Onlayn ictimai-siyasi qəzet
Rumıniyada Azərbaycanla bağlı MÖHTƏŞƏM tədbir: Müstəqillik Günü belə qeyd edildi
30 mayda ölkəmizin Rumıniyadakı Səfirliyinin təşkilatçılığı ilə paytaxt Buxarestdə 28 may - Müstəqillik Gününə həsr olunmuş 500 nəfərlik təntənəli tədbir keçirilib.
Bu barədə Musavat.com-a Azərbaycan Respublikasının Rumıniyadakı Səfirliyinin Mətbuat Xidmətindən məlumat verilib.
Tədbirdə Rumıniyanın dövlət xadimləri, hökumət nümayəndələri, deputatlar, ictimai-siyasi xadimləri, Rumıniyada akkreditə olunmuş diplomatik missiyaların rəhbərləri, elm və mədəniyyət nümayəndələri, yerli KİV rəhbərləri, bu ölkədə təhsil alan azərbaycanlı tələbələr, eləcə də həmvətənlərimiz iştirak edib.
Tədbirin əvvəlində Azərbaycan Respublikasının və Rumıniyanın Dövlət himnləri səsləndirilib.
Daha sonra, səfir Qüdsi Osmanov giriş nitqi ilə çıxış edərək 1918-ci ildə yaradılmış Azərbaycan Xalq Cümhuriyyətinin tarixindən söz açıb, XX əsrin sonunda xalqımızın müstəqilliyinə yenidən qovuşandan sonra ağır illərini xatırladıb və çətin siyasi-iqtisadi dövrdə xalqın çağırışı ilə hakimiyyətə qayıdan ümummilli lider Heydər Əliyevin dövlətçiliyimizin qorunmasında misilsiz xidmətlərindən danışıb. Səfir Ulu öndər Heydər Əliyevin kursunu davam edən Prezident İlham Əliyevin uğurlu daxili və xarici siyasətinə toxunaraq, Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsi nəticəsində Azərbaycanın işğaldan azad olan ərazilərində miqyaslı bərpa və quruculuq işləri barədə tədbir iştirakçılarına məlumat verib. O, Azərbaycanda dünya miqyaslı siyasi, mədəni, idman sahələrində tədbirlərin keçirildiyini qeyd edib, bu ilin noyabr ayında Birləşmiş Millətlər Təşkilatının İqlim Dəyişikliyi Konfransı - COP-29 Azərbaycanda keçirilməsini bizim ölkəyə dünya ictimaiyyətinin etibarlığının bariz göstəricisi adlandırıb. Azərbaycanın regionda rolu və Avropa İttifaqı, o cümlədən Rumıniya ilə münasibətlərindən söz açan diplomat, Rumıniya Azərbaycan tərəfindən irəli sürülən bütün beynəlxalq və regional layihələrə, təşəbbüslərə dəstək göstərdiyini, ölkələrimiz arasında münasibətlərin qarşılıqlı dostluq və strateji əməkdaşlıq əsnasında davam etdiyini vurğulayıb. Həmçinin, səfir cari ilin 3 iyun tarixindən Bakı ilə Buxarest arasında AZAL şirkəti tərəfindən həyata keçiriləcək birbaşa aviareyslərin, xalqlarımızın bir başa təması üçün zəmin yaratdığını qeyd edib.
Rumıniyanın Xarici İşlər Nazirliyinin dövlət katibi Ana Kristina Tinka çıxışında Azərbaycan xalqını Müstəqillik günü münasibətilə təbrik edib, Rumıniyanın Cənubi Qafqazda davamlı sabitliyin, inkişafın və firavanlığın marağında olduğunu qeyd edib. O Azərbaycanın regionda mühüm rolunu vurğulayaraq, Azərbaycan ilə Aİ arasında davamlı, harmonik və balanslı dialoqun inkişafının Rumıniya tərəfindən dəstəkləndiyini bildirib. Bunun qarşılıqlı maraq doğuran miqyaslı layilərin təşviqi, eləcə də ortaq dəyərlərimizi həyata keçirmək üçün vacib məsələ adlandırıb.
Azərbaycan-Rumıniya parlamentlərarası əlaqələr üzrə işçi qrupunun rəhbəri Azay Quliyev çıxışında ölkəmizin regionda nüfuzu və rolundan söz açaraq, Cənubi Qafqazda ölkəmizin təşəbbüskarı olduğu irimiqyaslı enerji, nəqliyyat və infrastruktur layihələrindən danışıb. O, Azərbaycanı Aİ-nin güclü tərəfdaşı adlandırıb, bu xüsusda Rumıniya ilə münasibətlərin qarşılıqlı fayda, dostluq və strateji tərəfdaşlıq əsnasında qurulduğunu qeyd edib. Azərbaycanlı deputat həmçinin Azərbaycan ilə Rumıniya arasında parlamentlərarası əlaqələrə toxunaraq, keçən ilin oktyabrında Milli Məclisin sədri Sahibə Qafarovanın Rumıniyaya rəsmi səfərini xatırladıb.
"Ölkəmiz üçün builki Müstəqillik Günü xüsusilə əlamətdardır, çünki biz ilk dəfədir bu əlamətdar günü ərazi bütövlüyü və suverenliyi tam olaraq bərpa olunmuş Azərbaycanda böyük qürur hissi ilə keçiririk.
Prezident İlham Əliyevin rəhbərliyi ilə torpaqlarımız işğaldan azad olduqdan sonra Qarabağ və Şərqi Zəngəzurda “ağıllı və yaşıl” konsepsiya əsasında çox böyük yenifən qurma və quruculuq işləri həyata keçirilir. COP29 ev sahibliyi edəcək ölkə kimi Azərbaycan yaşıl keçidə çox böyül önəm verir" - A. Quliyev əlavə edib.
Daha sonra, tədbirdə Rumıniya opera ifaçısı, bir çox beynəlxalq müsabiqələrin iştirakçısı Ana-Mariya Lungunun ifasında rumıniya və azərbaycan musiqilərindən ibarət əsərlər səsləndirilib.
Tədbir çərçivəsində, Azərbaycanın işğaldan azad olunmuş ərazilərində miqyaslı bərpa və quruculuq işlərini, ölkəmizin inkişafını əks etdirən, eləcə də Rumıniya-Azərbaycan münasibətlərinə həsr edilmiş foto-şəkillərdən ibarət sərgi təşkil edilib. Sərgini izləyənlərə səfir və əməkdaşlar tərəfindən izahlı məlumat verilib.
Sonda ziyafət zamanı qonaqlara milli mətbəximizə məxsus təamlar təqdim edilib.
Tədbir Rumıniya KİV-də geniş işıqlandırılıb.
XƏBƏR LENTİ
25 Noyabr 2024
ŞƏRHLƏRŞƏRH YAZ