Onlayn ictimai-siyasi qəzet
Erməni əsilli İsveç deputatı haqlıdırmı? BİZİM ŞƏRH
İsveç parlamentinin erməni əsilli deputatı Arin Karapet Avropa İttifaqının Ermənistandakı müşahidə missiyasını müdafiə edərək, Azərbaycanın bu missiyaya qarşı haqlı narazılığını tənqid edib. O, Aİ müşahidəçilərinin sərhəddə olmasının Bakının Ermənistana təzyiq imkanlarını azaltdığını iddia edərək, bu missiyanın guya bölgədə sabitliyə xidmət etdiyini bildirib.
Lakin reallıq tamamilə fərqlidir. Avropa İttifaqı missiyası neytral müşahidəçi deyil, Ermənistanın maraqlarına xidmət edən və Azərbaycanla sülh prosesini pozmağa yönəlmiş siyasi bir alətdir. Bu missiyanın fəaliyyəti, əksinə, bölgədə gərginliyi artırır və Ermənistanın hərbi təxribatlarını daha da cəsarətləndirir.
Karapetin iddia etdiyinin əksinə, Avropa İttifaqı missiyası Azərbaycan-Ermənistan sərhədində sabitlik yaratmaq üçün deyil, İrəvanın yeni təxribatlarına zəmin hazırlamaq üçün yerləşdirilib. Ermənistan hakimiyyəti bu missiyadan istifadə edərək, sərhəddəki silahlanmasını və mövqelərini gücləndirmək üçün beynəlxalq dəstək qazanmağa çalışır. Missiyanın fəaliyyəti, əslində, Ermənistanın sülh prosesini pozmaq cəhdlərinin bir hissəsidir.
Azərbaycanın əsas narahatlığı ondan ibarətdir ki, Aİ missiyası sərhəddə faktiki olaraq casusluq fəaliyyəti aparır və toplanan məlumatlar Ermənistanın hərbi strategiyasına xidmət edir. Bakının bu missiyaya etirazı tam haqlıdır, çünki onun fəaliyyəti bölgədə uzunmüddətli sülhün əldə edilməsinə mane olur.
Aİ missiyası bölgədə sülh yox, qarşıdurma yaradır
Karapet Azərbaycanın Aİ missiyasını casusluqda ittiham etməsini əsassız adlandıraraq, missiyanın guya “sivil xarakter daşıdığını” bildirib. Lakin reallıqda bu missiyanın fəaliyyəti yalnız bir tərəfin – Ermənistanın təhlükəsizliyini təmin etmək üçün nəzərdə tutulub və Azərbaycan tərəfi tamamilə görməzdən gəlinir. Bu isə missiyanın beynəlxalq hüququ pozan birtərəfli mövqedə olduğunu açıq şəkildə göstərir.
Azərbaycan dəfələrlə bəyan edib ki, bölgədə davamlı sülhün əldə edilməsi üçün üçüncü tərəflərin müdaxiləsi deyil, birbaşa Bakı-İrəvan danışıqları və real öhdəliklərin yerinə yetirilməsi lazımdır. Aİ müşahidəçilərinin bölgədə qalması isə Ermənistanın manipulyasiya aləti olaraq istifadə edilir və sülh danışıqlarını ikinci plana atır.
Ermənistanın silahlanması sülhə deyil, yeni münaqişəyə aparır
Karapetin Ermənistanın silahlanmasının suveren hüquq olduğunu iddia etməsi də ciddi suallar doğurur. Əgər Ermənistan həqiqətən də sülh istəyirsə, niyə silahlanmaya milyardlarla dollar ayırır? Bu silahlar kimə qarşı istifadə olunacaq?
Azərbaycan öz ərazi bütövlüyünü tam bərpa edib və bölgədə yeni qarşıdurma yaratmaq istəmir. Lakin Ermənistanın qeyri-qanuni silahlanması və hərbi ritorikası yeni gərginliklərə səbəb ola bilər. Azərbaycan regionda qalıcı sülhün tərəfdarıdır, lakin bunun üçün Ermənistanın revanşist siyasətdən əl çəkməsi və Aİ missiyası kimi siyasi manipulyasiya alətlərindən imtina etməsi vacibdir.
Musavat.com
XƏBƏR LENTİ
03 Mart 2025
ŞƏRHLƏRŞƏRH YAZ