Onlayn ictimai-siyasi qəzet
Müsavat başqanlığına namizədi öldürəndən sonra tikə-tikə doğrayıblar - ŞOK CİNAYƏT DOSYESİ
Bakı Ağır Cinayətlər Məhkəməsində hakim Elmin Rüstəmovun sədrliyi ilə Müsavat Partiyasının fəalı, vaxtilə Müsavat başqanlığına namizəd olmuş Natiq Mehdinin qətlində ittiham olunan Elsevər İslamovun cinayət işi üzrə məhkəmənin hazırlıq iclası keçirilib.
İclasda müttəhimin anket məlumatları dəqiqləşdirilib. Bundan sonra dövlət ittihamçısı ittiham aktını elan edib.
Hakim Elsevər İslamovu ittiham olunduğu maddələr üzrə 15 ildən 20 ilədək və yaxud ömürlük azadlıqdan məhrum edilə biləcəyi ilə bağlı məlumatlandırıb. Təqsirləndirilən şəxs özünü ittiham üzrə qismən təqsirli bilib.
Musavat.com xəbər verir ki, qanlı olay 2024-cü il mayın 14-də Bakının Xətai rayonu ərazisində yerləşən 55 saylı orta məktəbdə baş verib.
Baş Prokurorluğun yaydığı məlumata əsasən, 1966-cı il təvəllüdlü Elsevər Eldar oğlu İslamovun şəxsi münasibətlər zəminində iş yoldaşı Natiq Mehdini öldürməsinə və Xəzər rayonu ərazisində basdırmasına əsaslı şübhələr müəyyən edilib. Hadisəni törətməkdə şübhəli bilinən Elsevər İslamov Xətai rayonunda yerləşən 55 nömrəli məktəbin direktorunun təsərrüfat işləri üzrə müavini (təsərrüfat müdiri) olub.
İttihama görə, Elsevər İslamov Natiq Mehdi ilə mübahisə zamanı ona çoxsaylı yumruq və təpik zərbəsi endirdikdən sonra mətbəx bıçağı ilə də ağır zərbələr endirərək onu qətlə yetirməkdə şübhəli bilinib.
Təqsirləndirilən bundan sonra meyitin üzərində təhqiredici hərəkətlər edərək onun qol, ayaq və baş hissələrini kəsib ayırmaqla yanaşı, cinsiyyət orqanını da kəsərək, sellofan torbalara yığıb, Xəzər rayonunun ərazisində basdırıb.
Müsavat fəalı Natiq Mehdinin dəhşətli qətlindən sonra vəkil Nemət Kərimli mətbuata açıqlama verib demişdi ki, o, bir müddət əvvəl öz bacısına müraciət edərək çalışdığı 55 saylı orta məktəbdə direktor müavini Elsevər İslamov tərəfindən əsassız təzyiqlərə məruz qaldığını bildirib.
“Natiq Mehdi ali təhsilli olsa da, ixtisasına uyğun işlə təmin edilməyib, ona görə məktəbdə gözətçi işləyib. Xüsusən işlədiyi son dövrdə direktor müavini və idman müəllimi Elsevər İslamov tərəfindən əsassız təzyiqlərə məruz qalıb. Məsələn, “niyə masanı bura qoymusan”, yaxud “otaqda niyə kofe dəmləmisən” adı altında qısnamalar ilə üzləşib. Natiq Ulubəy öz bacısına bu təzyiqlərə görə yaxın günlərdə işdən çıxacağını deyibmiş. Halbuki, çox hövsələli, sakit adam olub” - deyə vəkil bildirib.
Elsevər İslamova gəlincə, o, direktor müavini olmaqla yanaşı, həm də idman müəllimi olub və aqressiv xarakteri ilə seçilib.
“Bir neçə dəfə valideynlər Elsevər İslamovun onların məktəbdə oxuyan övladlarını döyməsi ilə bağlı daxili yazışma qrupunda direktora şikayət ediblər” - deyə vəkil bildirib.
Lakin indi məlum olur ki, onun barəsində hər hansı bir tədbir görülməyib.
Qətlin bəsit motivi fonunda direktor müavininin göstərdiyi qəddarlıq isə xüsusilə dəhşətlidir. O iddia edib ki, gözətçini gecə yarısı iş yerində yatdığı üçün öldürüb:
“Hadisə baş verən gün Elsevər İslamov gecənin yarısı içkili vəziyyətdə məktəbə gəlib. Natiq iş yerində yatıbmış. Direktor müavini onun yatdığı yerdə şəklini çəkib və bu, Natiqin etirazına səbəb olub. Mübahisə başlayıb və direktor müavini başlayıb gözətçini döyməyə. Çox vəhşicəsinə döyüb, təpiyin altına salıb, başına, üzünə təpiklə vurub. Bütün bunlar təhlükəsizlik kamerasına düşüb. Natiq fiziki cəhətdən də zəif olduğu üçün özünü müdafiə edə bilməyib. Çox qəddarcasına döydükdən sonra da direktor müavininin ürəyi soyumayıb. Gedib, maşından bıçaq götürüb gəlib, bir də bıçaqla vurub”.
Vəkil bildirib ki, Natiq Mehdinin bıçaqlanana qədər, yoxsa ondan sonra öldüyünü ekspertiza müəyyənləşdirəcək.
“Görünür, Natiqi öldürəndən sonra direktor müavini etdiyi cinayəti anlayıb. O, qəddarcasına cəsədi doğrayıb, sellofan paketlərə yığıb və maşının baqaj yerinə qoyub. Doğranmış cəsəd 3 gün maşında qalıb. Ondan sonra etdiyi cinayətin izini itirmək üçün cəsədi evinin yaxınlığındakı bir ağaclıqda basdırıb” - deyə Nemət Kərimli təfərrüatları açıqlayıb.
Qeyd edək ki, Elsevər İslamov həbs edilib, onun barəsində CM-in 120.2.4 - xüsusi amansızlıqla qəsdən adam öldürmə maddəsi ilə cinayət işi başlanıb.
Natiq Mehdi qətlindən bir həftə sonra Nardaran qəbiristanlığında dəfn edilib.
Proses oktyabrın 3-də davam etdiriləcək.
E.Məmmədəliyev,
Musavat.com
ƏLAQƏLİ XƏBƏRLƏR
XƏBƏR LENTİ
24 Sentyabr 2024
ŞƏRHLƏRŞƏRH YAZ