Onlayn ictimai-siyasi qəzet
Moskvanın təkəbbürlü susqunluğu münaqişəni daha da alovlandırır
Azərbaycan parlamentinin deputatı Azər Bədamovun Rusiya tərəfindən deportasiyası ilə bağlı qalmaqal davam edir. Bədamov bu barədə ilk dəfə olaraq susqunluğunu pozaraq yerli KİV-ə açıqlama verib. O bildirib ki, 17–20 aprel tarixlərində Dağıstan Xalq Məclisinin 30 illik yubileyi münasibətilə keçirilən tədbirlərdə iştirak edib və 17 apreldə Rusiya sərhədindən problemsiz keçib.
Biz isə əlavə edək: həmin dövrə qədər Bədamovun Rusiya Dövlət Dumasının deputatı Vəluevin Azərbaycana qarşı təhqiramiz fikirlərinə verdiyi cavab ictimaiyyətə bəlli idi. Bundan başqa, deputatın sözlərinə görə, Rusiya hakimiyyəti hələ də onun hansı fikirlərini “rusofobik” sayaraq ölkəyə girişini yasaqladığını izah etməyib.
Bədamov vurğulayıb:
“Azərbaycan–Rusiya parlamentlərarası əlaqələr üzrə işçi qrupun üzvü kimi hər zaman bu münasibətlərin inkişafına pozitiv yanaşmışam və daim bu istiqamətdə təkliflər vermişəm. Mən heç vaxt anti-Rusiya mövqeyində olmamışam. Sadəcə olaraq, Azərbaycan xalqını təhqir etmiş deputata cavab verdim. Ona görə də deportasiyamla bağlı göstərilən səbəblər tamamilə əsassızdır.”
O daha sonra diqqətçəkən bir çağırış edib:
“Rusiya Xarici İşlər Nazirliyi bu məsələyə münasibət bildirməli və baş verənlərlə bağlı obyektiv, dürüst izahat verməlidir.”
Bədamov əlavə edib ki, əgər Rusiya tərəfi bu qərarın səhv olduğunu etiraf etsə, o zaman işçi qrupdakı fəaliyyətini davam etdirəcək. Əks halda, orada qalmaq mümkün olmayacaq. Bu isə artıq sırf “deputatın şəxsi qərarı” və ya “Azərbaycanın daxili məsələsi” deyil, aydın siyasi mesaj və diplomatik demarşdır.
Siyasi proseslərin məntiqini bilənlər qeyd edir ki, belə qalmaqallar bir müddət sonra unudula bilər. Lakin Azər Bədamovun Rusiya ərazisindən deportasiyası bu kateqoriyaya aid deyil. Burada rəsmi Moskvanın susqunluğu qızıl deyil, əksinə, birbaşa Kremlin əleyhinə işləyir. Əgər Rusiya tərəfi Azərbaycanın qanuni etirazlarını və haqlı suallarını nəzərə almırsa, bu, ikitərəfli münasibətlərin və “müttəfiqlik qarşılıqlı fəaliyyətinin” inkişafına heç bir fayda vermir.
Moskvanın “səssiz qal, unudular” taktikası
“Minval” daha əvvəl xəbər vermişdi ki, Azərbaycan hər ay Rusiya tərəfinə sorğu göndərərək Rusiya hava hücum qüvvələrinin vurduğu Azərbaycan sərnişin təyyarəsi ilə bağlı istintaqın gedişini soruşur. Lakin Moskva bürokratik bəhanələrlə bu işi uzadır. İndiyə qədər nə bir nəfər saxlanılıb, nə də məsuliyyətə cəlb olunub.
Eyni yanaşma Şuşaya atılan “İskəndər-M” raketi məsələsində də müşahidə olunub – heç bir hüquqi qiymət verilməyib. 44 günlük müharibə zamanı Rusiyadan Ermənistana “humanitar yardım” adı ilə silah göndərilməsi, erməni diasporunun bu silahı maliyyələşdirməsi, eləcə də Rusiyada Azərbaycanla döyüşmək üçün muzdluların cəlb olunması cəhdləri – bütün bunlar cavabsız qalıb. Bu siyahını sonsuzadək davam etdirmək olar.
Kremlin mesajı nədir?
Bəziləri bu məsələlərə bürokratik çətinliklər və ya koordinasiya problemi kimi izahlar tapmağa çalışır. Amma problem təkcə texniki deyil, Kreml davranışında təkəbbürlü dövlətçilik hiss olunur:
“Səs-küy salacaqlar, sonra sakitləşəcəklər.”
Bir tərəfdən Azərbaycan deputatı uydurma səbəblərlə ölkədən deportasiya edilir, digər tərəfdən “mənbələr” Kremlin Azərbaycanla müttəfiqliyi möhkəmləndirmək niyyətindən danışır. Bu, açıq şəkildə təhqiredici və “biz istədiyimizi edəcəyik, siz isə susun və Moskva Bəyannaməsinə sadiq qalın” mesajıdır.
Bakı unutmur və strateji düşünür
Belə qalmaqalların yadda qalmadığını, xüsusilə Azərbaycanın bu situasiyaları təhlil edib nəticə çıxardığını və uzunmüddətli strategiyalar qurduğunu nəzərə almaq lazımdır. Belə olan halda, vaxt bu məsələdə Kreml əleyhinə işləyir.
Azərbaycan tərəfi susmur və gözləyir – amma cavab verəcək.
Məqalənin rus dilindəki orijonalı: https://minval.az/news/124462848
Nurani Qasımova, şərhçi – Minval.az
XƏBƏR LENTİ
08 May 2025
ŞƏRHLƏRŞƏRH YAZ