Onlayn ictimai-siyasi qəzet
Böyük zəfərin başlanğıcı - Aprel döyüşlərindən 9 il ötür
Dördgünlük müharibə 2020-ci ilin sentyabrında torpaqların işğaldan azad edilməsində həlledici rol oynadı
Azərbaycan Ordusunun parlaq tarixi qələbələrindən biri olan şanlı Aprel döyüşlərindən doqquz il ötür. Bu döyüşlər Vətən müharibəsinə aparan yolun mühüm mərhələsi kimi tarixə düşüb. 2016-cı ilin aprelində Azərbaycan Ordusu Ermənistan Silahlı Qüvvələrinin təxribatlarına layiqli cavab verdi və dördgünlük müharibə zamanı böyük uğurlar qazandı. Bu döyüşlər təkcə hərbi qələbə deyil, eyni zamanda xalqımızın milli ruhunun gücünü, birliyini və ordumuzun qüdrətini nümayiş etdirdi.
Xatılradaq ki, 2016-cı il aprelin 2-də Ermənistan Silahlı Qüvvələrinin təxribatlarına cavab olaraq, Azərbaycan Ordusu sürətli əks-hücum əməliyyatı ilə düşməni ağır məğlubiyyətə uğratdı, Füzuli, Cəbrayıl və Ağdərə rayonlarının işğal altındakı ərazilərinin 2000 hektardan çox hissəsini azad etdi. Həmçinin minlərlə hektar ərazi Azərbaycan Ordusunun tam nəzarətinə keçdi. Azərbaycan Ordusu dördgünlük Aprel döyüşləri ilə 23 ildən sonra xalqımıza qələbə sevinci yaşatdı.
Azərbaycan Ordusu Aprel zəfəri ilə Ermənistanın özü haqqında yaratdığı mifi darmadağın etmişdi. Döyüşlər zamanı hərbçilərimiz “Ohanyan müdafiə xətti”ni cəmi 20 dəqiqəyə yarmışdı.
Azərbaycan Aprel müharibəsində ən müasir silahlardan da istifadə etmişdi, bu isə Ermənistanı əməlli-başlı qorxudurdu. Belə ki, Azərbaycan döyüşlər zamanı “Harop” pilotsuz kamikadze aparatlarından, “cəhənnəm silahı” adlandırılan “TOS-1A” ağır odsaçan artilleriya sistemlərindən istifadə etmişdi.
Azərbaycan Ordusu Aprel döyüşlərində Lələtəpə yüksəkliyini, Talış yüksəkliyini və digər bir sıra mühüm strateji yüksəklikləri işğaldan azad etmişdi.
Geniş ərazini nəzarətdə saxlamaq imkanı verən olduqca strateji əhəmiyyətli Lələtəpə yüksəkliyinin işğaldan təmizlənməsi Cəbrayılın Cocuq Mərcanlı qəsəbəsinin və Füzulinin Horadiz şəhərinin təhlükəsizliyini təmin edib.
Ordumuzun qəti zərbələri nəticəsində düşmənin 30-dan çox tankı, 25-dən çox artilleriya qurğusu və digər zirehli texnikası məhv edilib, 320 hərbçisi öldürülüb, 1000-dən artıq döyüşçüsü yaralanıb.
Döyüşlərdən sonra bir sıra yolların - Goranboyun Gülüstan kəndi, Tərtərin Suqovuşan (həmin zamanlar Madagiz adlanırdı) üzərindəki yolların nəzarətdə saxlanılması təmin edilib.
Əməliyyatlar aprelin 5-də Azərbaycan və Ermənistan silahlı qüvvələrinin baş qərargah rəislərinin Moskva razılaşmasına əsasən dayandırılıb.
Aprel döyüşləri Azərbaycan üçün böyük zəfərin başlanğıcı idi. Dördgünlük müharibə Vətən müharibəsində işğalda qalan torpaqların azad edilməsində həlledici rol oynadı.
Azərbaycan öz torpaqlarını işğaldan azad etdikdən sonra postmünaqişə dövründəki açıq qalan məsələlələri tənzimləyən 10 noyabr bəyanatının müddəalarının da yerinə yetirilməsində qətiyyət göstərir.
2022-ci ilin martında Fərrux dağı və eyniadlı kənd nəzarətə götürülüb. 2022-ci il avqustun 3-də Azərbaycan Ordusu bölmələrinin keçirdiyi “Qisas” cavab əməliyyatı nəticəsində Qırxqız yüksəkliyi, həmçinin Kiçik Qafqaz dağ sisteminin Qarabağ silsiləsi boyu Sarıbaba və bir sıra digər əhəmiyyətli hakim yüksəkliklər nəzarətə götürüb. Ardınca isə Buzdux və digər hakim yüksəkliklər də ordumuzun nəzarətinə keçib. Həmin ilin avqust ayının axırlarında Laçın şəhəri, Zabux və Sus kəndlərinə nəzarət bərpa edilib.
2023-cü ilin mart ayı ərzində Xankəndi-Xəlfəli-Turşsu və bu marşrutdan şimalda keçən Xankəndi-Kosalar-Mirzələr-Turşsu yollarında hərbi tədbirlər görülüb. Bundan sonra isə Laçın rayonunun Cağazur və Zabux kəndləri arasında yerləşən bir neçə hakim yüksəklik, əsas və yardımçı yollar, eləcə də sərhədboyu geniş sahələr nəzarətə götürülüb.
Onu da xatırlatmaq yerinə düşər ki, 2021-ci ilin noyabrında və 2022-ci ilin sentyabrında Azərbaycan-Ermənistan sərhədində genişmiqyaslı toqquşmalar baş verib. Bundan sonra Azərbaycan böyük ərazini nəzarətdə saxlamağa imkan verən yüksəklikləri nəzarətə götürüb.
Beləliklə, Aprel döyüşləri həm hərbi, həm də siyasi aspektdən Azərbaycanın gücünü dünyaya sübut etdi. Bu döyüşlər xalqın orduya inamını daha da artırdı və 2020-ci ildə Qarabağın azad olunması üçün möhkəm təməl yaratdı. Azərbaycanın qətiyyəti və ordumuzun gücü nəticəsində işğal altındakı torpaqlar azad edildi, ölkəmiz tarixi ədaləti bərpa etdi.
Onu da qeyd edək ki, 2016-cı il aprelin 19-da Azərbaycan Respublikasının Prezidentinin müvafiq sərəncamları ilə Azərbaycan Silahlı Qüvvələrinin 3 üzvü “Azərbaycanın Milli Qəhrəmanı", 7 üzvü ”Azərbaycan Bayrağı" ordeni, 1 üzvü 2-ci dərəcəli və 4 üzvü 3-cü dərəcəli “Vətənə xidmətə görə” ordeni, 19 üzvü “Vətən uğrunda" medalı, 43 üzvü “İgidliyə görə” medalı, 45 üzvü “Hərbi xidmətə görə” medalı, 2 üzvü “general-mayor” ali hərbi rütbəsi ilə mükafatlandırılıb.
Bu gün Aprel döyüşlərinin qəhrəmanları xalqımız tərəfindən böyük ehtiramla yad edilir. Onların fədakarlığı Azərbaycan tarixinə qızıl hərflərlə yazılıb və gələcək nəsillərə örnək olacaq.
Yazını hazırladı: Xalidə GƏRAY
XƏBƏR LENTİ
03 Aprel 2025
ŞƏRHLƏRŞƏRH YAZ