Onlayn ictimai-siyasi qəzet
7 uşağın ölümünə səbəb olan yanğın işində ittihamlar təsdiqlənir – İşçilər mərkəz direktorunu ifşa edir
Bakı Ağır Cinayətlər Məhkəməsində hakim Leyla Əsgərova-Məmmədovanın sədrliyi ilə “Respublika Perinatal Mərkəzi” Publik Hüqiqi Şəxsində baş vermiş yanğınla bağlı cinayət işi üzrə araşdırmalar davam edir.
Musavat.com-un xəbərinə görə, hakim qarşısına mərkəzin direktoru Mehriban Abasquliyeva, Anesteziologiya, reanimasiya və intensiv terapiya şöbəsinin müdiri Hamlet Mustafayev, dəstək xidmətləri şöbəsinin müdiri Elnur Əhmədli çıxarılıblar. Bu gün keçirilən prosesdə şahidlər ifadə verib. Mərkəzdə uşaq reanimasiya şöbəsində tibb bacısı işləyən Firuzə Məmmədova bildirib ki, hadisə günü işdə olmayıb. Onun sözlərinə görə, xəstəxanada aparatların sayı çox olduğuna görə elektrik uzadıcılarından istifadə olunurdu. Divarlarda hər uşaq üçün üç elektrik yuvası var idi və çalışdığımız qədər küvezləri birbaşa elektrik yuvasına qoşurduq. Bununla belə, divarlarda açıq elektrik yuvaları da olurdu. Firuzə Məmmədova qeyd edib ki, işlərinin çoxluğundan kiməsə nəsə deməyə belə vaxtları olmurdu: “Uşaqların sayı artdıqca da etiraz edə bilmirdik. Bizə deyilirdi ki, uşaqları qəbul etməliyik. İşin çox olduğunu deyəndə Mehriban xanımın kim işləyə bilmirsə, ağ kağıza qol çəksin, işdən çıxsın sözünü deyirdi”.
Şahid Günel Həsənova da Mərkəzdə tibb bacısı işləyib. Onun sözlərinə görə yanğın baş verən gün işdə olmayıb: “Gəldim gördüm ki, yanğın baş verib. Mən təzə işləyən vaxtı bu qədər uşaqla işləməmişdim. Gedib sözümüzü Mehriban xanıma deyirdik ki, işimiz çoxdur. Mehriban xanım mənim özümə deyib ki, işləyə bilmirsənsə, bu al bu A4 kağızı, bu da qapı, gedə bilərsən. Bizim işdə su içməyə belə vaxtımız olmurdu.
Qeyd edək ki, ötən il yanvarın 9-da “Respublika Perinatal Mərkəzi” PHŞ-nin inzibati binasında yanğın baş verib. Baş Prokurorluq Cinayət Məcəlləsinin müxtəlif maddələri ilə cinayət işi başladıb, ibtidai istintaq Baş Prokurorluğun İstintaq idarəsinə tapşırılıb.
İstintaqla müəyyən olunub ki, Mərkəzin Anesteziologiya, reanimasiya və intensiv terapiya şöbəsinin Yenidoğulmuşların intensiv terapiya bölməsinin yerləşdiyi dördüncü mərtəbədəki palatasında baş vermiş yanğın nəticəsində 7 yenidoğulmuş körpə ölüb, 4 nəfər xəsarət alıb, müəssisəyə isə ümumilikdə 361 min manat məbləğində maddi ziyan vurulub.
Bundan başqa, Mehriban Abasquliyevanın 27 dekabr 2022-ci ildə Mərkəzin direktoru təyin edilməsindən sonra müəssisənin tibbi təminat resursları və potensialını nəzərə almadan xəstə qəbulu sayını iki dəfəyədək artırması nəticəsində müəssisənin elektrik təsərrüfatının artıq yüklənərək sonda yanğına səbəb olmasına əsaslı şübhələr müəyyən edilib.
Eyni zamanda istintaqla, Fövqəladə Hallar Nazirliyi tərəfindən Mərkəzdə yoxlamalar aparılaraq yanğın təhlükəsizliyi qaydaları, xüsusən də, mövcud avtomatik yanğın xəbərverici siqnalizasiya qurğusunun nasazlığı, daxili yanğın su kranlarının işlək olmaması və elektrik təsərrüfatında nöqsanların olması Mərkəzin rəhbərliyinə bildirilsə də, direktor və Mərkəzin Anesteziologiya, reanimasiya və intensiv terapiya şöbəsinin müdiri Hamlet Mustafayev və Dəstək Xidmətləri şöbəsinin müdiri Elnur Əhmədlinin nöqsanları aradan qaldırmamalarına əsaslı şübhələr müəyyən edilib.
Mərkəzin direktoru vəzifəsində işləmiş Mehriban Abasquliyeva Cinayət Məcəlləsinin 308.2 (ağır nəticələrə səbəb olan vəzifə səlahiyyətlərindən sui-istifadə) və 225.3-cü (yanğın təhlükəsizliyi qaydalarını pozma ehtiyatsızlıqdan iki və daha çox şəxsin ölümünə səbəb olduqda) maddələri, həmin mərkəzin şöbə rəisləri vəzifəsində işləmiş Hamlet Mustafayev və Elnur Əhmədli isə Cinayət Məcəlləsinin 225.3-cü maddəsi ilə təqsirləndirilən şəxs qismində cəlb edilərək onlara həmin maddələrlə nəzərdə tutulan ittiham elan edilib.
Cinayət işi üzrə "Respublika Perinatal Mərkəzi", bundan başqa, Elçin Gülmalı oğlu Nəcəfov, Vaqif İntiqam oğlu Hacıyev, Aynurə Qalib qızı Əhmədova, Gülbahar Zülfüqarova zərərçəkmiş qismində tanınıblar.
Növbəti məhkəmə prosesi sentyabrın 15-nə təyin olunub.
Elşən MƏMMƏDƏLİYEV,
Musavat.com
XƏBƏR LENTİ
25 Avqust 2025
ŞƏRHLƏRŞƏRH YAZ