Onlayn ictimai-siyasi qəzet
Rusiyada poçt sistemi çökür: maaş azlığı səbəbindən işçilər kütləvi şəkildə çıxır, şöbələr bağlanır
Rusiya Federasiyasında sosial-iqtisadi gərginlik daha bir sahədə — milli poçt sistemində böhrana səbəb olub. “Rusiya Poçtu”nun əməkdaşları aşağı maaşlara və ağır iş şəraitinə etiraz olaraq kütləvi şəkildə işdən çıxmağa başlayıblar. Nəticədə bölgələrdə poçt şöbələrinin fəaliyyətində iflic vəziyyəti yaranır.
Musavat.com xəbər verir ki, bu barədə ölkənin bir neçə bölgəsindən narahatedici xəbərlər yayılıb.
Məsələn, Perm vilayətinin Dobryanka şəhərində — təxminən 28 min əhalisi olan bir yaşayış məntəqəsində — yeganə poçt şöbəsi artıq gündə cəmi 4 saat işləyir. Səbəb isə yetərincə əməkdaşın qalmamasıdır. Yerli sakinlər sosial ödənişləri, pensiyaları və göndərişləri vaxtında ala bilmədiklərindən narazılıq içindədirlər.
Daha ciddi vəziyyət isə Başqırdıstan Respublikasında yaşanır. “Rusiya Poçtu”nun regional ofisinin direktoru Lenard Şafikovun sözlərinə görə, bölgədəki 15 rayonlararası poçt şöbəsindən yalnız 5–6-sı fəaliyyətini davam etdirəcək. Bu isə poçt xidmətlərində real kollaps deməkdir.
“Maaşlar o qədər aşağıdır ki, artıq vakansiyalara heç kim müraciət etmir. İşçi tapmaq mümkün deyil,” – deyə Şafikov açıq şəkildə etiraf edib.
Ekspertlər bildirirlər ki, mərkəzdən uzaq bölgələrdə bu tendensiyanın davam etməsi ölkədə poçt sisteminin tam çöküşünə gətirib çıxara bilər. Çünki bu xidmət təkcə məktub və bağlamaların çatdırılması deyil, həm də dövlət ödənişləri və sosial xidmətlərin əsas vasitəsidir.
Sosial şəbəkələrdə yayılan məlumatlara görə, bəzi bölgələrdə insanlar poçt şöbələrinə günlərlə yaxınlaşa bilmir, göndərişlər itir, pensiyalar gecikir.
Hazırda “Rusiya Poçtu” rəsmi səviyyədə bu problemə geniş şərh verməkdən çəkinir. Lakin bölgələrdən gələn xəbərlər göstərir ki, xalqın dözümü tükənmək üzrədir. Bəzi yerlərdə artıq təqaüdçülər və sosial təminat alanlar etiraz aksiyalarına hazırlaşırlar.
İctimaiyyətin gözləntisi odur ki, hökumət işçi maaşlarını artırmadan və sistemə real islahatlar aparmadan bu böhranın qarşısını ala bilməyəcək.
Musavat.com
XƏBƏR LENTİ
27 Iyun 2025
26 Iyun 2025
ŞƏRHLƏRŞƏRH YAZ