Onlayn ictimai-siyasi qəzet
“Paşinyanın 44 günlük savaşdan sonra çoxlu sayda silahın itməsi haqda açıqlaması, əslində…”
“Qəribədir deyilmi, Ermənistanın “Pinaka” raket sisteminin təxminən 250 milyon dollar dəyərində olan yeni çoxlüləli modelinə maraq göstərdiyi haqda xəbərlər yayılar-yayılmaz bu ölkə ilə USAID arasında İnkişaf Qrantı Müqaviləsinə bir nömrəli düzəliş edildi. ABŞ Beynəlxalq İnkişaf Agentliyi (USAID) həmən düzəlişlə “Ermənistanın dəyişən ehtiyaclarına, o cümlədən ölkənin üzləşdiyi son çağırışlar və geosiyasi dəyişikliklərə uyğun olaraq” ona veriləcək qrantın həcmini 120 milyon dollardan 250 milyon dollara qaldırdı. Beləliklə “dəyişən ehtiyac” deyiləndə nə nəzərdə tutulduğu yəqin aydın oldu”.
Musavat.com bildirir ki, bu fikirlər deputat Sahib Alıyevə məxsusdur. Geosiyasi dəyişikliklərə gəldikdə, deputat qeyd edib ki, bu, məhz ABŞ-nin regionda bölücü xətlərin çəkilməsini və NATO bazasının Ermənistanda yerləşdirilməsini ön görən siyasətidir: “Son günlər sərhəddə baş verən gərginliklər, Azərbaycan ordusunun mövqelərinin atəşə tutulması da bununla bağlıdır. Baxın, bizim Müdafiə Nazirliyimiz mövqelərimizin yenə də atəşə tutulduğunu və cavab tədbiri görüldüyünü bildirir, qarşı tətəf isə qətiyyətlə bunu təkzib edərək sürətli sülh anlaşmasından dəm vurur. Həm də öz konstitusiyalarına dəyişiklik edərək Azərbaycana qarşı torpaq iddiası aradan qaldırılmayınca bunun mümkünsüzlüyünü bildikləri halda belə açıqlamalar səsləndirilir. Burada məqsədin nə olduğu elə həmən ABŞ-nin Avropa Birliyinin Ermənistandakı “mülki” müissiyasına qoşulmağı nəzərdən keçirdiyi haqda yayılan informasiyalardan da açıq-aydın görünmürmü? ABŞ “mülkiləri”, əslində isə keçmiş kəşfiyyatçıları -bilindiyi kimi, kəşfiyyatçının da keçmişi olmur-da Avropa Birliyinin oradakı bəlli kontingentinə qoşulduqdan sonra sərhəddə gərginliyin daha da artırılacağı və həmən mülkiləri qorumaq adı altında Ermənistana NATO qüvvələrinin yerləşdiriləcəyi tamamilə proqnozlaşdırılandır”.
S.Alıyev qeyd edib ki, keçirlən birgə hərbi təlimlərin ardından Birləşmiş Ştatların içi hərbi yük və təlimatçılarla dolu iki təyyərəsi ola bilsin ki, ötən ayın əvvəlində Ermənistana elə məhz buna hazırılıq görmək üçün göndərilmişdi:
“Onda da istər-istəməz aprelin 5-də Brüsseldə keçirilən üçlü görüş yada düşür. Məhz həmən görüşdən sonra ABŞ ilə Avropa Birliyinin Ermənistana maliyyə, hərbi-texniki, informasiya və diplomatiya dəstəkləri daha da artırıldı və regiona yanaşmada atdıqları bütün addımlar yüksək dərəcədə sinxronlaşdırıldı. Ona görə də əgər kim düşünürsə ki, USAID-in Ermənistana ayırdığı qrantın həcminin 2 dəfədən çox artırılmasıyla bağlı sənəd imzalanan gün Avropa Birliyinin İşgəncənin və Qeyri-insani, yaxud Ləyaqəti Alçaldan Rəftar və ya Cəzanın Qarşısının Alınması üzrə Komitənin (İQAK) 3 iyul tarixli ictimai bəyanatına istinad edərək Azərbaycanla bağlı tənqidi çıxışı etməsi, yaxud da haylar üçün yumşaq viza rejimi ilə bağlı danışıqların başladılması təsadüfdür, yumşaq desək, yanılır.
Bəli, nə o təsadüfdür, nə də ATƏT-in Demokratik Təsisatlar və İnsan Haqları Bürosunun monitorinq missiyasının Azərbaycanda sentyabrın birində keçirilmiş parlament seçkisi ilə bağlı hətta Rusiya Xarici İşlər Nazirliyinin sözçüsünün də, təzyiq xakterliliyini qeyd etdiyi mənfi rəyi. Həmən rəy peyda olar-olmaz ABŞ Dövlət Departamentinin sözçüsü Metyu Miller ona şərik çıxdıqlarını vurğuladı. Növbəti sinxronluğu görürsünüzmü? Doğrudanmı qərbdəki bəlli çevrələr Azərbaycanda demokratiyanın daha da möhkəmlənməsi üçün belə tənqidlərə yol verirlər, yoxsa həmən seçkilərin işğaldan qurtarılan torpaqlarımızda da, məsələn, Xankəndidə, Şuşada, Xocalıda və digər yerlərdə keçirilməsidir, onları buna vadar edən? Dünyada və regionda proseslərin gedişini az-çox izləyən hər bir azərbaycanlı bu sualın cavabını məndən də yaxşı bilir”.
Deputat bildirib ki, Ermənistanın baş naziri Nikol Paşinyanın 44 günlük savaşdan sonra çoxlu sayda silahın itməsi haqda açıqlaması da əslində qərbdəki bəlli çevrələrin planlaşdırdıqları "geosiyasi dəyişiklik"lərin tezliklə baş tutması üçün onların diqtəsi ilə səsləndirilir.
Musavat.com
XƏBƏR LENTİ
22 Noyabr 2024
21 Noyabr 2024
ŞƏRHLƏRŞƏRH YAZ