Onlayn ictimai-siyasi qəzet
Qazaxıstan Rusiya və Türkmənistanın “bazarına” girir
Qazaxıstan Çinə təbii qaz ixracını artırmaq üçün danışıqlar aparır.
Musavat.com Bloomberg-ə istinadən xəbər verir ki, ölkə bunun üçün yeni boru kəməri inşa etməyi planlaşdırır. Agentliyə görə, bu, Qazaxıstanı Türkmənistan və Rusiya ilə rəqabətə salacaq.
Qazaxıstanın milli qaz operatoru QazaqGaz-ın baş icraçı direktoru Sanjar Jarkeşov Bloomberg-ə deyib: "Çində iqtisadi artımın yavaşlaması ilə bağlı xəbərlərə baxmayaraq, qaza tələbat artmaqda davam edir. Biz Çinə və bəlkə də Özbəkistan kimi digər ölkələrə ixracı artırmaq üçün konsensusa nail olacağımıza ümid edirik”.
Bu gün Qazaxıstanın Çinə təbii qaz ixracı azdır: ildə 4 milyard kubmetr təşkil edir. Qazaxıstanın özü ildə 21 milyard kubmetr qaz istehlak edir. Bununla belə, ölkə əlavə gəlir əldə etmək üçün həm daxili təchizatı, həm də ixracı artırmaq istəyir. Təbii ki, əlavə gəlir əldə etmək üçün əsas bazar Çindir.
İxracın artırılması baxımından Qazaxıstan hasilatın artımını stimullaşdırmaq üçün Xəzər dənizində neft və qaz istehsalçıları ilə işləyir. QazaqGaz-dan Jarkeşov Bloomberg-ə bildirib ki, bunun üçün bir tədbir qazın qiymətinin yeni formuludur. Hökumət həmçinin Qətərli investorların köməyi ilə növbəti 5 il ərzində hasilatı ildə 3,5 milyard kubmetr artırmağı planlaşdırır.
Çinə ixracın artırılması üçün hazırda gücünün 70 faizi istifadə edilən mövcud boru kəmərindən əlavə yeni boru kəmərinin çəkilməsi tələb olunacaq. Jarkeşovun sözlərinə görə, yeni kəmərin dəyəri 3 milyard dollardan 6 milyard dollara qədər olacaq. Layihənin icrasına başlanıb-başlanmaması ilə bağlı qərar bu ilin sonunda veriləcək və tikinti iki-üç il çəkəcək.
Ötən il Çin gündəlik 16 milyard kubmetr mayeləşdirilmiş təbii qaz qəbul edərək ən böyük maye qaz idxalçısı olub. Boru kəməri qazı idxalı Asiya enerji mərkəzi üçün vacib alternativ qaz mənbəyidir, çünki tələb artmaqda davam edir.
Musavat.com
XƏBƏR LENTİ
21 Noyabr 2024
ŞƏRHLƏRŞƏRH YAZ