Onlayn ictimai-siyasi qəzet
Tramp Putindən 2017-ci ildə Ukrayna ilə bağlı nə istəyib? TƏFƏRRÜATLAR
Donald Tramp 2017-ci ildə Vladimir Putindən Ukrayna ilə bağlı məsləhət istəyib və Putin Trampın fikrini öz tərəfinə çəkə bilib.
“The New York Times“ öz mənbələrinə istinadən yazır ki, 2017-ci il yanvarın 28-də prezidentliyi dövründə Putinlə ilk telefon danışığı zamanı Tramp ilk olaraq Ukrayna məsələsini qaldırıb və Putindən öz fikrini bildirməsini istəyib:
"Rusiya prezidenti bundan istifadə edib. O, Ukraynadakı korrupsiya ilə bağlı uzun monoloqa başlayıb. Tramp cavabında təmkinli olub, Putinlə razılaşmayıb və Ukraynanı müdafiə etməyib, lakin o, Rusiyanın Ukrayna ilə mübahisəsinin onun Moskva ilə münasibətlərin yaxşılaşdırılması məqsədinə mane olduğunu etiraf edib”.
Həmin gün Almaniya kansleri Angela Merkel Ukraynaya davamlı dəstəyin və Ukraynada Rusiya təcavüzünün qarşısının alınmasının vacibliyindən danışaraq, Ukraynaya fərqli baxış bucağını Trampa çatdırmağa çalışıb.
Lakin söhbət zamanı iştirak edən mənbənin sözlərinə görə, Tramp onun fikrinə məhəl qoymayıb və söhbəti kəsib. "Çox sağ olun və əlvida", - Tramp deyib.
“The New York Times“ yazır ki, Ukraynanın seçkidə Hillari Klintona kömək etməyə çalışdığını deyən Putinin təhriki ilə Tramp Ukraynanın ABŞ seçkilərinə müdaxiləsi ilə bağlı konspirasiya nəzəriyyəsini təbliğ etməyə başlayıb. 2017-ci ilin mayında Rusiyanın xarici işlər naziri Sergey Lavrovla görüşü zamanı Tramp onunla Ukrayna və Klinton arasındakı əlaqəni müzakirə edib və Lavrovu Ukrayna rəsmiləri ilə Amerika demokratları arasında əlaqələrə dair suallarla bombalayıb.
Eyni zamanda, Trampın Ukraynadan narazılığı artdıqca, onun bəzi müşavirləri onu inandırmağa çalışıblar ki, 2016-cı il seçkilərinə müdaxilə edən Ukrayna deyil, Rusiyadır, lakin Tramp, görünür, onlara qulaq asmayıb.
2017-ci ilin iyulunda Hamburqda Putinlə görüşü zamanı bir gün əvvəl çıxışında Rusiyanın “Ukraynadakı sabitliyi pozan fəaliyyətlərini dayandırmalı” olduğunu bildirən Tramp yenidən Rusiya prezidentinin manipulyasiyalarına tab gətirib.
Qeyd olunur ki, Putin Ukraynanın şərqindəki rusdilli sakinləri “etnik təmizləmə”dən qorumağa borclu olduğunu iddia edib. Eyni zamanda o, 1904-cü ildə prezident Teodor Ruzvelt və Amerikanın Latın Amerikası ölkələrinin daxili işlərinə müdaxiləsi ilə bənzətmə aparıb.
Trampın prezidentliyi zamanı Milli Təhlükəsizlik Şurasının yüksək rütbəli əməkdaşı Fiona Hillin qeyd etdiyi kimi, Putin çox güman ki, görüşdə Ruzveltin adını çəkib, “çünki o, cənab Trampın keçmiş güclü prezidentə kökləndiyini bilirdi”.
Tramp və Ukrayna müharibəsi
Donald Tramp sentyabr ayında Ukrayna prezidenti Vladimir Zelenski ilə son görüşündən sonra “çox şey öyrəndiyini” etiraf edib və Ukrayna üçün “ədalətli dünya” axtaracağına söz verib. Eyni zamanda Tramp əmin olduğunu bildirib ki, Vladimir Putin də sülhə can atır./Lent.az
XƏBƏR LENTİ
25 Noyabr 2024
24 Noyabr 2024
ŞƏRHLƏRŞƏRH YAZ