Onlayn ictimai-siyasi qəzet
Avtomobil nəhəngindən SÜRPRİZ QƏRAR - ABŞ-a tədarükü DAYANDIRDI
Böyük Britaniyanın avtomobil istehsalçısı "Jaguar Land Rover" (JLR) ABŞ-a məhsul tədarükünü müvəqqəti olaraq dayandıracaq.
Musavat.com xəbər verir ki, "The Times" qəzetinin yazdığına görə, hazırda bir ay davam etməsi planlaşdırılan qərar bazar ertəsi, aprelin 7-də qüvvəyə minəcək.
2008-ci ildən Hindistanın "Tata Motors" şirkətinə məxsus olan JLR hər il ABŞ-a təxminən 100 min avtomobil ixrac edir ki, bu da onun ümumi istehsalının dörddə birinə bərabərdir.
ABŞ ildə 30 milyard funt sterlinq (təxminən 38,7 milyard dollar) satış dövriyyəsi olan şirkət üçün ən böyük bazar sayılır. Bu məbləğin 6,5 milyard funt sterlinqini (təxminən 8,4 milyard dollar) isə məhz amerikalı alıcılar təmin edir.
"The Times" qeyd edir ki, bu qərarın arxasında JLR rəhbərliyinin qiymətləri artırmaq və idxal rüsumlarını alıcının üzərinə yükləmə perspektivini qiymətləndirməsi dayanır. Şirkətin ABŞ-a artıq göndərilmiş və rüsumlardan azad olan avtomobil ehtiyatları bir neçə ay kifayət edə bilər. Mövcud vəziyyətə cavab olaraq JLR marketinq xərclərini azaltmaq və ya Çin, Böyük Britaniya və kontinental Avropa kimi digər böyük bazarlarda daha aqressiv satış siyasəti tətbiq etmək variantlarını da nəzərdən keçirir.
Aprelin 2-də "Jaguar Land Rover" öz saytında Ağ Evin qərarına cavab olaraq qısa bəyanat yayımlayıb.
Bəyanatda deyilir:
“Bizim premium sinif avtomobillərimiz hələ də dünyada cəlbediciliyini qoruyur. Bizim biznes modelimiz bazar şərtlərinin dəyişkənliyinə tab gətirməyə qadirdir. Hazırda əsas prioritetimiz – dünya üzrə müştərilərimizə xidmət göstərmək və ABŞ bazarında yaranmış yeni ticarət şərtlərinə uyğun zəruri tədbirlər görməkdir”.
Aprelin 2-də ABŞ prezidenti Donald Tramp 185 ölkə və regiondan idxal olunan məhsullara qarşı gömrük rüsumlarının tətbiqini elan edib. 10%-lik universal tariflər 5 apreldə, fərdi rüsumlar isə 9 apreldə qüvvəyə minir. Bundan əlavə, aprelin 3-dən etibarən bütün idxal avtomobillərinə 25%-lik əlavə rüsum tətbiq olunub.
Baxmayaraq ki, Böyük Britaniya üçün minimum 10%-lik rüsum müəyyən edilib, 25%-lik idxal rüsumu yenə də Britaniya avtomobillərinə də şamil olunacaq.
İqbal RZAYEV,
Musavat.com
XƏBƏR LENTİ
06 Aprel 2025
ŞƏRHLƏRŞƏRH YAZ