Onlayn ictimai-siyasi qəzet
“Nə Qarabağ qayıdacaq, nə ermənilər, nə Rusiya...”
Qafqaz İnstitutunun direktoru Ermənistanın Avropa İttifaqına üzvlüyünü ciddi mövzu hesab etmir
“Ermənistanın Rusiya ilə münasibətlərində normalaşdırma cəhdi Ukrayna müharibəsindəki vəziyyət, Donald Trampın ABŞ-da hakimiyyətə gəlməsi ilə Amerika siyasətinin dəyişməsi ilə bağlıdır. Siyasətçilər bu vəziyyətin ciddi dəyişikliklərə səbəb ola biləcəyini hiss edir və buna reaksiya verirlər”.
Musavat.com xəbər verir ki, bunu tanınmış politoloq, Qafqaz İnstitutunun direktoru Aleksandr İskəndəryan erməni mediasına müsahibəsində deyib. Onun fikrincə, Ukrayna münaqişəsinin həllindən və ya dondurulmasından sonra Moskvanın Cənubi Qafqazda hansı siyasət yürüdəcəyi hamını düşündürür: “Ümumiyyətlə, bir çaya iki dəfə girməyin mümkün olmadığını düşünürəm. Prinsipcə, siyasətdə hər şeyi olduğu kimi bərpa etməyi təsəvvür etmək çətindir. Nə var idi, getdi... İkincisi, daha konkret desək, Rusiya, Ermənistan və Azərbaycan üçün 2020-ci ilə qədər, bəlkə də 2022-ci ilə qədər siam əkizləri idi. Konfiqurasiya elə idi ki, Bakıya hansısa şəkildə təsir etmək üçün Ermənistan lazım idi. İrəvana hansısa yolla təsir etmək üçün isə Azərbaycan... Rusiya 2020-ci ilə qədər Cənubi Qafqazda təhlükəsizlik inhisarçısı idi. Rusiyanın Cənubi Qafqaza təsir aləti isə Gürcüstandan başqa, Dağlıq Qarabağ probleminin olması idi. Bu Rusiyanın Bakı və İrəvana təsir edə bilməsi üçün alət idi. O da getdi. Rusiyanın Cənubi Qafqaza geri qayıtması nə deməkdir? Qarabağ yenidən zəbt ediləcək və ora ermənilər köçürüləcək və Artsax bərpa olunacaqmı? Bunu təsəvvür etmək belə mümkün deyil. Bu, təbii ki, Rusiyanın regionu tamamilə tərk edəcəyi anlamına gəlmir. Bu barədə danışmaq ciddi deyil. Rusiya nəhəng dövlətdir, Cənubi Qafqazın qonşusudur və belə də qalacaq. Rusiya təsirini davam etdirəcək, öz rolunu oynayacaq. Bəzi amillər var ki, onları geri qaytarmaq mümkün deyil. Müvafiq olaraq, Rusiyanın təsiri qalacaq. Amma daha prezident Putinin Cənubi Qafqazda alovlanan hər hansı münaqişəni bir telefon zəngi ilə dayandıra bildiyi vaxta qayıdış mümkün deyil. Ən azından Türkiyə bölgəmizin oyunçusu olaraq buradadır. Amma digər tərəfdən, rəhmətlik Kaxa Bendukidzenin dediyi kimi, Rusiyanın yerində okean olsa, necə olar? Rusiyanın yerində okean olmayacaq. Yəni Rusiya regionumuzda öz rolunu davam etdirəcək, lakin bu rol keçmişdəki kimi deyil, fərqli olacaq”.
Politoloq Ermənistan parlamentinin ölkənin Avropa İttifaqına daxil olması prosesinin başlanması ilə bağlı qanun qəbul etməsi barədə da danışıb. O deyib ki, bu qanunun Avropa İttifaqı ilə heç bir əlaqəsi yoxdur: “Bunun xarici siyasətlə deyil, daxili siyasətə dəxli var. Prinsipcə, heç bir qanunun istənilən ölkəni Avropa İttifaqına daxil olmağa yaxınlaşdırması mümkün deyil. Əslində bunu Ermənistan rəsmilərinin özləri də deyirlər. Bu tamamilə başa düşüləndir. Yəni Avropa Birliyinə daxil olmaq üçün referendumlar, daxili qanunlar yoxdur; birincisi, rəsmi meyarlar var, Kopenhagen meyarları. İkincisi, bəzi siyasi kriteriyalar var ki, onların heç biri Ermənistanın qısa və ya ortamüddətli perspektivdə Avropa Birliyinə daxil olmasına imkan vermir. Bu qanunun qəbulu da daxili siyasi xarakter daşıyır və bunun nə üçün edildiyi az-çox aydın görünür. Birincisi, Avropa erməni daxili diskurslarında müsbət məna daşıyan sözdür və bu istək ölkə daxilində siyasi məqsədlər üçün istifadə oluna bilər. Necə ki, məsələn, Moldovada belə olub. Yəni bundan istifadə etmək olar. İkincisi, siz seçkilər zamanı müxalifəti dəyişməyə cəhd edə bilərsiniz. Yəni, indi parlamentdə olan o müxalifət partiyaları iqtidar partiyası üçün o qədər də əlverişli deyil. Və onları mühakimə oluna, hansısa formada şişirtməyə və beləliklə, 2026-cı il seçkilərində gələcək parlamentdə konfiqurasiyanı dəyişdirə biləcək yeni qruplar, qərbyönlü adlandırılan qruplar əvəzlənə bilər. Məncə, Ermənistanın Avropa İttifaqı üzvlüyü haqda müzakirələr açmaq o qədər də ciddi mövzu deyil”.
Musavat.com
XƏBƏR LENTİ
01 Aprel 2025
ŞƏRHLƏRŞƏRH YAZ