Onlayn ictimai-siyasi qəzet
Rubio İsrailə gedir: Müzakirələrin başlıca mövzusu açıqlandı
ABŞ dövlət katibi Marko Rubio İsrailə səfəri zamanı İordan çayının qərb sahilinin bəzi ərazilərinin İsrail tərəfindən mümkün ilhaqı məsələsini müzakirə etmək niyyətindədir.
Musavat.com "Axios" portalına istinadən xəbər verir ki, səbəb Fələstin Dövlətinin bir sıra Qərb dövlətləri tərəfindən gözlənilən tanınması dalğasıdır.
İsrailin baş naziri Benyamin Netanyahu ilhaqın miqyası ilə bağlı yekun qərarı hələlik verməyib. İsrail rəsmilərinin sözlərinə görə, o, Rubio ilə görüşdə prezident Donald Trampın belə bir addımı dəstəkləməyə hazır olub-olmadığını öyrənməyə ümid edir. Beynəlxalq ictimaiyyət ümumiyyətlə İordan çayının qərb sahilini işğal olunmuş ərazi hesab edir və onu ilhaq etmək üçün istənilən addım beynəlxalq hüququn pozulması kimi qəbul ediləcək.
Birləşmiş Ərəb Əmirlikləri xüsusilə sərt davranaraq, belə bir addımın İsraillə sülh müqaviləsinə zərbə vuracağı və İbrahim Sazişlərinin genişlənməsini poza biləcəyi barədə xəbərdarlıq edib.
BMT Baş Assambleyasının Fransa və Səudiyyə Ərəbistanının təqdim etdiyi Nyu-York bəyannaməsini təsdiqləməsindən sonra vəziyyət gərginləşib. Sənəd Fələstin dövlətinin yaradılması istiqamətində kursu təsbit edir. Onun lehinə 142 ölkə, əleyhinə ABŞ və İsrail də daxil olmaqla 10 ölkə səs verib, 12 ölkə isə bitərəf qalıb.
Bəyannamə dünya liderlərinin sentyabrın 22-də Nyu-Yorkda keçiriləcək sammitinin əsasını təşkil edəcək və burada Fransa, Böyük Britaniya və Kanada da daxil olmaqla bir sıra ölkələr tərəfindən Fələstinin rəsmi tanınması gözlənilir.
"Axios"un yazdığına görə, Rubio şəxsi söhbətlərində ilhaqın əleyhinə olmadığını və Tramp administrasiyasının buna mane olmayacağını açıqlayıb. Bununla belə, Ağ Evdə və Dövlət Departamentində ABŞ-ın prezidentin diplomatik irsinə mənfi təsir göstərə biləcək İbrahim razılaşmalarının dağılmasına icazə vermək istəmədiyinə dair narahatlıqlar artıb.
Rubio jurnalistlərə bildirib ki, o, İsrail tərəfi ilə Fələstinin gözlənilən tanınmasına reaksiyasını müzakirə etməyi planlaşdırır: "Biz avropalılara əks reaksiyanın olacağını söylədik". İsrail rəsmiləri vurğulayırlar ki, Netanyahu ABŞ-ın beynəlxalq addımlara cavab olaraq İsrailə nə qədər dəstək verməyə hazır olduğunu başa düşməyə ümid edir.
Rubio səfəri çərçivəsində Şərqi Qüdsdəki Əl-Əqsa məscidi yaxınlığındakı arxeoloji abidəni də ziyarət edəcək. Amerikalı diplomat vurğulayıb ki, onun iştirakı sırf mədəni xarakter daşıyır və siyasətlə bağlı deyil.
Musavat.com
XƏBƏR LENTİ
14 Sentyabr 2025
ŞƏRHLƏRŞƏRH YAZ