Onlayn ictimai-siyasi qəzet
Pekində Azərbaycan kitabına həsr olunmuş müzakirə keçirildi - FOTO
İyunun 19-da Pekin Beynəlxalq Kitab Sərgisinin təqdimat salonunda Azərbaycan kitab mədəniyyətinə həsr olunmuş “Sözün İpək Yolu: Azərbaycan Kitab Ekosistemi” adlı panel müzakirəsi keçirilib.
Musavat.com xəbər verir ki, tədbir Azərbaycan ədəbiyyatının beynəlxalq təqdimatı, nəşriyyat potensialı və Çin ilə mədəni əməkdaşlıq imkanlarına dair dəyərli fikir mübadiləsi ilə yadda qalıb.
Paneldə Azərbaycan Yazıçılar Birliyinin katibi, yazıçı Elçin Hüseynbəyli, şair və esseist Qismət, “Altun Kitab” nəşriyyatının direktoru Rafiq İsmayılov, “Təhsil” nəşriyyatının direktoru Tural Axundov, eləcə də Çin Şeiriyyat İnstitutunun katibi, şair Vanq Şan iştirak ediblər.
Müzakirə zamanı Azərbaycan ədəbiyyatının keçdiyi tarixi yol, müasir dövrdə kitabların nəşrindəki dinamika, ədəbi tərcümələrin rolu və gənc oxucu auditoriyasına çıxış imkanları vurğulanıb. Spikerlər Azərbaycanın ədəbi irsinin Çində tanıdılması və qarşılıqlı nəşr təşəbbüslərinin genişləndirilməsi baxımından bu cür görüşlərin əhəmiyyətini önə çəkiblər.
Tədbirdə həmçinin Azərbaycan və Çin xalqlarının dostluğunda, mədəniyyətlərarası dialoqda kitabın körpü roluna toxunulub, gələcək əməkdaşlıqlara dair təkliflər səsləndirilib.
Panelin sonunda iştirakçılar auditoriyanın suallarını cavablandırıb, qarşılıqlı maraq doğuran məsələlər ətrafında fikir mübadiləsi aparıblar.
Qeyd edək ki, tədbir Azərbaycan Respublikası Mədəniyyət Nazirliyi və Azərbaycan Respublikasının Çin Xalq Respublikasındakı Səfirliyinin birgə təşkilatçılığı ilə Pekin Beynəlxalq Kitab Sərgisi çərçivəsində baş tutub.
XƏBƏR LENTİ
19 Iyun 2025
ŞƏRHLƏRŞƏRH YAZ