Onlayn ictimai-siyasi qəzet
İsrail ordusu İranın ballistik raket hücumuna cavab hazırlayır: "AĞIR OLACAQ..."
“The Times of Israel” nəşri yazır ki, İsrail ordusu çərşənbə axşamı İran tərəfindən həyata keçirilən ballistik raket hücumuna ciddi cavab verməyi planlaşdırır və şənbə günü bu cavabın “ağır və ciddi” olacağı barədə xəbərdarlıq edib. Nəşr yazır ki, hərbi əməliyyat planı, baş nazir Benyamin Netanyahu və müdafiə naziri Yoav Gallant tərəfindən təsdiqlənməlidir.
ABŞ prezidenti Co Bayden cümə günü verdiyi açıqlamada İsrailin hələ İranın ballistik hücumuna necə cavab verəcəyinə qərar vermədiyini bildirib. Lakin o, İsrailə İranın neft obyektlərinə zərbə vurmaqdan çəkinməyi məsləhət görüb: “Mən İsrailin yerində olsaydım, neft yataqlarına zərbə endirmək əvəzinə digər alternativlər barədə düşünərdim.”
Bayden, həmçinin İsrailin İranın nüvə obyektlərini hədəf almasına qarşı olduğunu bir daha vurğulayıb. Əksinə, keçmiş prezident Donald Tramp isə İsrailə İranın nüvə obyektlərinə zərbə endirməyi tövsiyə edib və bu addımın prioritet olmasını müdafiə edib.
“The Times of Israel” yazır ki, İran Yaxın Şərqdə yaranmış gərginliyin azaldılması üçün çağırış edib və hərbi əməliyyatların qarşısının alınmasını istəyir.
Musavat.com-a görə, görünən odur ki, İsrail və İran arasında hərbi qarşıdurma riski artır. Bu cür gərginliklər bölgədə, o cümlədən Azərbaycan üçün də müəyyən təhlükələr yarada bilər. Azərbaycanın, mövcud vəziyyətə uyğun strategiya tətbiq edəcəyi gözlənilir. Məlumatlara görə, ABŞ-da bir aydan sonra keçiriləcək prezident seçkiləri də regiondakı proseslərin xarakterinə təsir göstərə bilər. Donald Trampın yenidən prezident seçilməsi, İran üçün ciddi nəticələr doğura bilər, çünki Tramp İsrailə güclü dəstək verən bir siyasətçidir. O, həmçinin, Rusiya-Ukrayna müharibəsini bitirmək vədi ilə ABŞ seçicilərinin dəstəyini qazanmağa çalışır. Bu faktor onun seçilmək şansını artırır.
Musavat.com
XƏBƏR LENTİ
25 Noyabr 2024
24 Noyabr 2024
ŞƏRHLƏRŞƏRH YAZ