Onlayn ictimai-siyasi qəzet
Azərbaycanın düşmənləri ilə eyni cəbhədə: Əli Kərimli və "talış separatçıları" - SENSASİON MƏQAMLAR
Son günlərdə Azərbaycan cəmiyyətinin diqqətini çəkən mühüm məsələlərdən biri də etnik separatizm ideyalarının yenidən gündəmə gətirilməsidir. Bu dəfə məsələ Talış Xalqının Haqlarını Müdafiə Komitəsinin sədri Zahirəddin İbrahiminin bəyanatları və onun Rusiya ilə bağlı açıqlamaları fonunda daha da kəskin xarakter alıb. Maraq doğuran əsas məqamlardan biri isə Azərbaycanın bəzi müxalif qüvvələrinin bu separatçı çıxışlara açıq və ya dolayı dəstəyidir.
Musavat.com bildirir ki, bu mövzuda araşdırmaçı jurnalist, Sürixdə yaşayan Elbəyi Həsənli bir məqalə ilə çıxış edib. Həmin məqaləni oxucularımızın mühakiməsinə təqdim edirik.
***
AXCP-yə Talışıstan lazımdır?
Zahirəddin İbrahimi
“Azad, müstəqil Talışıstan dövlətində yaşamaq talış millətinin gələcək taleyi üçün narahat olan hər bir qeyrətli talışın ümdə bir arzusudur. Bu arzunu gerçəkləşdirməyə çalışmaq, bu işə öz töhfəsini vermək isə hər bir talış vətənpərvərin borcudur”.
Bunu kim deyir? Talış Xalqının Haqlarını Müdafiə Komitəsinin (TXHMK) sədri cənab Zahirəddin İbrahimi öz müsahibəsində belə deyir.
Zahirəddin İbrahimi Əliəkrəm Hümmətovun yaxın adamlarından biri olub. Müsahibədə hamısı var. Ən maraqlısı odur ki, adam Azərbaycanı diktatura adlandırır, Rusiyanı isə demokratik ölkə kimi təsnif edir: “Siyasi fəaliyyət göstərmək üçün Rusiya demokratik bir ölkə kimi daha əlverişlidir”. “Demokratik Rusiya”nı biz yaxşı tanıyırıq. Bu ölkə bir çox yerdə, o cümlədən Ukrayna, Moldova və Gürcüstanda separatizmə dəstək verib, Qarabağ separatçılarının “Xaç Ata”sı rolunda çıxış edib. Yalnız Azərbaycan, Türkiyənin aşırı səyləri ilə erməni separatizminin axırına çıxıb.
Kiçik bir haşiyə çıxım: O gün bir erməni “YouTuber” and-aman edirdi ki, Azərbaycan bütün etnik azlıqlara zülm edir. Talış və ləzgilər, eləcə də digər xalqlar ayağa qalxmalıdır və Azərbaycana qarşı vuruşmalıdır. “YouTuber” dönə-dönə vurğuladı ki, adıçəkilən xalqlar ermənilərlə qohum xalqlardır. Talış və ləzgilər… ayağa qalxsa, Ermənistan və eləcə də dünya erməniləri onlara kömək edəcək.
Əliəkrəm Hümmətov
Erməni kömək edəndirsə, özünə kömək eləsin. Nikol Paşinyan oturur “real Ermənistan” deyir, durur “real Ermənistan” deyir. Azərbaycan 3 dənizə çıxışı olan “əfsanə Ermənistanı” bütün dünyanın gözü qarşısında dəfn edib.
Əliəkrəm Hümmətov 2013-cü il sentyabrın 24-də İrəvana "Talış-Muğan Respublikasının prezidenti" kimi səfər edərək İrəvan Dövlət Universitetinin iranşünaslıq kafedrasında talışşünaslıq üzrə magistr pilləsinin açılışını edib və daha sonra işğal altında olan Dağlıq Qarabağa səfər edərək Xankəndidə yerləşən universitetdə çıxış edib. İndi həmin universitetdə azərbaycanlılar təhsil alır. O vaxt da ermənilər Azərbaycan xalqının bir parçası olan talışlardan öz çirkin niyyətləri üçün istifadə etməyə çalışıblar.
Diqqət edin: Ermənistanın qonşu olduğu Azərbaycan, Türkiyə, İran və Gürcüstan çoxmillətli ölkələrdir. Statistikaya görə isə Ermənistanda əhalinin 99,9 faizi ermənilərdən ibarətdir. Deməli, ermənilər Ermənistanda heç bir xalqın yaşamasına imkan vermirlər. Üstəlik, Azərbaycanın etnik zənginliyini Azərbaycana qarşı çevirməyə çalışırlar. TXHMK kimi qondarma təşkilatlar da bu məsələdə ermənilərlə eyni mövqedən çıxış edirlər. Birinci və ikinci Qarabağ müharibəsində yüzlərlə talış əsilli vətəndaşımız Azərbaycan naminə şəhid olub. Əliəkrəm Hümmətovdan qalma tör-töküntü separatçılar isə ermənilərə qucaq açır.
“Talış xalqına qənim kəsilmiş Azərbaycan rejimi”ni və pantürkistləri isə İbrahimi birmənalı şəkildə düşmən elan edir. Deyir: “Azərbaycanda demokratiyanın bərqərar olacağı təqdirdə talış xalqının bir yumruq kimi birləşib öz istiqlalını əldə etməsinə qətiyyən şübhəmiz yoxdur”.
Ən maraqlısı isə odur ki, DTX Zahirəddin İbrahimini Rusiyada həbs edib. Və bu, bizim müxalifətin xoşuna gəlməyib.
Əli Kərimlinin Avropa proyeksiyası Qənimət Zahid Arif Yunusla səs-səsə verərək Zahirəddin İbrahiminin müdafiəsinə qalxıb. Arif Yunus heç: o, hər zaman ermənini müdafiə edən adamdır. Yaxşı, Qənimət Zahid Azərbaycan dövlətini parçalamaq istəyən bu qurumun rəhbərini nədən müdafiə edir? Mən deyəndə ki, AXCP Azərbaycanda etnik separatizmi müdafiə edir, çoxları daş atıb başını tutur ki, bu, şərdir, böhtandır…
Qənimət Zahid–Arif Yunus söhbətini sosial mediadan tapıb, baxa bilərsiz. Özünüz baxın və düşünün: AXCP nə istəyir? Erməni separatçılarından canımız güclə qurtarıb. İndi də "talış" separatçılarına meydan verməliyik? Əli Kərimli çıxsın və məsələyə aydınlıq gətirsin. Niyə AXCP Azərbaycanı parçalamaq istəyən separatçılara, İrana casusluq edən sözdə şiə təəssübkeşlərini öz çətirinin altında qorumağa çalışır?
Mən soruşuram: Azərbaycanın digər müxalifət partiyaları AXCP-nin bu xəyanətkar mövqeyinə niyə etiraz etmirlər? Necə olur ki, mən İsveçrədə yaşaya-yaşaya bunu görürəm, siz isə Azərbaycanın içində bunu görmürsünüz?
Vətənlə alver etməzlər. Siyasi hakimiyyət uğrunda mübarizədə Azərbaycan alver predmeti ola bilməz. Olmamalıdır…
Azərbaycanın bütün namuslu adamları etnik və dini separatizmə etiraz etməlidir. Erməni separatizmi on minlərlə insanımızı məhv etdi. İndi də bu qəbildən olan separatçılara meydan verək? Yenə on minlərlə günahsız insanımız qətl edilsin?
Elbəyi HƏSƏNLİ, SÜRİX 
XƏBƏR LENTİ
05 Aprel 2025
ŞƏRHLƏRŞƏRH YAZ