərəflər “hətta ilkin razılığa” da nail olmayıblar.
Başqa bir mənbə bildirib ki, 2006-cı ildə "Rafale" döyüş təyyarələri almağı düşünən, lakin “F-15”i seçən Səudiyyə Ərəbistanı indi silah idxalı mənbələrini diversifikasiya etməyə çalışır. “Krallığın hakimiyyət orqanları heç bir ölkədən asılı olmamaq üçün silah idxalçıları ilə qarşılıqlı əlaqəyə yanaşmalarını tədricən yenidən nəzərdən keçirirlər”, - mənbə vurğulayıb. Onun fikrincə, Səudiyyə Ərəbistanının “Rafale” qırıcı təyyarələrinə marağı digər məsələlərlə yanaşı, Ər-Riyad və Vaşinqton arasındakı gərginliklə bağlıdır və həmçinin Krallığın Yaxın Şərqdə ABŞ-ın mövcudluğunu məhdudlaşdırmaq istədiyini göstərir. Eyni zamanda agentliyin həmsöhbəti qeyd edib ki, Fransa qırıcılarının alınması ilə bağlı danışıqlara baxmayaraq, Səudiyyə Ərəbistanı Amerikanın beşinci nəsil çoxməqsədli “F-35” qırıcılarına da hələ də maraq göstərir.
Musavat.com
XƏBƏR LENTİ
04 Oktyabr 2024
ŞƏRHLƏRŞƏRH YAZ