Onlayn ictimai-siyasi qəzet
Şəhidin yeni dünyaya gələn qardaşına ad qoyuldu, şərəfinə tort kəsildi - TOVUZDAN MÖHTƏŞƏM VİDEO
Xəbər verdiyimiz kimi, Vətən müharibəsi şəhidi Yusif Ələsgərovun ailəsində böyük sevinc yaşanır. Şəhidin anası Sevinc Abdullayeva oğul övladı dünyaya gətirib. Bu hadisə, şəhidin ailəsi və yaxınları üçün həm təsəlli, həm də gələcəyə ümid mənbəyi olub.
1996-cı il təvəllüdlü Yusif Ələsgərov 2020-ci il sentyabrın 27-də başlayan Vətən müharibəsində Azərbaycan torpaqlarının azadlığı uğrunda canından keçmiş qəhrəmanlarımızdan biridir. O, Füzuli, Xocavənd, Cəbrayıl və Qubadlının azadlığı uğrunda gedən döyüşlərdə tankçı kimi iştirak edib. Oktyabrın 24-də Qubadlı döyüşlərində ağır yaralanmasına baxmayaraq, müalicəsi tam bitmədən yenidən döyüş bölgəsinə qayıdıb. Yusif Ələsgərov 7 noyabr 2020-ci ildə Xocavənd rayonu istiqamətində gedən döyüşlərdə şəhid olub və Tovuz rayonunun Yuxarı Öysüzlü kəndində torpağa tapşırılıb.
O, ölümündən sonra “Vətən uğrunda” və “Şuşanın azad olunmasına görə” medalları ilə təltif edilib.
Yusif Ələsgərovun atası Yaşar Ələsgərov da Vətən müharibəsi qazisidir. Bu günlərdə ailədə dünyaya gələn yeni körpə, şəhid ailəsi üçün böyük mənəvi dəstək və sevinclə qarşılanıb. Musavat.com-un təqdim etdiyi videoda şəhidin yaxınları və valideynləri yeni doğulan körpənin şərəfinə tort kəsərək bu xüsusi günü qeyd edirlər.
Yeni körpənin dünyaya gəlməsi, şəhidimizin xatirəsinin əbədi yaşadılacağı bir rəmz kimi dəyərləndirilir. Bu hadisə bir daha göstərir ki, Vətən müharibəsinin qəhrəmanları yalnız keçmişin deyil, həm də gələcəyin ilham mənbəyidir.
Musavat.com bildirir ki, şəhid Yusifin qardaşının adı da açıqlanıb - Nəsib Ələsgərov.
Adı ilə, atalı - analı böyüsün.
Video görüntüləri təqdim edirik.
Musavat.com
XƏBƏR LENTİ
07 Yanvar 2025
ŞƏRHLƏRŞƏRH YAZ