Onlayn ictimai-siyasi qəzet
Murad Arifin izdihamlı, coşğulu, ulduzlu gecəsindən FOTOLAR
Ötən gecə müğənni-bəstəkar Murad Arifin Heydər Əliyev Sarayında “3:0” adlı solo konserti baş tutub.
Musavat.com xəbər verir ki, Heydər Əliyev Sarayının qapıları açılan andan içəriyə tamaşaçı ordusu axın edib.
Sarayın dəhlizlərində foto çəkdirənlər, Murad Arifin mahnılarını zümzümə edənlər, dillərdə dolaşan hitlərini canlı dinləməyə gələn izləyicilərin coşğusu diqqət çəkib.
Gecəyə xüsusi hazırlaşan müğənni konsertdən öncə media nümayəndələrinin suallarını cavablayıb:
“Həyəcanlı, sürprizli, bol əyləncəli bir konsert olacaq. Aylardır hazırlaşıram. 200 nəfərlik komanda hazırlaşıb. 20 hit manhnı səsləndirəcəyəm. Hazırlıqlar dövründə səhnəni bölüşəcəyim ulduzları açıqlamadım ki, sırf biletləri Muradsevərlər alsın. İndi açıqlaya bilərəm.
Xalq artisti Röya Ayxanla iki duetimiz olacaq. Reper Ramil Nabranla da səhnəni bölüşəcəyik. Bu gecə həm əylənəcəyik, həm kövrələcəyik”.
“Bakı gözyaşlarına inanmır” mahnısı ilə konsertə start verən sənətçi gecəyə qəmgin notlarla başlayıb. Murad Arif aylardır 200 nəfərlə hazırlaşdığı konsertin ssenarisində dəyişiklik edib.
Qonaqları salamlayan HITMAKER konsertində 2 gün əvvəl vəfat edən Əməkdar artist Cabir İmanovun ailəsinə başsağlığı verib. O, həmçinin millət vəkili Qənirə Paşayeva, Aygün Bəylər, Rəhim Rəhimli, Oqtay Əliyev və Azər Baxşəliyevin də adlarını çəkərək onların xatirəsini ehtiramla anıb.
“Biz eyni sahənin adamlarıyıq. Onun ailəsinə başsağlığı veririk. Hər konsertində cana yaxın dostlarını xatırlayırsan. Bu gün Rəhim Rəhimlinin öldüyü gündür. Bu gün konsertimdə Əməkdar mədəniyyət xadimi Oqtay Əliyev olmalı idi, gənc dostumuz Azər Baxşəliyev olmalı idi. Amma o qrimi edib paltarı geyinib artist olmalısan. Növbəti mahnımı həyatımızda yeri görülən adamlara həsr edirəm. Onların yeri həmişə görünəcək”, - Murad Arif öz vəfa borcunu yerinə yetirib.
Müğənninin sənət dostlarından danışarkən kövrəlməsi diqqətdən qaçmayıb.
Gecədə duet ortaqları da Muradı tək qoymayıb və səhnəyə Xalq artisti Röya Ayxan çıxıb. Murad Arif onunla sevilən hitlərdən olan “Ona nə var ki…” adlı mahnını ifa edib. Həmkarların ifası tamaşaçılar tərəfindən rəğbətlə qarşılanıb.
Murad bildirib ki, Röyaya yeni hit təqdim edib və sözügedən mahnı Röya Ayxanın konsertində səslənəcək.
Konsert sosial mesajlarsız da ötüşməyib. “Qızım” mahnısını səsləndirmədən öncə sənətçi selektiv abortlara diqqət çəkib. O, atalara səslənərək qızlarını xüsusi qayğı ilə sevmələrini istəyib:
“Hələ də selektiv abortlar yaralı yerimizdir. Heç bir qadın cinsiyyətinə görə övladını tələf etmir. Adətən atalar qız övladı deyil, oğlul istəyirlər. Selektiv abortların artmasına səbəb budur. Atalar, gəlin, qızlarımızı çox sevək. Onların daim bizim sevgimizə ehtiyacı var”.
Daha sonra “Oğlum” mahnısını ifa edən ulduz oğluna sevgisini də bildirib.
“Dondurma”, “Mənə sən lazımsan”, “Tufan”, “Oppalara”, “Yalnız səni gözlədim”, “Saçların”, “Partlat!” mahnılarını ard-arda ifa edən sənətçi səhnəni reper Ramil Nabranla bölüşüb.
Konsert zamanı iki kostyum dəyişən HITMAKER geyimlərinin özəl olaraq onun üçün hazırlandığını, svarovski daşlarla bəzədildiyini, hətta konsertə görə 5 kilo çəki itirdiyi deyib.
Anşlaq və alqışlarla keçən konsertin sonunda tamaşaçılar Murad Arifi zaldan buraxmaq istəməyib. Saray alqış sədaları ilə çalxalanıb. Murad Arif həm musiqisi, həm verdiyi mesajlar, həm də səmimiyyəti ilə tamaşaçılarına unudulmaz bir axşam bəxş edib.
Könül İbrahim
Fotolar müəllifindir
Musavat.com
XƏBƏR LENTİ
01 Oktyabr 2025
ŞƏRHLƏRŞƏRH YAZ