Onlayn ictimai-siyasi qəzet
Cənubi Koreya tarixində ən dağıdıcı meşə yanğını – 18 nəfər ölüb
Cənubi Koreyanı ölkə tarixində ən böyük meşə yanğınları bürüyüb, 18 nəfər həlak olub, daha 10 nəfər yaralanıb.
Musavat.com xarici mediaya istinadla xəbər verir ki, Cənubi Koreyanın cənub-şərq bölgələri artıq beşinci gündür ki, irimiqyaslı meşə yanğınlarından əziyyət çəkir. Alov 17 min hektardan çox meşəni məhv edib, 209 yaşayış evi, sənaye binası və qədim Buddist ziyarətgahlarının yerində xarabalıqlar qoyub. Atəş altında qalan məbədlərdən biri 7-ci əsrdə tikilib.
Xəbər verilir ki, 18 nəfər təbii fəlakətin qurbanı olub, 1 nəfər itkin düşmüş hesab olunur. On zərərçəkmişə tibbi yardım lazım olub, onlardan ikisinin vəziyyəti ağırdır.
Səlahiyyətlilər bir neçə bölgədə evakuasiya elan edib. YUNESKO-nun Ümumdünya İrs Siyahısına daxil edilmiş, təxminən 150 min insanın yaşadığı qədim Haxve kəndi də təhlükə altındadır.
Yanğının söndürülməsinə 3 mindən çox yanğınsöndürmə xidmətinin şəxsi heyəti, 5 minə yaxın hərbi qulluqçu, o cümlədən 146 helikopter səfərbər edilib. Zərər çəkmiş ərazilər “xüsusi fəlakət zonaları” kimi tanınıb ki, bu da əhaliyə yardımı daha tez təşkil etməyə imkan verəcək.
Yanğınlar martın 21-də başlayıb. Quru hava və güclü külək səbəbindən yanğın sürətlə meşəlik ərazilərə yayılıb.
Baş nazir, prezidentin səlahiyyətlərinin müvəqqəti icraçısı Han Dok-su bunu Cənubi Koreya tarixində bu cür ən böyük təbii fəlakət adlandırıb.
Musavat.com
XƏBƏR LENTİ
29 Mart 2025
ŞƏRHLƏRŞƏRH YAZ