Onlayn ictimai-siyasi qəzet
Türkmənistan “Qalkınış” yatağına ərəb investisiyası cəlb edir
Türkmənistanın “Türkmənqaz” dövlət konserninin rəhbərliyi ADNOC (Birləşmiş Ərəb Əmirlikləri) və Hyundai Engineering (Koreya Respublikası) şirkətlərinin nümayəndələri ilə “Qalkınış” qaz yatağının işlənməsini müzakirə edib.
Musavat.com xəbər verir ki, bu barədə rəsmi “Neytral Türkmənistan” qəzeti məlumat yayıb.
Danışıqlarda şirkətin baş vitse-prezidenti Abdullah Əl Şəmsinin rəhbərlik etdiyi ADNOC nümayəndə heyəti yatağın işlənməsinin üçüncü mərhələsi üzrə layihənin həyata keçirilməsi ilə bağlı geniş məsələləri müzakirə edib. Nəşrin məlumatına görə, BƏƏ şirkəti Qazaxıstanın neft-qaz şirkətləri ilə birgə yataqda işləməyə hazır olduğunu bildirib. “Türkmənqaz” konserni xatırladıb ki, o, respublikada iri qaz layihələrinin həyata keçirilməsinə qonşu dövlətlərin özəl strukturlarının cəlb edilməsinə dəfələrlə dəstəyini bildirib.
Qəzet xatırladır ki, 2022-2024-cü illərdə Türkmənistan prezidenti Serdar Berdiməhəmmədov və parlamentin Halk Maslahatı (yuxarı palata) sədri Qurbanqulu Berdiməhəmmədovun BƏƏ-yə səfərləri zamanı bu sahədə birgə fəaliyyətin konkret istiqamətlərini və parametrlərini müəyyən edən sənədlər imzalanıb. İndi tərəflər layihənin hüquqi, kommersiya, investisiya, maliyyə, texniki və digər komponentlərini əsaslı şəkildə nəzərdən keçirirlər.
“Türkmənqaz”ın rəhbərliyi baş vitse-prezident Jung Song Yongun rəhbərlik etdiyi Hyundai Engineering nümayəndə heyəti ilə yataqların işlənməsinin dördüncü mərhələsinin hazırkı vəziyyətini və perspektivlərini müzakirə edib. Cənubi Koreya tərəfi qeyd edib ki, Hyundai şirkətinin layihədə iştirakı müəssisənin enerji sektorunda geniş potensialından istifadə etməyə imkan verəcək.
Türkmənistandakı “Qalkınış” yatağı 2013-cü ildən istismar olunur. Sahəsi 5 min kvadratkilometrdən çoxdur, ehtiyatları 27,4 trilyon kubmetr qaz həcmində qiymətləndirilir. İnkişafın ikinci mərhələsi Çinə tədarükün hər il 40 milyarddan 60 milyard kubmetrə qədər artırılmasını nəzərdə tutur. Üçüncü mərhələdə qazın Türkmənistan-Əfqanıstan-Pakistan-Hindistan (TAPİ) boru kəməri ilə nəqlinə imkan verəcəyi gözlənilir.
Qeyd edək ki, ADNOC ötən il Azərbaycanın “Abşeron” qaz-kondensat yatağında 30 faiz pay alıb.
Musavat.com
XƏBƏR LENTİ
22 Noyabr 2024
ŞƏRHLƏRŞƏRH YAZ