Onlayn ictimai-siyasi qəzet
Türkiyə 38 ölkədə inflyasiyanın aşağı düşməsinə səbəb oldu
2024-cü ilin avqustunda İqtisadi Əməkdaşlıq və İnkişaf Təşkilatına (OECD) daxil olan ölkələrdə istehlak qiymətlərinin artımı iyuldakı 5,4 faizlə müqayisədə illik ifadədə 4,7 faizə qədər azalıb.
Musavat.com Təşkilatın açıqladığı hesabata istinadən xəbər verir ki, bu, azalma Türkiyədə inflyasiyanın demək olar ki, 10 faiz bəndi aşağı düşməsi ilə bağlıdır.
Hesabata əsasən 38 ölkədən 24-də inflyasiyanın azalması qeydə alınıb. Türkiyə istisna olmaqla, OECD istehlakçı qiymətləri əvvəlki ayda 3 faiz artdıqdan sonra avqustda 2,7 faiz artıb.
OECD ölkələrində enerji qiymətləri hesabat dövründə 0,1 faiz ucuzlaşıb (iyulda 3,3 faiz bahalaşmışdı). Ərzaq maya dəyəri 3,7 faiz (4,3 faiz) artıb. Ərzaq və enerji xərcləri nəzərə alınmadan istehlak qiymətlərində artım (baza inflyasiya) iyulda 5,5 faizə qarşı avqustda 5,2 faiz təşkil edib.
Avqustda G7 ölkələrində inflyasiya əvvəlki aydakı 2,7 faizdən 2,4 faizə, G20 ölkələrində 6,8 faizdən 6,3 faizə enib.
Avrozonada istehlak qiymətləri (HICP indeksi) iyulda 2,6 faiz artdıqdan sonra avqustda 2,2 faiz artıb. Ərzaq və enerji qiymətləri nəzərə alınmadan göstəricinin artım tempi 2,9 faizdən 2,8 faizə qədər zəifləyib.
Avrozonada enerji qiymətləri 3 faiz ucuzlaşıb (iyulda 1,2 faiz bahalaşmışdı). Ərzaq məhsullarının qiymətləri 1,7 faiz (1,6 faiz) bahalaşıb.
Aİ-nin statistika idarəsinin ilkin məlumatları göstərib ki, sentyabrda avrozonada inflyasiya 1,8 faiz təşkil edib.
1961-ci ildə yaradılmış İƏİT 38 ölkəni özündə birləşdirən dünyanın aparıcı iqtisadi təşkilatlarından biridir. Hazırda onun üzvləri Avstraliya, Avstriya, Belçika, Böyük Britaniya, Macarıstan, Almaniya, Yunanıstan, Danimarka, İsrail, İrlandiya, İslandiya, İspaniya, İtaliya, Kanada, Kolumbiya, Kosta Rika, Latviya, Litva, Lüksemburq, Meksika, Hollandiya, Yeni Zelandiya, Norveç, Polşa, Portuqaliya, Slovakiya, Sloveniya, ABŞ, Türkiyə, Finlandiya, Fransa, Çexiya, Çili, İsveçrə, İsveç, Estoniya, Cənubi Koreya və Yaponiyadır.
Musavat.com
XƏBƏR LENTİ
23 Noyabr 2024
ŞƏRHLƏRŞƏRH YAZ