Onlayn ictimai-siyasi qəzet
Mərhum millət vəkili Qənirə Paşayeva Amsterdamda anıldı - FOTOLAR
Türk dünyasının könlünü fəth edən Qənirə Paşayeva 10 dekabr Dünya İnsan Haqları Günü çərçivəsində Amsterdamda təşkil edilən proqramla anılıb.
Musavat.com xəbər verir ki, proqram Türk Əsri Baxışını və Türk Dövlətləri Təşkilatının sivil sahədə fəlsəfəsini təzahür etdirən Avrasiya Vətəndaş Cəmiyyəti Forumu tərəfindən həyata keçirilib.
Proqram bütün şəhidlərimizin bir dəqiqəlik sükutla yad edilməsi və Qurani-Kərim tilavəti ilə başlayıb. Avrasiya Vətəndaş Cəmiyyəti Forumunun təşkilatçılığı ilə keçirilən 15-ci Avrasiya Amsterdam Görüşlərində Türk dünyasının öndə gedən qadın natiqlərindən biri, şair, ədəbiyyat adamı olan azərbaycanlı millət vəkili Qənirə Paşayevanın xatirəsini yaşatmaq məqsədilə anma proqramı keçirilib.
Türk dünyasının qəlbində yer tutan, inancını və ideallarını özünə şüar edən Türk dünyasının natiq və igid qızı bu il vəfatının 3-cü ayında təşkil edilən Avrasiya Amsterdam Görüşlərinin seçilmiş mövzusu olub. Avrasiya Yazarlar Birliyi, Hollandiya Türk Evi Cəmiyyəti, Hollandiya Azərbaycan Türk Kültür Dərnəyi, Hollandiya Şərqi Türküstan Uyğur Dərnəyi, Hollandiya Noqay Fondu və EkoAvrasiya Dərnəyi kimi mühüm təşkilatlar Amsterdam Toplantılarında bir araya gəlib.
Bu forum Təbrizdən Bakıya, Daşkənddən İstanbula qədər uzanan geniş bir coğrafiyada Türk dünyasını uğurla təmsil edən və bu xüsusi anım proqramını daha da mənalı edən Qənirə Paşayevanın xatirəsini yaşatmaq məqsədi daşıyır. Onu xatırlamaq təkcə keçmişin xatirələrini yada salmaq deyil, həm də öz kökündə daşıdığı ideyaları həyata keçirmək, onun izi ilə getmək deməkdir. Onun irsi Türk davasını daim yaşatmağa davam edəcək.
Anım mərasimi Emel Aktanın Hollandiyadakı noqay türkləri haqqında təqdimatı, bir dəqiqəlik sükutla və Türkevi Hollandiya Cəmiyyətindən Veyis Güngörün İstiqlal Marşının ardınca açılış nitqi ilə başlayıb.
Veyis Güngör Azərbaycanın Haaqadakı səfirliyinin müşaviri Nurlan Əliyevi, səfirliyin birinci katibi Vüsal İbrahimovu, “Müsiad Niderland”ın vitse-prezidenti Ali Topalı və QHT-ləri, media nümayəndələrini və proqramda iştirak edən bütün qonaqları salamlayıb, Qənirə Paşayevanın verdiyi mühüm töhfələri xatırladıb.
V.Güngör “Avrasiya Vətəndaş Cəmiyyəti Forumu mahiyyətcə Türkiyə Əsr Baxışının və Türk Dövlətləri Təşkilatının sivil sahədəki fəlsəfəsinin ən konkret təzahürüdür. 2011-ci ildən həyata keçirilən proqramlar Türk zehni layihəsinin məhsuludur”, - deyə bildirib.
Q.Paşayevanın Hollandiyanın siyasi paytaxtı Haaqada keçirilən “Qarabağ simpoziumu”nda dediyi sözlər də emosional xatirə kimi yadda qalıb: “Allah Qarabağın düşmən işğalından azad olunmasını görmədən ölməyimə icazə verməsin”.
Bu sözlər Q.Paşayevanın vətən sevgisi, azadlıq idealı ilə dolu şəxsiyyətini bir daha vurğulayıb.
Proqramda Hollandiyada yaşayan, Azərbaycanın xalq şairlərindən Əhməd Cavadın qohumu, eyni zamanda “Çırpınırdı Karadeniz” şeirini yazan Ramin Məmmədov da təbrik nitqi ilə çıxış edib.
Daha sonra Hollandiya Azərbaycan Türk Kültür Dərnəyinin sədri İlhan Aşkın mərhum Qənirə Paşayeva ilə bağlı xatirələrini bölüşüb. İ.Aşkın Q.Paşeyevanın Türk Dünyası üçün etdiklərini xüsusi vurğulayıb.
Proqram zamanı Qənirə xanımın həyatından bəhs edən təsirli təqdimatlar və sənədli filmlər təqdim olunub.
Əbdürrəhman Ünal və Hilal Dorukun oxuduğu Ahıska və Türkiyə şeirləri qonaqlar tərəfindən coşqu ilə alqışlanıb.
Proqramda vidalaşmazdan əvvəl Qənirə Paşayevanın xatirəsinə Türk dünyasına aid yeməklər təqdim edilib, mərhumun xatirəsinə dualar oxunub. Hollandiya Noqay Vəqfinin rəhbəri Orxan Dəmirçinin nəvələrinin noqay türklərinin geyimində zalda olması və iştirakçıların bu uşaqlarla xatirə fotoları çəkdirmək üçün növbəyə düzülməsi də diqqət çəkib.
Musavat.com
XƏBƏR LENTİ
22 Noyabr 2024
ŞƏRHLƏRŞƏRH YAZ