“Bu gün söhbət əsnasında mən cənab Prezidenti Azərbaycan-Ermənistan sülh prosesi ilə bağlı kifayət qədər məlumatlandırdım. Bildirdim ki, İkinci Qarabağ müharibəsi başa çatandan sonra məhz Azərbaycan və şəxsən mən sülh danışıqlarının başlanmasının təşəbbüskarı olmuşam. O vaxt nə Ermənistan, nə də ki, o vaxt hələ fəaliyyət göstərən ATƏT-in Minsk qrupu belə bir təklif irəli sürməmişdi. Bu təklifi Azərbaycan tərəfi vermişdir. Bu özlüyündə onu göstərir ki, biz sülh müqaviləsinin bağlanmasında nə qədər maraqlıyıq”. Bunu almaniyalı həmkarı Frank-Valter Ştaynmayerlə təkbətək görüşündən sonra Azərbaycan Prezidenti İlham Əliyev deyib.

Dövlət başçısı bildirib ki, 2024-cü ilin yanvarına qədər Ermənistan təkidlə sülh müqaviləsinə salmaq istədiyi dırnaqarası “Dağlıq Qarabağ respublikası” yoxdur, bu, ancaq Ermənistanın xülyalarında mövcud olub. Azərbaycanın Qarabağ bölgəsi mövcuddur.

Bu, Almaniya prezidentinin İrəvan səfəri öncəsi rəsmi İnstaqram səhifəsində Azərbaycana qarşı törədilmiş təxribata cavab da sayıla bilər. Düzdür, Azərbaycan dövlətinin sərt təpkisi, ictimaiyyətin etirazından dərhal sonra Almaniya üzr istədi, təxribat məzmunlu paylaşımı sildi. Amma gecikmiş addım idi. Əminik ki, dövlətimizin başçısı alman həmkarına ictimaiyyətə açıqlamadığı bir çox xatırlatmaları edib.

Frank-Valter Ştaynmayeri “Qarabağ Azərbaycandır, bu, rəsmi Berlinin birbaşa və aydın mövqeyidir” deməyə vadar edən təbii ki, qapalı müzakirələrdə eşitdikləri, dövlət rəhbərimizin prinsipial mövqeyidir. acınacaqlı duruma düşdü alman prezident. Əslində, keçmiş separatçıların əski parçasını paylaşmaqla, öz xoşları ilə Azərbaycan ərazilərindən köçüb gedən ermənilərin Qarabağda çoxluqda olmaları barədə iddiaları onun öz əleyhinə yönəldi...

Adını açıqlamayan alman analitik Ermənistanın “168.am” nəşrinə deyib ki, “Bu qalmaqal prezident administrasiyasının diqqətsizliyi və mövzudan xəbərsizliyi nəticəsində baş verib”.

Onun sözlərinə görə, bu münaqişənin Azərbaycan və Ermənistan üçün ağrılı məqamlarının nə olduğunu anlamaq üçün kiçik araşdırma belə kifayət edərdi. (Ordu.az)  Ekspert deyib ki, üzr istəmənin özü səhvə yol verilməsi deməkdir.

Deyək ki, bu təxribatı, yaxud “səhv”i Bundeqstaqdakı Şvabeyə bənzərlərdən kimlərsə edib.

Bəs, üst-üstə 8 il Almaniyanın xarici işlər naziri işləmiş diplomat, iki il vitse kansler olmuş prezident Ştaynmayer hara baxırmış? Axı, hüquq elmləri doktoru olan 70 yaşlı ölkə prezidenti necə bu şəkildə beynəlxalq hüququ pozub, yaxud pozulmasına göz yumub? Almaniya boyda dövlətin imicinə bu sayaq zərbə vurulması kimə lazım imiş? Yalnız ermənilərəmi?..

Deyək ki, rəsmi Berlin Azərbaycandan üzr istədi, bəs sonra? Üzrlə hər şey bitmir axı. Bu təxribatı törədənlər kimlər olub? Həmin şəxs və ya şəxslər cəzalandırılmalıdır!

Özü də bu, yeganə təxribat olmadı axı. Almaniyanın Ştaynmayerin Cənubi Qafqaza səfəri ərəfəsində federal hökumət tərəfindən maliyyələşdirilən Almaniyanın beynəlxalq yayım şirkəti “Deutsche Welle” platformasında erməni televiziya adamları və təbliğatçıları tərəfindən çəkilmiş bir film yayımlandı.

Stalinin guya Qarabağı Ermənistandan alıb Azərbaycana təhvil verməsi ilə bağlı erməni təbliğatının axmaq iddialarının tirajlandığı alçaq təxribatla bağlı da gərəkən addımlar atılmayıb.

Azərbaycan həmin ölkədir ki, 2022-ci ildə Rusiya qazının təchizatında fasilələr yarandığı zaman Almaniyanı lazımi həcmdə qazla təmin etmək öhdəliyini üzərinə götürüb. Bunu Azərbaycan Prezidenti İlham Əliyevlə birgə mətbuata bəyanatla çıxış edən Almaniya Prezidenti Frank-Valter Ştaynmayer etiraf edib. Elə isə anti-Azərbaycan təxribatlarının adını nə qoyaq? Əvvəlki illərdə də “alman dəqiqliyi”nə sayğı duyduğumuz halda, qeyri-dəqiqliklərin, təxribatların, təzyiqlərin şahidi olmuşuq. Axı, Azərbaycan Qarabağın işğalda olduğu illərdə həmsədr olmasını istədiyi ölkələr içərisində Almaniyanın da adını çəkirdi hər zaman. Beləmi hakimlik edəcəkdi “dəqiqlər”in ölkəsi, hakimiyyəti?

Almaniya Prezidenti Frank-Valter Ştaynmayer Bakı və İrəvanı sülh sazişini tezliklə imzalamağa çağırıb. Azərbaycan Prezidenti şərtləri xatırladıb. Amma maraqlıdır, Ştaynmayer erməni həmkarı, yaxud baş naziri ilə görüşlərdə Azərbaycanın ədalətli tələbləri, şərtləri barədə danışıbmı, İrəvanı sülh naminə addımlar atmağa çağırıbmı? İnanmıram!

Əgər belə olsaydı, Almaniya prezidenti saxta “erməni soyqırımı” abidəsinin önünə getməzdi, hansı ki, Paşinyan özü də anlayır ki, heç bir soyqırım-filan olmayıb və bu iddialar onun ölkəsi ilə Türkiyənin arasında körpülərin qurulmasına mane olacaq. Yaxud Ştaynmayer erməni keşişlərin Bakıda mühakimə olunan separatçı liderlərlə bağlı xahişlərini dinləməkdənsə, “21-ci əsrin Nürnberq prosesi”ndə, Ədalət Məhkəməsi qarşısına cavab verməli olduqlarını deməli idi. Hər halda onların Azərbaycan xalqına qarşı cinayətləri İkinci Dünya Müharibəsindəki faşistlərdən az olmayıb. Faşistlər bir çox hallarda mülki əhaliyə toxunmurdularsa, erməni qatillər Qarabağı işğal edərkən bir azərbaycanlıya belə, aman vermədilər, ya məhv etdilər, ya da yurd-yuvalarından didərgin saldılar. Qərbi Azərbaycandan son olaraq qovulan 300 min nəfərin hüquqlarının bərpasını da unutmamalı idi alman prezident.

Frank-Valter Ştaynmayer Bakıda olduğu saatlarda Ağdamda mina partlayışı nəticəsində bir nəfər ağır xəsarət aldı. Təkcə 44 günlük müharibədən sonra mina qurbanlarının sayı 400-ə çatıb. Səbəbkar Ermənistandır! Səbəb həm də Ermənistanın mina xəritələrini Azərbaycana təhvil verməməsidir!    

Alman prezident bunlardan danışmalı idi, sülh istəyirdisə. Erməni əsir və girovluğunda olmuş 4 min azərbaycanlının taleyindən bu günədək xəbər yoxdur, Ştaynmayer bunu da bilmirmi? Bilirsə, niyə İrəvanda bu haqda danışmadı? Axı, sülh üçün bu kimi məsələlər çox önəmlidir. Yoxsa Co Baydensayağı sülhə tələsdirmək nəticə verməyəcək, bunu hesablamaq çətin deyil.

Dövlətimizin başçısı konkret şəkildə sülhə aparan yolun xəritəsini alman həmkarına da təqdim edib.

Sitat: “Bu günə qədər sülh müqaviləsinin mətni tam razılaşdırılıb, 17 paraqrafdan ibarətdir. Azərbaycan burada hər hansı bir əlavə şərt irəli sürmür. Bizim şərtlərimiz Ermənistan üçün bəllidir, yenilik deyil. Bu şərtləri biz uzun müddət ərzində irəli sürürük. Ancaq Ermənistandan bu günə qədər hər hansı bir ciddi cavab almamışıq. Nədən ibarətdir bu? Birinci, ATƏT-in Minsk qrupu ləğv edilməlidir”.

Həmçinin dövlət başçısı bildirib ki, ikinci məsələ Ermənistanın konstitusiyası ilə bağlıdır:

“Ermənistan konstitusiyasında Ermənistan müstəqillik aktına istinad var. O konstitusiyanın tərkib hissəsidir. Orada isə Azərbaycanın hüquqi, tarixi ərazisi Ermənistanla birləşməsi haqqında müddəa var və bu, bizə qarşı açıq ərazi iddiası sayılır. Ona görə Ermənistan konstitusiyasından bu bəndin çıxarılması bizim legitim tələbimizdir. Bu iki şərt təmin olunandan sonra sülh müqaviləsini imzalanmaq üçün heç bir maneə olmayacaq. Necə deyərlər, top Ermənistanın tərəfindədir. Əgər Ermənistan doğurdan da sülh müqaviləsini imzalamaq istəyirsə, Azərbaycanın bu iki legitim şərtini qəbul etməlidir”.

Lazım olanlar deyilib. Gərək bir daha bənzər səhvlər, yaxud təxribatlar edilməsin dövlətimizə qarşı. Almaniyanın “Siemens qardaşları” firması 1867-ci ildə Azərbaycana, Gədəbəyə mis yataqlarında işləməyə gələndə Qarabağda ermənilərin, yaxud Qərbi Azərbaycanda Ermənistanın izi-tozu yox idi, alman prezident heç olmasa regiona ilk səfəri öncəsi bu kimi tarixi faktları öyrənməli idi. Eybi yox, Prezident İlham Əliyevlə təkbətək görüşdən sonra çox şeyləri öyrənər və yaddaşında saxlayar…

44  günlük müharibənin sonlarına yaxın, oktyabrın 28-də Azərbaycan Respublikasının Prezidenti İlham Əliyevdən müsahibə götürən Almaniyanın ARD televiziya kanalının jurnalistinin qərəzli suallarını xatırladım. Suallardan biri belə idi: “Nəyə görə Qarabağ Azərbaycan üçün belə önəmlidir? Orada resurslar var, yoxsa bu, bir rəmzi məna daşıyır?”

Cavab necə də sərrast verilmişdi: “Elzas və Lataringe sizin üçün önəmlidir? Bavariya sizin üçün önəmlidir? Yaxud Reyn-Vestfaliya? Bu, bizim torpaqdır, beynəlxalq səviyyədə tanınan bizim ərazimizdir…”

Bir ölkənin prezidentini öyrədilib Bakıya göndərilmiş ARD telekanalının bisavad jurnalistinin durumuna saldılar…Bəlkə də özü özünə elədiyi pislikdir. Allah heç bir prezidentə göstərməsin!