Onlayn ictimai-siyasi qəzet
Ermənistanın xaçlı səlib anonsu - Bakıdan sərt reaksiya
Ermənistan Azərbaycanla sərhəddə üzərində səlibçi xaçı əks olunan dövlət bayrağı qaldırıb. Bəllidir ki, Ermənistanın dövlət bayrağı üzərində xaç təsviri yoxdur. Belə görünür ki, Ermənistan Azərbaycana qarşı səlibçi niyyətini ifadə etmək üçün dövlət bayrağı üzərində dəyişiklik etmək qərarına gəlib. (APA)
Səlib (xaçlı) yürüşlərini simvolizə edən xaç elementini bayrağın üzərinə əlavə edib, Azərbaycanla sərhəddə qaldıran Ermənistanın hansı məqsədlər güddüyü bu addımından aydın görünür.
Səlib (xaçlı) yürüşlərini simvolizə edən xaç elementini bayrağı üzərinə əlavə edib, Azərbaycanla şərti sərhəddə qaldıran Ermənistanın bu davranışı nə anlama gəlir? Bakının reaksiyası nədir?
\
Elman Nəsirov
Deputat Elman Nəsirov “Yeni Müsavat”a bildirdi ki, Ermənistanın ali siyasi, hərbi rəhbərliyi ikibaşlı və ikiüzlü oyununu oynamaqda davam edir: “Bir yandan Ermənistanın baş naziri Nikol Paşinyan Müstəqil Dövlətlər Birliyi Dövlət Başçıları Şurasının Moskvada keçirilən toplantısında ölkəsinin hətta oktyabr ayı ərzində Azərbaycanla sülh müqaviləsi imzalamağa hazır olduğunu bəyan edir, ölkənin prezidenti Vaaqn Xaçaturyan COP29-a qədər Ermənistanın Azərbaycanla sülh müqaviləsi imzalamağa hazır olduğu anonsunu verir, bir yandan da Ermənistan dövləti Azərbaycanla sərhəddə üzərində səlibçi xaçı əks olunan dövlət bayrağı qaldırır. Halbuki Ermənistanın dövlət bayrağı üzərində heç bir xaç təsviri yoxdur. Onda sual yaranır ki, məhz Azərbaycanla şərti sərhəddə səlib yürüşlərini simvolizə edən xaç elementinin bayrağın üzərinə əlavə edilməsində məqsəd nədir. Mənə belə gəlir ki, bu sualın cavabını tapmaq üçün uzun xəyallara dalmağa ehtiyac yoxdur. Burada çox ciddi mesaj var. Səlibçilərin yürüşünün hansı effekti doğurduğunu nəzərə alıb Azərbaycana belə hədələyici mesaj ötürmək istəyirlər. Azərbaycanla əzələ dilində danışmaq istədiklərinin ən azı fonunu yaradırlar. Bir tərəfdən sülh göyərçini rolunda özünü təqdim edib, digər tərəfdən isə qırğı kimi davranış irəli sürmək istəyirlər. Hesab edirəm bütün bunlar nəticə etibarilə Ermənistanın sülh prosesində səmimi olmadığının göstəricisidir. Nikol Paşinyanın bugünlərdə Fransaya etdiyi üç günlük səfər və bu səfər çərçivəsində Fransanın prezidenti Emmanuel Makronla Yelisey sarayı önündə qucaqlaşmalar, onun tirajlanması, eyni zamanda Ermənistanın xarici işlər naziri Ararat Mirzoyanın Polşaya səfəri və burada təhlükəsizliklə bağlı forumda iştirakı, bu forum çərçivəsində Azərbaycana qarşı səsləndirdiyi ittihamlar, xüsusilə də guya Azərbaycanın sülh istəmədiyi, guya Azərbaycanın Ermənistana ərazi iddialarında olması kimi bəyanatlar verilməsi onu göstərir ki, Ermənistan əslində sülh müqaviləsi imzalamaq istəmir. Ermənistan Azərbaycana elə şərtlər irəli sürür ki, Azərbaycan dövlətinin onu qəbul etməsinin mümkün olmadığı öncədən bəllidir. Məsələn, Paşinyan sülh danışıqlarında 80 faiz məsələlərin razılaşdırıldığını deyir və dərhal da bu çərçivədə sülh müqaviləsi imzalamaq təklifi verir. Bəs onda 20 faizi mötərizəyə alıb nə zamana saxlayırsan, niyyətin nədir, gələcək nəsillərmi bununla məşğul olsun, yenə də gələcək münaqişə üçün əl yeri qoyursan?! Ermənistanın məhz 20 faiz məsələni gələcəyə saxlamaq təklifi sülh müqaviləsi imzalanmaması üçündür. Ermənistan siyasi riyakar hoqqabazlığını davam etdirir. Hoqqabazlığın və təxribatın biri də məhz dövlət bayrağının üzərinə səlib yürüşünü simvolizə edən xaç təsvirini yerləşdirib bayrağı Azərbaycanla şərti sərhəddə ucaltmasıdır. Ona görə də hadisələrin ən mürəkkəb ssenarilərdə inkişafına görə məsuliyyəti Ermənistanın üzərinə düşəcək və eyni zamanda onu himayə eləyən tərəflərin üzərində olacaq”.
İlyas Hüseynov
Sosial Tədqiqatlar Mərkəzinin sektor müdiri İlyas Hüseynov isə bildirdi ki, sosial şəbəkə seqmentində yayılan videoda Ermənistanın Azərbaycanla şərti sərhədində üzərində səlibçi xaç simvolu olan Ermənistan bayrağının qaldırıldığı açıq-aydın görünür. Bu cür addımlar yalnız regionda gərginliyi artırır, sülhə qarşıdır: "Ermənistan xristianlığı daim süni şəkildə təbliğ və istismar edib. Azərbaycana qarşı irəli sürüdüyü ərazi iddialarına xristianlıq elementləri qatmağa çalışıb. Birinci və ikinci Qarabağ müharibəsi zamanı da erməni əsgərlərinin, hərbi texnikalarının üzərində xaç işarələrinin çəkilməsinin şahidi olmuşuq. Bununla Ermənistan həm də dini müharibə rəyi formalaşdırmağa çalışırdılar. Bununla həm də sivilizasiyalararası müharibəyə cəhdlər həyata keçirilirdi. Lakin birinci Qarabağ müharibəsindən fərqli olaraq onlar İkinci Qarabağ müharibəsində öz istəklərinə nail ola bilmədilər. Bu məkrli niyyətləri fiaskoya uğradı. Çünki Azərbaycan öz həqiqətlərini dünya ictimaiyyətinin diqqətinə çatdıra bildi. Ermənistanın ənənəvi çirkin siyasəti hazırda da davam edir. Ermənistan öz xislətindən əl çəkmir, məkrli oyunlarından geri çəkilmir, regionda təhlükəsizliyə təhdid yaradır. Bu təhdidlərdən və oyunlardan biri də məhz Azərbaycanla şərti sərhəddə səlib yürüşlərini simvolizə edən xaçlı bayrağın qaldırılmasıdır. Bu cür addımlar heç bir nəticə verməsə də, Ermənistan haqqında aydın təsəvvürləri formalaşdırır. Ermənistan bununla sülhdə maraqlı olmadığını nümayiş etdirir, yenidən Azərbaycan torpaqlarını işğal etmək məqsədlərini ortaya qoyur. Ermənistanın Azərbaycanla sərhəddə təxribatlara hazırlaşdığının işartılarını görürük. Sanki geopolitik, böyük bir müharibənin axtarışındadırlar. Əgər hər hansı gərginlik olacaqsa, bunun məsuliyyəti Ermənistan rəhbərliyinin üzərinə düşəcək”.
Etibar SEYİDAĞA,
“Yeni Müsavat”
XƏBƏR LENTİ
24 Noyabr 2024
ŞƏRHLƏRŞƏRH YAZ