Onlayn ictimai-siyasi qəzet
Deputatdan Almaniya prezidentinə sərt mesajlar
Deputat Sahib Alıyev Milli Məclisin iclasında üç fərqli, amma fərqli olduğu qədər də bir-birinə bağlı məsələlər haqqında fikirlərini bölüşüb.
Musavat.com-un məlumatına görə, deputat deyib ki, onlardan biri türklərə qarşı törədilən bolşevik-daşnak soyqırımıdır: “Ona görə türklərə qarşı ifadəsini işlədirəm ki, dünən 107-ci ildönümü olan və Arazın hər iki tayında baş verən soyqırımının ardından həmən cütlük Mərkəzi Asiyada da eyni vəhşilikləri törədib. Hesab edirəm ki, təəssübkeş və körpü dövlət olaraq bizim bir missiyamız da bu vəhşiliyi Xəzərin o tayındakı qardaşlarımıza da unutdurmamaqdır. Onun da yolu ilk növbədə TDT platformasında həmən vaxt yaşananlara birgə siyasi qiymət verməkdən keçir”.
S.Alıyev ikinci məsələyə də diqqət çəkib: “Bu məsələ ABŞ-nin Beynəlxalq Din Azadlığı üzrə Komissiyasının illik qlobal hesabatında ərazisində fəaliyyət göstərən 900-dən çox dini icmanın haradasa 30 faizi müsəlman olmayanlardan ibarət Azərbaycanın xüsusi narahatlıq doğuran dövlətlər siyahısına salınması, Qərbi Azərbaycanda üç yüzdən artıq, Qarabağ və Şərqi Zəngəzurda 65 məscidi yer üzündən silən, alban kilsələrini özününküləşdirən monoetnik Ermənistanın isə din azadlığını tamamilə təmin edən ölkə kimi təqdimidir. Xocalı soyqırımının törədilməsindən, Şuşayla Laçının ələ keçirilib Ermənistana dəhliz açılmasından və Naxçıvana gedən yolun tamamilə bağlanmasından sonra, yəni 1992-ci ilin oktyabrında guya Qarabağ haylarını blokadada saxladığımıza görə Azadlığa Dəstək Aktına 907-ci düzəlişlə bizə sanksiya tətbiq edənlərin bu hərəkətlərinin də arxasında hay diasporunun səylərindən çox səlibçi zehniyyətinin dayandığına tam əminəm və qətiyyətlə pisləyirəm!”
Deputat sonda Almaniya Prezidenti Ştaynmayerin regiona səfərinə də toxunub: “O, Ermənistana gələn gün dövlətinin maliyyələşdirdiyi “Deutsche Welle” də Qarabağda baş verənlərin Qebbelsəcinə saxtalaşdırıldığı sənədli film yayımlandı ki, cənab Ştaynmayerin rəsmi səhifəsində Almaniya Demokratik Respublikasının bayrağının deyil də, “miatsum”çuların əski parçasının peyda olmasından da görünür ki, bu, qəsdən edilib. Dövlətimizin reaksiyasını görüb o əski parçasını da, “Dağlıq Qarabağ” sözünü də “texniki səhv” adlandırıb rəsmi səhifəsindən yığışdırtdıran, ikinci dünya savaşında məğlubiyyətə uğradıqdan sonra ölkəsinin necə böyük kompensasiyalar ayırdığını yaxşı bilən Almaniya Prezidentindən soruşmaq istərdim, nasist soydaşlarının ötən əsrin 30-40-cı illərində etdiklərini təqribən yarım əsr sonra təkrarlayan, son günlər isə elə həm də onların ötürdüyü silahlarla atəşkəsi dəfələrlə pozan sevimli Ermənistanlarına nə məsləhət görərdi, törətdiyi vəhşiliyin bədəlini səlibçi zehniyyətlilərdən alacağı milyardlarlamı ödəsin, yoxsa elə yenə həmən Almaniyanın borc qarşılığında Yunanıstandan tələb etdiyi kimi, Azərbaycana torpaqlarının bir hissəsinimi versin, daha dəqiqi qaytarsın?”
E.Paşasoy,
Musavat.com
XƏBƏR LENTİ
02 Aprel 2025
ŞƏRHLƏRŞƏRH YAZ