Onlayn ictimai-siyasi qəzet
Övladı ilə söhbəti müzakirələrə səbəb olan psixoloq: "Elə bilirlər ki..." - VİDEO
Tanınmış psixoloq Nizami Orucov sosial şəbəkə hesabında azyaşlı oğlu ilə hamiləlik barədə söhbətini əks etdirən videoya görə tənqid olunmasına münasibət bildirib.
Musavat.com xəbər verir ki, psixoloq Pravda.az-a açıqlamasında deyib ki, oğlu hamiləliklə bağlı sualı həmin video çəkilməzdən əvvəl "McDonald's"da olarkən ona verib.
"Qərara gəldim ki, video çəkib, həmin söhbəti təkrar edək. Oğlumun anası da daxil olmaqla, bəziləri elə bilirlər ki, qurma videodur. Guya uşağa öyrətmişəm ki, mənə belə bir sual versin. Normalda uşaqlar böyüdükcə onlarda dünyaya, aləmə, həyata, həyat proseslərinə maraq, "niyə?, nəyə görə?, necə?" sualları yaranır. Bu suallara cavab almaqla uşaqların dünyagörüşləri, bilikləri formalaşmağa başlayır. Əfsuslar olsun, bizim ölkəmizdə cahillik səbəbindən elə bilirlər ki, bu kimi şeylər uşağa tərbiyəsizliyi öyrətməkdir. Tərbiyəsizlik nədir? Bir qadının hamilə olmasıdırmı? Bir qadının hamiləliyinin necə baş verməsidirmi? Uşağın bu haqda sual verməsi, təbii olaraq maraqlanmasıdırmı? "O ayıbdır, bu ayıbdır, tərbiyəsizlikdir" deyə-deyə kor bir millət halına gəlmişik. Buna görə də yeniyetmələr və gənclər doğru-düzgün sağlam intim həyat yaşaya, ailə planlaşdırılmasını qura bilmirlər. Yəni məlumatlarda böyük boşluqlar var. Uşaq bu haqda soruşdu və mən uşağın yaşını nəzərə alaraq ona üstüörtülü şəkildə bir az cavab verdim. Hə, uşaq böyüdükcə 9-10, 11-12 yaşlarında ona müəyyən prosesləri, məsələn, sperma, qadının reproduktiv dövrü və s. barədə artıq daha açıq şəkildə izah etmək, detallı məlumatlar vermək olar. Bizdə insanlar cinsi, intim tərbiyəni, maarifləndirməni başqa şeylərlə səhv salırlar. Elə bilirlər ki, biz övladlarımıza pornoqrafiya və erotika barədə açıb danışırıq. Videoya yazılan bəzi şərhləri də oxudum. Təəssüf ki, insanlar yanlış şeyləri ayıb bilirlər. Biz gənc nəslə, əsasən də uşaqlara yaşlarına uyğun, onları maraqlandıran hər mövzuda cavab verməliyik. Uşaq hansı mövzu ilə maraqlanırsa, deməli, artıq onun beynində bununla bağlı sorğu var. Biz isə bu sorğuya uşağın yaşına uyğun doğru-düzgün cavab verməliyik ki, onun marağı ölməsin. Bunu deməklə uşaq gedib kimisə hamilə qoymayacaq, yaxud qız övladı hamilə qalmaq istəməyəcək. Sadəcə, uşaq maraqlanır. Bu isə o deməkdir ki, beyni artıq tələbat duyur və biz o tələbatı ödəməliyik", - o bildirib.
XƏBƏR LENTİ
28 Noyabr 2024
ŞƏRHLƏRŞƏRH YAZ