Onlayn ictimai-siyasi qəzet
Londondan Tehrana sərt xəbərdarlıq: “İranın nüvə silahı hazırlamasına icazə verilməyəcək”
ABŞ-ın İranın nüvə obyektlərinə endirdiyi hava zərbələrinə ilk dəstək verən liderlərdən biri Böyük Britaniyanın Baş naziri Kir Starmer olub.
Musavat.com xəbər verir ki, o, sosial şəbəkə platforması X-də (əvvəlki Twitter) paylaşdığı bəyanatında Vaşinqtonun addımını “təhlükənin neytrallaşdırılması yönündə atılmış haqlı müdaxilə” kimi qiymətləndirib.
“İranın nüvə proqramı beynəlxalq təhlükəsizlik üçün ciddi təhdiddir. Heç vaxt İranın nüvə silahı hazırlamasına icazə verilməyəcək. ABŞ bu təhdidi azaltmaq üçün tədbir görüb,” – deyə Starmer bildirib.
Baş nazir əlavə edib ki, Yaxın Şərqdə vəziyyət son dərəcə gərgin və qeyri-sabit olaraq qalır və bu regionda sabitlik təmin olunmalıdır. O, Tehranı danışıqlar masasına qayıtmağa çağırıb:
“Biz İranı danışıqlara geri dönməyə və böhrana son qoymaq üçün diplomatik həll yoluna üstünlük verməyə çağırırıq. Regionda sabitliyin bərpası birinci dərəcəli prioritetdir".
Britaniyadan Vaşinqtona güclü siyasi dəstək
Kir Starmerin bu açıqlaması Böyük Britaniyanın ABŞ-la həmrəyliyini və İranın nüvə ambisiyalarına qarşı vahid Qərb cəbhəsinin formalaşdığını göstərir. Rəsmi London uzun illərdir İranın nüvə proqramı ilə bağlı narahatlığını ifadə edir və 2015-ci il nüvə sazişinin bərpasına tərəfdar olsa da, Tehranı bir sıra müddəaları pozmaqda ittiham edir.
Hazırkı mərhələdə Starmerin ABŞ-ın hərbi müdaxiləsinə açıq dəstəyi, həmçinin İranla diplomatik həll üçün çağırışı beynəlxalq ictimaiyyətə balanslı mesaj kimi təqdim olunur: bir tərəfdən sərt tədbirlərə anlayış, digər tərəfdən danışıqlara ümid.
Musavat.com
XƏBƏR LENTİ
22 Iyun 2025
ŞƏRHLƏRŞƏRH YAZ