Onlayn ictimai-siyasi qəzet
Vaşinqton SOS siqnalı verdi: ABŞ-ın əsas düşmənləri açıqlandı
"ABŞ kəşfiyyat strukturlarının rəhbərləri çağırışlar və təhlükələr barədə Konqresə yeni hesabat təqdim ediblər. Hesabatla bağlı Nümayəndələr Palatasının komitəsində dinləmələr təşkil olunub. Hesabatda əsas təhlükənin iki ünvanı göstərilib. Bu Rusiya və Çindir".
Bu barədə Musavat.com-a açıqlamasında politoloq Elxan Şahinoğlu deyib.
Politoloq qeyd edir ki, hesabatda Rusiyanın hərbi gücünün təhlükəli həddə çatdığı bildirilsə də, ABŞ üçün əsas təhlükənin Çindən gəldiyi bu cümlə ilə vurğulanıb:
"“Çin ABŞ-ın milli təhlükəsizliyi üçün daha güclü çağırışdır”.
Çinin artan iqtisadi və hərbi gücü Amerika üçün təhlükə kimi dəyərləndirilib. Hesabatda Çinlə bağlı bunlar yazılıb: “Çinin kosmik imkanları Rusiyanı geridə qoyub və ABŞ-la rəqabət aparacaq hala gəlib. Çin lideri Si Cinpin 2049-cu il üçün ölkəsinin lider dövlətə çevriləcəyi qənaətindədir. Pekin bu tarixə qədər Tayvan adasını da ram etməyi planlaşdırır. Bundan başqa Çinin ABŞ-a qarşı kiber əməliyyatları davam edəcək”.
Hesabatın Rusiyaya aid hissəsində isə bunlar yazılıb: “Rusiya-Ukrayna müharibəsinin davamı Moskvanın NATO ilə toqquşma ehtimalını artırır. Bu isə Rusiyanın ABŞ-a qarışmasına da şərait yaradır və nüvə müharibəsi təhlükəsi yaradır. Rusiya çeşidli nüvə arsenalı böyük təhlükə mənbəyidir. Rusiyanın kiber sahədə imkanları artıb. Rusiya Prezidenti Vladimir Putin ABŞ-la strateji rəqabətdə mübarizəsini davam etdirəcək. Rusiya hərbi sənaye kompleksinə artan yatırımlar ABŞ milli təhlükəsizliyi üçün ciddi təhdiddir. Rusiyanın Çin, İran və Şimali Koreyadan aldığı hərbi texnikalar da diqqətdən qaçmamalıdır. Buna baxmayaraq, Rusiyanın problemləri də az deyil, bunlardan iqtisadiyyatda dərinləşən problemləri, korrupsiya və əhali artımının azalmasını göstərmək olar”.
Hesabatda Rusiya və Çindən gələn çağırışlarla yanaşı bu iki dövlət arasındakı əməkdaşlığın da ABŞ üçün təhlükəli olduğu yazılıb. Təsadüfi deyil ki, ABŞ Prezidenti Donald Tramp Moskva-Pekin ittifaqını zəiflətmək üçün Kremllə müxtəlif məsələlərlə bağlı razılaşma əldə etmək istəyir. Bundan başqa Rusiya və Çinin İran və Şimali Koreya ilə əməkdaşlığı da Amerika üçün təhlükəli gedişat kimi qiymətləndirilib. Amerika kəşfiyyat strukturlarına rəhbərlik edənlər hesab edirlər ki, ABŞ-ın İran və ya Şimali Koreya ilə müharibəyə başlayarsa Rusiya və Çinin prosesə müdaxilə ehtimalı var".
Politoloq bildirir ki, ABŞ kəşfiyyat strukturları mövcud problemlər barədə hesabat hazırlasalar da, Vaşinqtonda bu problemlərin necə həll olunacağı barədə geniş müzakirə aparılmır:
"Əlbəttə, Ağ Ev sahibi və onun müşavirlərinin Rusiya və Çin təhlükəsini azaltmaqla yanaşı müəyyən planları mövcuddur. Ancaq bu planların reallaşdırılmasının özünün çətinlikləri var. Rusiya və Çin ABŞ-la münasibətlərini normallaşdırmağa çalışsalar da, hərbi güclərini artırmaqdan və aralarındakı ittifaqı zəiflətməkdən imtina etməyəcəklər".
Xalidə Gəray
Musavat.com
XƏBƏR LENTİ
04 Aprel 2025
ŞƏRHLƏRŞƏRH YAZ