Onlayn ictimai-siyasi qəzet
Putin və Trampdan Yaxın Şərqdə gərginliyə dair TƏCİLİ DANIŞIQ
Musavat.com xəbər verir ki, Rusiya Prezidenti Vladimir Putin və ABŞ Prezidenti Donald Tramp arasında telefon danışığı baş tutub. Söhbət zamanı əsas müzakirə mövzusu Yaxın Şərqdə, xüsusilə də İsrail və İran arasında artan hərbi-siyasi gərginlik olub.
Kremlin yaydığı rəsmi açıqlamada bildirilir ki, Vladimir Putin bir gün əvvəl İran Prezidenti Məsud Pezeşkiyan və İsrail Baş naziri Benyamin Netanyahu ilə keçirdiyi telefon danışıqları barədə Trampa məlumat verib. Rusiya lideri İsrailin İrana qarşı həyata keçirdiyi son hərbi əməliyyatları qətiyyətlə pisləyib və bu addımların regionda daha böyük toqquşmalara yol aça biləcəyi ilə bağlı narahatlığını ifadə edib.
ABŞ tərəfi isə danışıqların nəticələrini şərh edərək bildirib ki, Prezident Tramp regiondakı vəziyyəti “narahatedici” adlandırıb. O, qeyd edib ki, ABŞ Tehranla nüvə sazişi üzrə danışıqları bərpa etməyə hazırdır və münaqişənin diplomatik yolla həllini dəstəkləyir. Tramp, eyni zamanda, Rusiya tərəfinin bu istiqamətdə vasitəçilik təşəbbüslərini diqqətlə izlədiklərini bildirib.
Sözügedən telefon danışığı G7 sammiti ərəfəsində baş tutub. Tərəflər həmçinin Ukraynada davam edən müharibə, Qara dəniz təhlükəsizliyi və qlobal enerji bazarındakı sabitlik məsələlərinə də toxunublar.
Qeyd edək ki, son günlərdə İsrailin İrana qarşı hərbi zərbələr endirməsi, Tehranın da cavab hücumları ilə müşayiət olunan hadisələr Yaxın Şərqdə təhlükəli eskalasiyaya səbəb olub. Bu kontekstdə Putin və Trampın telefon əlaqəsi beynəlxalq ictimaiyyət tərəfindən vacib diplomatik addım kimi qiymətləndirilir.
Musavat.com
XƏBƏR LENTİ
16 Iyun 2025
15 Iyun 2025
ŞƏRHLƏRŞƏRH YAZ