Onlayn ictimai-siyasi qəzet
Nikahdankənar saçyoldu məhkəmədə suç oldu
Dünən milli mediamızda yer almış, indi haqqında bəhs edəcəyim xəbər elə də ictimai-siyasi əhəmiyyət kəsb etmir, amma maraqlıdır və son illərin oxu statistikası göstərir ki, qədirbilən oxucularımız bu mövzuda dərin analizlər, rəy və şərhlər oxumaq istəyir.
Gözəgörünməzlərin hamısına şükür olsun ki, artıq Qarabağ problemi və seçki-meçki söhbəti yoxdur, yoxsa o biri tələbkar oxucular da redaksiyaya zəng edib deyərdilər: “Belə boş-boş şeylərdən yazmayın, Qarabağdan yazın, yaxınlaşan seçkilərdən yazın”.
Artıq o mövzular çürüyüb, Qarabağ mövzusu ölüb, seçkilər də yavaş-yavaş uzaqlaşır, nə vaxt yaxınlaşar, bir şeylər yazarıq. Lazım gəlsə.
Xüləs, keçək mətləbə.
Doğma, əziz Bakımızda belə bir hadisə olub: 1979-cu ildə İranda doğulan, Bakıda evi olan, amma Türkiyə vətəndaşlığı alan sahibkar qadın barəsində cinayət işi açılıb və xanımın işinə məhkəmədə baxılıb.
Adı Mania, soyadı N. olan qadını heç də vergidən yayınmaya və ya üç ölkənin arasında şübhəli gediş-gəlişlərə görə mühakimə etməyiblər, başqa birinə, adı İlahə, soyadı H. olan qadına xəsarət yetirməkdə ittiham ediblər.
Xanımların arasındakı dava da şərikli bizneslərini bölməyə görə olmayıb, pis çıxmasın, şərikli kişini bölə bilməmək üstündə olub. O kişinin adı Talıp, soyadı Ağdemirdir, Türkiyə vətəndaşıdır və sahibkardır. Hiss olunur ki, ortada, türkün sözü, aşk üçbucağı (bəlkə də çoxbucağı) var.
Heç demə, Mania Bakıdakı evini yaşamaq üçün Talıpa verərək, İstanbula gedib. Talıp dinc durmayıb, fikirləşib ki, qardaş ölkə olsa da, qərib yerdir, özünə bir könül həmdəmi tapıb, evə gətirib-aparıb. İlahə adlanan qadın da farağat durmayıb, Talıpla nikahdankənar görüntülərini Maniaya göndərib. Bu şəkilləri və ya videoları (xəbərdə təfərrüat yoxdur) görən Mania sakit dayana bilməyib, təyyarəyə oturub Bakıya gəlib. Burda stop edək.
Baxaq, görək, Mania xanımın maniakal hərəkətinin səbəbi nədir? Məgər o, evi Talıpa verərkən şərt kəsib ki, bu evə qadın ayağı dəyməyəcək? Hansı ev sahibi kirayənşindən belə şey tələb edir? Adam yekə kişidir, qonağı-qarası ola bilər. Amma ehtimal ki, Talıpla Manianın arasında nikahdankənar “salam-sağ ol” haqq-hesabı olub və bu görüntülər onu cin atına və İstanbul-Bakı təyyarəsinə mindirəcək qədər qısqanclıq tutması yaradıb.
Bakıya gələn Mania İlahədən polisə şikayət edib. Əslində o şikayətin də məzmunu maraqlıdır. Ərizədə nə olub? “Bu qadın mənimlə arası yaxşı olan Talıpla ona kirayəyə verdiyim evdə şəkil çəkdirib”? Belə şey ola bilərmi? Olar, olar. Seriallar əsridir.
Uzun sözün kəsəsi, polis görüb ki, ortada elə bir qanun pozuntusu yoxdur, tərəfləin izahatlarını alandan sonra hamısını sərbəst buraxıb. Bu zaman əsl Şərqsayağı qadın qovğası başlanıb. Məsələ nikahdankənar saçyolduya çevrilib və Mania İlahənin sağ çiyin nahiyəsindən nəyləsə vurub və o, necəsə ağır xəsarət alıb, sağlamlığı uzun müddət pozulub. Burası da maraqlıdır: Mania İlahəni nəylə vurub, gülləylə, dəmir linglə, yoxsa polis dəyənəyi ilə? Qadın yumruğu başqa bir qadının sağlamlığını o zaman poza bilər ki, vuran əlcəzairli boksçu İman Xəlif, vurulan isə qlamur model olsun. (Kim bilir, bəlkə onlar elə o cürdürlər).
Nəysə, indi məhkəmənin qərarı ilə sahibkar qadın barəsində 1 il müddətə islah işləri cəzası təyin edilib. Manianın aylıq qazancından da dövlət nəfinə 15 faiz pul tutulacaq.
İlahə xanım yəqin ki, hələ də müalicədədir. Talıp Ağdemirin hansı mövqedə olduğu bilinmir.
Bax, görürsünüzmü, bir şəkillə ortalıq necə qarışıb. Zalım qızı, Talıpı qoymusan başının altına, ta niyə şəkil çəkirsən? Yaxşı, bunu yadigar qalması üçün etmisən, ta şəkli İstanbula niyə göndərirsən?
Müasir haqq-hesabları bəyənməyən adamlar belə yerdə haqlı olaraq deyirlər ki, seriallar adamların başını xarab edir.
Türk iş adamı ilə oturub-durmaq məsələsinə gəlincə, 5-6 il öncə bir taksiylə qəsəbəmizə girəndə döngədə qarşımıza ağ rəngli lüks cip çıxdı. Sürücümüz sükan arxasındakı qadın sürücünü görən kimi əlini sükandan çəkib öz başına qoşa qapaz vurdu və dedi: “Kül mənim başıma”. Dedim, nə oldu, ay qardaş. Sürücü dedi, ta nə olacaq, o cip sürən q...adın bu yolda iki “şirvan”a maşınlara minirdi, indi cip sürür, “bir türk bisnesmeni loxlayır” deyirdilər, inanmırdım.
Onun nə demək istədiyini anladım, amma yenə də başına qapaz vurmağı qaranlıq qaldı. Xanımın talibi olub, istifadə edib, bu nə edəcəkdi ki?
Samir SARI 
XƏBƏR LENTİ
29 Aprel 2025
ŞƏRHLƏRŞƏRH YAZ