Finlandiya parlamenti Rusiya sərhədində baryerlər qurmağa səs verdi

Onlayn ictimai-siyasi qəzet

İnsanlara hürriyət, millətlərə istiqlal!

Finlandiya parlamenti Rusiya sərhədində baryerlər qurmağa səs verdi

İyulun 7-si Finlandiya parlamenti ölkənin Rusiya ilə sərhədində baryerlərin qurulması haqda qanuna səs verib.

Novator.az saytı “Reuters” agentliyinə istinadla bildirir ki, qanun parlamentdə böyük səs çoxluğu ilə qəbul edilib.

Finlandiya-Rusiya sərhədi 1300 kilometr uzunluğundadır. Yeni qanun sərhəd boyu müxtəlif formalarda baryerlərin qurulmasını, hasarların, sədlərin çəkilməsini nəzərdə tutur.

Qanunun Finlandiyada sığınacaq axtaranlara da təsiri olacaq. Birincisi, qanun müstəsna hallarda sərhədin sığınacaq axtaranların üzünə tam bağlanmasına icazə verəcək. İkincisi, hətta sərhəd sığınacaq axtaranların üzünə tam bağlanmasa da, qanun sığınacaq istəyənlərin öz ərizələrini yalnız bir və ya bir neçə sərhəd keçidində (məsələn, aeroportda) verməsi kimi məhdudiyyətlərin tətbiqinə yol açacaq.

Avropanın şimalında yerləşən Finlandiya on illərdir neytral ölkədir. 1995-ci ildən Avropa İttifaqının üzvüdür. NATO ilə sıx əməkdaşlıqda olsa da, ölkə 2022-ci ilədək heç vaxt bu hərbi bloka qoşulmağa təşəbbüs göstərməyib.

Rusiyanın 2022-ci il fevralın 24-dən Ukraynada apardığı növbəti işğalçı müharibə Finlandiyanı, o cümlədən daha bir Skandinaviya ölkəsini – İsveçi NATO-ya qoşulmaq qərarına gəlməyə məcbur edib. Mayın 12-də Finlandiya və İsveç NATO-ya qoşulmaq üçün alyansa rəsmi müraciət edib.

Finlandiya NATO-ya qəbul olunacağı halda Rusiyanın buna sərt reaksiya verəcəyindən də ehtiyatlanır.

“Reuters” agentliyi bildirir ki, iyulun 7-si Finlandiya parlamentinin qəbul etdiyi qanun Rusiyanın radikal addımlar atacağı situasiyada əlavə qanunların qəbulu prosesini sürətlə həyata keçirməyə imkan yaradacaq.