Onlayn ictimai-siyasi qəzet
Zelenski üçün FƏLAKƏT: Cəbhədə Rusiya təzyiqi, daxildə narazılıq, xaricdə diplomatik təcrid...
Musavat.com xəbər verir ki, ABŞ-ın nüfuzlu Axios nəşri Ukrayna Prezidenti Volodimir Zelenskinin hazırkı vəziyyətini “əlverişsiz hadisələrin fəlakətli toqquşması” kimi qiymətləndirib. Nəşrin yazdığına görə, Zelenski eyni anda bir neçə ağır təzyiqlə üz-üzə qalıb: Rusiya ordusunun son aylarda cəbhədə əldə etdiyi uğurlar, Ukrayna daxilində artan sosial-siyasi narazılıqlar və qarşıdan gələn ABŞ–Rusiya sammitinin Kiyevi diplomatik küncə sıxma ehtimalı.
Time və Reuters isə xəbər verir ki, Rusiya qüvvələri Donetsk və ətraf istiqamətlərdə irəliləməkdə israrlıdır. Moskva hərbi üstünlük əldə etmək üçün yüksək itkilərə baxmayaraq, hücum əməliyyatlarını genişləndirir. Bu, Ukraynanın müdafiə xətlərində ciddi təzyiq yaradır və bəzi mövqelərin itirilməsi ilə nəticələnir.
Ölkə daxilində hərbi çağırışlarla bağlı narazılıqlar, iqtisadi gərginlik və müharibənin uzanmasından doğan yorğunluq Zelenski hökumətinin mövqeyini zəiflədir. Siyasi müxalifət və bəzi ictimai qruplar hökuməti daha sərt və effektiv tədbirlər görməyə çağırır.
ABŞ və Rusiya prezidentləri Donald Tramp və Vladimir Putinin Alyaskada keçirəcəyi sammit Ukrayna üçün əlavə təzyiq amilidir. Reuters-in məlumatına görə, Kiyev bu görüşün formatından və məkanından narazıdır, çünki Ukraynanın masada təmsil olunmaması onun maraqlarına ziddir. Axios isə hesab edir ki, sammit Zelenskiyi “diplomatik küncə” sıxaraq, ona fakt qarşısında qalan qərarlar diktə edə bilər.
Bütün çətinliklərə baxmayaraq, Zelenski açıq şəkildə ərazi güzəştlərinə getməyəcəyini və Ukraynanın suverenliyinin toxunulmaz olduğunu bəyan edib. O, Alyaska görüşündə müzakirə ediləcək hər hansı “ərazilərin dəyişdirilməsi” planını qəbul etməyəcəyini vurğulayıb. The Guardian və AP News-un yazdığına görə, Zelenski uzunmüddətli təhlükəsizlik zəmanətləri olmadan heç bir sülh sazişinə imza atmayacaq.
Musavat.com-un şərhi
Zelenskiyə qarşı hazırkı təzyiq bənzərini 2022-ci ilin fevralında, Rusiya tanklarının Kiyevin qapılarına dayandığı günlərdə görmüşdük. Həmin vaxt geri çəkilməyən, qaçmayan, inadkarlıq göstərən lider bu gün də həm daxildə, həm də beynəlxalq arenada müqavimət göstərir. Lakin qarşısında duran Alyaska sınağı əvvəlkilərdən fərqli olaraq həm hərbi, həm də diplomatik meydanda eyni vaxtda yaşanacaq. Avropa və Qərb koalisiyasının dəstəyi ilə Zelenski və Ukrayna bu mürəkkəb vəziyyətdən çıxmağı hədəfləyir.
Musavat.com
XƏBƏR LENTİ
29 Sentyabr 2025
28 Sentyabr 2025
ŞƏRHLƏRŞƏRH YAZ