Onlayn ictimai-siyasi qəzet
Vatikandan Türkü incidən mövqe - Roma Papasının o qərarı...
Qondarma genosidin “qurbanı” “müqəddəsləşdiriləcək” - xristian təəssübkeşliyinə Bakıdan sərt reaksiyalar gəldi
Roma Papası Fransiskin qərarına əsasən, qondarma “erməni soyqırımı”nın “şəhidi” sayılan İqnatius Maloyan kanonlaşdırılacaq - “müqəddəsləşdiriləcək”. “Bakı-Xəbər” bildirir ki, bu barədə Vatikan məlumat yayıb. Qeyd olunur ki, “mübarək” İqnatius Maloyan 1869-cu il aprelin 19-da Türkiyənin Mardin şəhərində anadan olub. Onun 14 yaşında Livandakı Bzomar monastırında ruhaniliyə daxil olduğu və 1896-cı ildə ona “İqnati” adı verildiyi yazılır. Yazırlar ki, o, Qahirənin “patriarxal vikarı” təyin edilib, 1911-ci ildə Mardinin “patriarxal vikarı” olub.
İqnatius Maloyan guya “soyqırımı” zamanı onlarla xristianla birlikdə həbs edilərək məhkəmə qarşısına çıxarılıb. Guya məhkəmədə Maloyana “İslamı qəbul etsən, həyatını xilas edə bilərsən” deyiblər, o isə “biz heç vaxt dövlətə xəyanət etməmişik. Amma bizdən dinimizə xəyanət etməyi tələb etsəniz, bu, heç vaxt baş verməyəcək”, - deyib. Bu sözü deyəndən sonra o, guya işgəncələrə məruz qalıb və bir müddət sonra edam edilib. 2001-ci ildə Papa II İohann Pavel onu “mübarək” elan edib.
Göründüyü kimi, ermənilər qondarma soyqırımının “qurbanları” ilə xristian dünyasının başını qatmaqdadırlar. Roma Katolik Kilsəsi də bu mifə havadarlıq edir.
Xatırladaq ki, hər il aprelin 24-də ermənilər saxta soyqırımını qeyd edirlər. Erməni baş nazir Nikol Paşinyan isə son çıxışlarında bu hadisələri faciə adlandırıb və saxta genosid məsələsini gündəmə gətirməyi zərərli adlandırıb.
Biz bu yalanları necə ifşa edə bilərik? Ümumiyyətlə, bu təbliğata cavab verməliyikmi?
Sona Əliyeva
Siyasi təhlilçi Sona Əliyevanın sözlərinə görə, 2025-ci ilin əvvəlindən Vatikandakı papalıq Türkiyəyə, türklərə, eləcə də bütün Turan Birliyinə qarşı növbəti “səlib yürüşü mövsümü”nü açıq elan edib: “Vatikan ”ənənə"sinə sadiqdir və türk düşmənliyini davam etdirir. Bir müddət öncə Yunanıstandan Amerikaya yollanan keşiş də prezident Trampla görüşündə ondan İstanbulu türklərdən geri almağı tələb edir, türklər əleyhinə həqarətlər səsləndirirdi. Bütün bunlar onu göstərir ki, hazırda xristian dünyası vahid mərkəzdən idarə olunan anti-türk, anti-Türkiyə siyasəti yürüdür. “Erməni soyqırımı” məsələsinin Qərbdə yenidən gündəmə gətirilməsi “qoca qitə”nin özünü çox pis duruma sala bilər. Hazırda NATO-nun ikinci ən böyük ordusu sayılan türk ordusu Qərbi Rusiya caynağından qurtara biləcək yeni gücdür. Amma erməni və xristian təəssübkeşliyi Avropanı uçuruma sürükləyir".
S.Əliyeva düşünür ki, Qərbdən gələn qondarma soyqırımı çağırışlarına enerji sərf etməməliyik: “Baxın, Ermənistan hakimiyyəti də hazırda Qərbin bu cür tələlərindən qaçmağa çalışır. Çünki Paşinyan hakimiyyəti anlayır ki, İrəvanın ayaqda qalması və mövcudluğunu davam etdirməsi Azərbaycan və Türkiyədən asılıdır”.
Vüqar İskəndərov
“Qərb dünyası bəşəriyyəti dini və irqi ayrı-seçkiliyə məruz qoymaqda davam edir. Bu siyasətin mərkəzində isə onlar açıq etiraf etməsələr də, sırf ”xristian təəssübkeşliyi" dayanır. Torpaqlarımızın 30 il xristian Ermənistan tərəfindən işğalda qalmasına Vatikan da daxil, Qərbin susqun qalmasının kökündə də bu amil dayanır". Bunu isə “Yeni Müsavat”a deputat Vüqar İskəndərov deyib. O bildirib ki, bu yanaşma hazırda davam edir: “Biz səlib yürüşlərini tarix kitablarından oxuyurduq. Amma bu gün də o səlib yürüşləri bu və ya digər formada davam edir. Bəhs edilən məsələnin kökündə də elə bu məqam dayanır. Xristian erməni üzərindən müsəlman Türkiyəni qaralamaq. Həm də İslam aləmini hədəfə gətirmək. Amma hər kəs, o cümlədən vicdanlı xristianlar da yaxşı bilirlər ki, İslamda başqa dinin təmsilçisinin zor gücünə İslam dininə sitayişə məcbur etmək yoxdur”.
Deputat deyib ki, xəbərin yalan olduğunu təsdiqləyən digər fakt isə İqnatius Maloyanın dilindən təqdim edilən fikirdir: “Guya İqnatius Maloyan ”biz heç vaxt dövlətə xəyanət etməmişik. Amma bizdən dinimizə xəyanət etməyi tələb etsəniz, bu, heç vaxt baş verməyəcək", - deyib. Normal təhlil qabiliyyəti olan və erməni kimliyinə bələd olan hər kəs yaxşı bilir ki, bu ifadələr erməniliyin yaşam tərzi ilə daban-dabana ziddir. Çünki buradakıların əksinə olaraq ermənilər azacıq çətinə düşən kimi nəinki dinini, həm də dövlətini, ümumiyyətlə müqəddəs saydıqları hər şeyi satmağa hazır olublar və satıblar. Əslində, Paşinyan anlayır ki, nə bu qədər erməni o ərazilərdə yaşayıb, nə soyqırım olub".
Azər Badamov
Deputat Azər Badamov isə deyib ki, “erməni soyqırımı” ifadəsi saxta bir tarixdir: “Ermənilərə qarşı soyqırımı heç vaxt olmayıb. Hətta Türkiyənin prezidenti Rəcəb Tayıb Ərdoğan bu məsələ ilə bağlı Ermənistana arxivlərin açılması və birgə tədqiqatların aparılması ilə bağlı çağırış etmişdi. Amma ermənilərdən bir səs çıxmamış və arxivləri açaraq məsələləri dərindən öyrənilməsi üçün bir cavab gəlməyib. Erməni lobbisi dünyada saxta soyqırım məsələsini zaman-zaman gündəmə gətirir və müxtəlif səviyyələrdə müəyyən qərarların qəbul olunmasına çalışır. Hətta bu ”soyqırımı" məsələsi düşünülmüş şəkildə 1950-ci ildən sonra ortaya atılıb. O vaxta qədər “erməni soyqırımı” ilə bağlı məsələ heç vaxt gündəmdə olmayıb. Bu gün isə çox təəssüf ki, bəzi ölkələr ermənilərə dəstək durmaq üçün bu mifik ifadə ətrafında öz fikirlərini bildirirlər".
Deputatın fikrincə, Roma Papası kimi xristian dünyasında hörməti olan bir şəxs ermənilərin bu yalanlarına uymamalı və saxta məsələlərlə bağlı qərarlar çıxarmamalıdır: “Dini liderlər dünyada müharibələrin, ədalətsizliklərin qarşısını alan, millətlər, xalqlar və dövlətlər arasında sülh və əməkdaşlığı təşviq edən qərarlar qəbul etməlidir. Amma təəssüf ki, Roma papasında bunun əksini gördük. Təbii ki, bu bir xristian təəssübkeşliyidir. ”Erməni soyqırımı" məsələsinin saxta olduğunu Ermənistanın baş naziri Nikol Paşinyanın özü də açıq şəkildə bəyan edib".
Cavanşir ABBASLI,
“Yeni Müsavat”
XƏBƏR LENTİ
05 Aprel 2025
ŞƏRHLƏRŞƏRH YAZ