Onlayn ictimai-siyasi qəzet
Ağlını itirmiş ordu: Kreml cəbhəyə ruhi xəstələri göndərir
Rusiya ordusunun ön xəttində getdikcə daha çox ağır psixi pozğunluğu olan şəxslər döyüşür.
Musavat.com xarici agentliklərə istinadən xəbər verir ki, bu barədə Ukrayna hərbçiləri "The Telegraph" qəzetinə məlumat bildiriblər.
Əlil sayılan bu insanlar müqavilə imzalamağa razı salınıb, nəticədə çoxu həlak olub və ya itkin düşüb.
Ukraynalıların bioqrafiyasını araşdırdığı ölənlər arasında 27 yaşlı Semyon Karmanov da var. O, uşaqlıqdan ağır əqli gerilik və davranış pozğunluqları yaşayıb, oxumağı və yazmağı bacarmayıb, daimi qayğıya ehtiyacı olub. Lakin həbsxana tibbi komissiyası onu “A kateqoriyalı” — tam hərbi xidmətə yararlı elan edib. Karmanovu koloniyadan Luqansk vilayətindəki düşərgəyə aparıblar, “sürücü” kimi hərbi bilet veriblər — halbuki o, maşın sürməyi bacarmırdı. Payızda başından aldığı yara nəticəsində həlak olub.
Mərkəzi Rusiyada yaşayan 22 yaşlı psixi pozğunluğu olan bir gənci isə polis, onun hərbi xidmətə yararsızlığı barədə rəsmi arayışına baxmayaraq, Müdafiə Nazirliyi ilə müqavilə imzalamağa məcbur edib. Onun taleyi bilinmir.
Aleksey Vaxruşev — həyatının çox hissəsini psixiatr nəzarətində keçirmiş, zehni inkişaf pozğunluğu olan uşaqlar üçün xüsusi məktəbdə oxumuş şəxs — də cəbhəyə göndərilib. Dezertirliyə cəhd etdikdən sonra onu yenidən döyüşə yollayıblar. Daha sonra onun izinə düşmək mümkün olmayıb.
İtkin düşənlər arasında 22 yaşlı Artyom Radaev də var. O, uşaqlıqdan əlil idi və 4-cü ayrıca motoatıcı briqadada xidmət edirdi. Qorlovkaya göndərildikdən bir neçə gün sonra yoxa çıxıb. Anası Qalina oğlunu bir fotoda tanıyıb — o, döyüşdən imtina etdiyi üçün ağaclara bağlanmış vəziyyətdə idi. Ananın oğlunun taleyini öyrənmək cəhdləri nəticəsiz qalıb.
Başqa bir hadisədə 23 yaşlı Oleg Volkov, uşaqlıqdan psixi xəstə olan bir gənc, şərab yeşiyini oğurladığına görə həbs ediləndən sonra orduya yazılmağa məcbur edilib. Cəbhənin ilk günü o, panikaya düşüb, elektrik şkafında gizlənib və dərhal əsir düşüb.
Hərbi hüquqşünas, “Çağırışçının məktəbi” təşkilatının eksperti Timofey Vaskin bildirib ki, bütün rekruterlərə planı doldurmaq tapşırığı verilib:
“Onların planı necə yerinə yetirməsi heç kəsi maraqlandırmır. Heç kim ‘əsgərlərin keyfiyyətinə’ görə hesabat istəmir, yalnız say vacibdir. Federal hakimiyyət də bunu anlayır, buna görə yaxınlarda psixi xəstəliklər üzrə yararlılıq meyarlarını aşağı salıblar.”
Rusiya hökumətinin təsdiqlədiyi “Xəstəliklər siyahısı”na əsasən, “D” kateqoriyası (yararsız) bu hallarda verilir:
— əqli gerilik,
— şizofreniya,
— bipolyar pozğunluq,
— ağır depressiyalar,
— epilepsiya.
Lakin son aylarda bu tibbi normalar süni şəkildə yumşaldılıb, nəticədə hərbi çağırış sistemində ən həssas təbəqə — psixi xəstələr — yeni qurbanlara çevrilib.
Musavat.com
XƏBƏR LENTİ
07 Noyabr 2025
ŞƏRHLƏRŞƏRH YAZ