Onlayn ictimai-siyasi qəzet
İrəvanın “100 minlik ordu” xülyası
Hərbi ekspertlər partiya sədrinin sayıqladığını bildirirlər; “Ermənistan cəmiyyətinin bir qismi məğlubiyyətlə barışmır”
“Erməni qartalları” partiyasının sədri, polkovnik Xaçik Asryan “Verelq” nəşrindəki çıxışında deyib ki, hakimiyyət və müxalifət də daxil olmaqla, xalq dərhal silahlanmalı və 100 min nəfərlik ordu yaratmalıdır.
Asryanın sözlərinə görə, bunun 50 mini mobil ehtiyatdan, yarısı isə silahlı qüvvələr, sərhəd qoşunları və polisdən ibarət olmalıdır.
“Əgər bizim 100 minlik milli ordumuz olarsa, bu o deməkdir ki, biz Ermənistana və ermənilərə günəşli səma təmin edə biləcəyik. Yox, 100 minlik milli ordumuz olmayacaqsa, bu o deməkdir ki, biz öz əlimizlə Ermənistana və ermənilərin düşmənlərinə günəşli səmada yer vermiş olacağıq. 100 min nəfərlik ordu qurmaqla bütün düşmənlərlə vuruşa biləcəyik. Bu güclə Ermənistanın ərazi bütövlüyünü bərpa edəcəyik”, - deyə partiya sədri xəyallarını dilə gətirib.
Onun pafosdan ibarət bu çağırışı nə dərəcədə realdır? Ermənistanda revanşist partiya sədrinin dediyi kimi, 100 minlik erməni ordusu qurula bilərmi, bu ölkənin hansı müddətə müasir ordu qurması mümkündür, resursu varmı?
Emin Həsənli
“Tərxis Olunmuş Hərbçilərin Gəncləri Maarifləndirmə” İctimai Birliyinin sədri, hərbi ekspert Emin Həsənlinin fikrincə, bu fikirlər sayıqlamadan başqa bir şey deyil: “Ermənistanın 4 qonşusu var. Türkiyə, İran, Azərbaycan və Gürcüstan. Ən böyük sərhədi də Azərbaycanladır. Ermənistan bu dörd dövlətin hansı ilə müharibə aparmaq gücündədir? Ordusu 100 min olmasın, lap 150 min olsun, bununla nə edəcək? 3 milyona yaxın əhali 100 minlik ordunu hansı resurslarla formalaşdıracaq? Əhali də durmadan Ermənistandan köçüb gedir. Digər tərəfdən, polis qüvvələrinin müharibə etmək üçün hansı resursları var? Bunlar boş və mənasız fikirlərdir. Reallıqdan çox uzaqdır. Azərbaycan 2020-ci ilin 44 günlük müharibəsi və 2023-cü ilin birgünlük antiterror əməliyyatından sonra da daha güclü orduya sahibdir. Müasir silah-sursat tədarükü davam edir. Eyni zamanda yeni komando hərbi hissələri yaradılıb. Ermənistan Azərbaycanla müharibə aparmaq gücündə deyil. Tutaq ki, Xaçik Asryanın dediyi kimi, 100 minlik ordu yaradıldı, əhalinin 5-10 faizi cəlb olundu. Onunla nə əldə edəcəklər? Azərbaycan Ordusunun qarşısında durmaq gücündədirlər? Ermənistan insan resursları, ordunun hazırlığı, peşəkarlığı, iqtisadi resurslar baxımından Azərbaycanla müqayisə oluna bilməz. Ermənistan bizim torpaqları arxasındakı güclərin hesabına işğal etmişdi. Çar Rusiyası vaxtilə onları bölgəyə gətirib, ardınca sovet hökuməti bu siyasəti davam etdirib. Daha sonra İran dəstək olub. Amerika, Fransa kimi dünya güclərinin hesabına torpaqlarımızı 30 ilə yaxın müddətdə işğal altında saxladı. O zaman torpaqlarımızı işğal ediblər ki, Azərbaycan ya müstəqil deyildi, ya da müstəqilliyini yeni əldə etmişdi, köməksiz idi. İndi güclü dövlət, güclü ordu, xalq-ordu birliyi var. Biz Ermənistanı çox yaxşı tanıyırıq. Onun arxasında duranları da çox yaxşı tanıyırıq. Ona görə də bunlar mənasız fikirlərdir. Bunlar ancaq Ermənistanın daxili üçün səslənmiş sözlərdir. Onlar çox narahatdırlar, bilirlər ki, İrəvan, Göyçə, Vedi, Zəngəzur mahalları Azərbaycanın qədim torpaqlarıdır. 1828-ci ildə İrəvan çar ordusu tərəfindən ermənilərə bağışlanıb. Daha sonra Göyçə və Zəngəzur verilib. Bu tarixi onlar da yaxşı bilir. Buna görə də narahatdırlar. Görünən odur ki, onlar da bu bölgəyə uyğunlaşa bilməyiblər. Gəldikləri 200 ildə etdikləri yalnız terror, soyqırım, xəyanət, etnik təmizləmədir”.
Səxavət Məmməd
Hərbi icmalçı Səxavət Məmməd Xaçik Asryanın bu təklifini reallıqdan uzaq sayır. O, bunun səbəblərini də arqumentlərlə sadalayır: “Ermənistan müharibədə, meydanda məğlub olsa da, beyinlərdə revanşist hiss məğlub olmayıb. Ümumiyyətlə, Ermənistan cəmiyyətinin bir qismi məğlubiyyətlə barışmır. Onlar elə düşünür ki, toparlanıb Qarabağı yenidən işğal edə bilərlər. Xüsusilə Ermənistanda zamanında hakimiyyətdə olmuş Qarabağ klanı nəinki bu vəziyyətlə barışır, onlar ilk fürsətdə yenidən Azərbaycan torpaqlarını işğal etməyi hədəfləyirlər. 44 günlük müharibədən sonra mütəxəssislər belə hesab edirdi ki, Ermənistan ordusunun ən azı 2020-ci ilin 26 sentyabr həddinə gəlib çatması üçün milyardlarla vəsait və ən azı 7-8 il zaman lazımdır. Məsələ ondadır ki, Ermənistana verilən dəstəklərlə bu vaxtı qısalda bildilər. Ancaq hələ də Ermənistan ordusu o həddə gəlib çatmayıb. Ermənistan ordusunun güclənməsi üçün müxtəlif versiyalar ortaya atılır. Ancaq bu versiyaların heç biri tutarlı sayıla bilməz. Ermənistanın insan resursu 100 minlik ordu yaratmağa imkan vermir. Ermənistan əhalisinin, oradakı kişilərin və əli silah tuta bilənlərin sayı bu rəqəmə heç cür gəlib çata bilməz. Ona görə də bu təklifi "ölü doğulmuş ideya" adlandıra bilərik. Ermənistan ordusunda həmişə muzdlular olub. Hətta çoxlu sayda muzdluları cəlb etsələr belə, bu sayı almaq çətindir. Çünki Ermənistan dövlətinin büdcəsi o saydakı ordunu saxlamaq gücündə deyil".
Beləliklə, “Erməni qartallar”ın rəhbərinin fantazyor olduğu anlaşılır. Adam anlamır ki, Ermənistan 100 minlik ordu yarada bilsə, qarşısında 500 minlik Azərbaycan Ordusunu görəcək.
Cavanşir ABBASLI,
“Yeni Müsavat”
XƏBƏR LENTİ
04 Aprel 2025
03 Aprel 2025
ŞƏRHLƏRŞƏRH YAZ