Onlayn ictimai-siyasi qəzet
Məşhur muzeylər qadınları irəli çəkir – “Nyu-York Tayms”
Dünyanın böyük muzeylərində qadın rəhbərlərin sayı artır. ABŞ-ın “Nyu-York Tayms” qəzeti belə yazır.
Novator.az-ın məlumatına görə, qəzet qeyd edir ki, 2021-ci ildə Fransanın paytaxtı Parisdə yerləşən Luvr Muzeyinə Lourens de Karsın direktor təyin olunması tarixi hadisə kimi qarşılanıb: “De Kars əsası 1793-cü ildə qoyulan, dünyanın ən çox ziyarət olunan bu muzeyində ilk qadın direktordur”.
“Nyu-York Tayms” vurğulayır ki, siyahı bununla bitmir: “Son bir neçə ildə Böyük Britaniyanın paytaxtı Londonda, Liverpul şəhərində və Kornuol qraflığında yerləşən dörd muzeyin daxil olduğu Teyt Qalereyasına, ABŞ-ın paytaxtı Vaşinqtondakı Milli İncəsənət Qalereyasına, Nyu-York şəhərindəki Bruklin Muzeyinə, Pensilvaniya ştatının Filadelfiya şəhərindəki, Missuri ştatının Sent-Luis şəhərindəki incəsənət muzeylərinə, bir sıra Vatikan muzeyinə qadın direktorlar təyin edilib”.
2022-ci ildə Filadelfiya İncəsənət Muzeyinin direktoru təyin olunmuş Saşa Suda “Nyu-York Tayms”a deyib ki, bəşəriyyətin 51 faizini qadınlar təşkil edir: “Ancaq rəhbər postlarda xanımlar hələ də azlıqdadır, bu da ciddi suallar doğurur”.
30 ilə yaxın Amerika Təbiət Tarixi Muzeyinə rəhbərlik etmiş, 2023-cü ilin mart ayında istefaya getmiş Ellen V. Futter “Nyu-York Tayms”a bildirib ki, muzey direktoru vəzifəsinə təyin edilən qadınların sayının artması onu çox sevindirir: “Mən bu ənənənin genişlənməsindən olduqca məmnunam. Qadın direktorların uğuruna sevinir, onlarla fəxr edirəm”.
“Nyu-York Tayms” yazır ki, muzeylərdə rəhbər vəzifə tutan qadınların çoxu biri-biri ilə dostluq münasibəti qurub: “Onlar özlərini eyni qrupun nümayəndələri kimi hiss edirlər”.
2017-ci ildən Teyt Qalereyasının direktoru kimi dörd muzeyə rəhbərliyi həyata keçirən Mariya Bolşou “Nyu-York Tayms”a deyib ki, muzey direktoru olan qadınların əksəri eyni nəslin nümayəndəsidir: “Hamımızın yaşı 50-ni ötüb, böyük təcrübəmiz var və karyera yolunda bir-birimizi dəstəkləyirik”.
Mariya Bolşou onu da bildirib ki, son zamanlar muzey direktoru olan qadınların sayı artsa da, bu sahədə kişi direktorlar hələ çoxluqdadur.
2019-cu ildən Vaşinqtondakı Milli İncəsənət Qalereyasına rəhbərlik edən Keyvin Feldman qeyd edib ki, İncəsənət Muzeyi Direktorları Assosiasiyasında qadınlardan ibarət bir qrup formalaşıb və bu qrupun üzvləri vaxtaşırı ayrıca görüşürlər.
“Nyu-York Tayms” yazır ki, 2022-ci ildə aparılmış tədqiqat Şimali Amerika muzeylərində çalışanların 75 faizindən çoxunun qadınlar olduğunu üzə çıxarıb. Tədqiqat 2015-ci illə müqayisədə muzeylərin rəhbərliyində təmsil olunan qadınların sayının 8 faiz artdığını da göstərib. 2015-ci ildə Şimali Amerika muzeylərinin 58 faizinin rəhbərliyində qadınlar olub. 2022-ci ildə bu göstərici 66 faizə qalxıb.
“Nyu-York Tayms” qeyd edir ki, ABŞ-dakı qadın muzey direktorlarının əksəri ağdərilidir: “Amma istisnalar da var. Nyu-Yorkdakı Harlem Muzey-Studiyasına uzun müddətdir qaradərili Telma Qolden rəhbərlik edir. Ohayo ştatının mərkəzi Kolumbus şəhərində yerləşən incəsənət muzeyinə bu yaxınlarda qaradərili Bruk A. Minto direktor təyin olunub. 2023-cü ilin əvvəlindən Baltimor İncəsənət Muzeyinə rəhbərlik edən Əsma Naim əslən Pakistandan, 2021-ci ildən Sent-Luis İncəsənət Muzeyinin direktoru olan Min Yunq Kim isə Cənubi Koreyadandır”.
XƏBƏR LENTİ
07 Oktyabr 2024
ŞƏRHLƏRŞƏRH YAZ