Onlayn ictimai-siyasi qəzet
İcra başçısının sabiq müavininə elektron qolbaq taxıldı
Zərdabın icra başçısının sabiq müavini Əyyub Əzizovun məhkəmə prosesi başa çatıb.
Cinayət Məcəlləsinin 188.3-cü maddəsi ilə təqsirli bilinən sabiq məmurun azadlığı üç il müddətinə məhdudlaşdırılıb.
Elektron qolbağa məhkum edilən Əzizov torpaq üzərində mülkiyyət, istifadə və ya icarə hüququnu pozub.
Belə ki, onun Zərdab rayonu Çallı kəndi ərazisində təqribən 186 hektar torpaq sahəsi olub. Təqsirləndirilən şəxs həmin torpaq sahələrində həm özü əkin işləri görüb, həm də başqa şəxslərə icarəyə verib. Əyyub Əzizov özünə məxsus 186 hektar torpaq sahəsi ilə kifayətlənməyərək, Çallı kənd bələdiyyəsinə məxsus torpaq sahələrində də şumlama və əkin işləri aparıb. Söhbət əvvəllər həmin kənd sakini İlqar Bünyatova icarəyə verilmiş 4.21 hektar torpaq sahəsindən gedir.
Məsələ burasındadır ki, İlqar Bünyatovun daha sonra kənd bələdiyyəsi ilə müqaviləsi başa çatıb və həmin torpaq sahəsi kənd sakinləri üçün örüş yeri olaraq ayrılıb. Ancaq Əyyub Əzizov həmin torpaq sahəsinin İlqar Bünyatov tərəfindən təhvil verildiyini görərək sahəni iki il özbaşına becərib və əkib. Nəhayət, 2023-cü ildə yenidən həmin torpaq sahəsini şumlamaq və arpa əkmək istəyərkən onun bu əməli kənd sakinləri və hüquq-mühafizə orqanları tərəfindən dayandırılıb.
Qeyd edək ki, Əyyub Əzizov həm də 2010-2015-ci illərdə Çallı bələdiyyəsinin sədri vəzifəsində çalışıb.//Qafqazinfo
XƏBƏR LENTİ
25 Noyabr 2024
ŞƏRHLƏRŞƏRH YAZ