Onlayn ictimai-siyasi qəzet
Trampın bu qərarından sonra hansı məhsullar bahalaşacaq? - İqtisadçı-alim açıqladı
Xəbər verdiyimiz kimi, ABŞ prezidenti Donald Tramp yeni vergi tariflərini açıqlayıb.
ABŞ-nin digər ölkələrə qarşılıqlı şəkildə tətbiq etdiyi gömrük vergilərinin (tariflər, rüsumlar - red) dərəcələri 10-50 faiz arasında dəyişir.
Siyahıya əsasən Azərbaycan ABŞ-ın 10% gömrük vergisi tətbiq edəcəyi ölkələr siyahısındadır. Qeyd edilib ki, Azərbaycan ABŞ-a 10% vergi tətbiq etdiyi üçün ABŞ də Azərbaycana 10 % vergi tətbiq edir.
Tramp ABŞ-ın ticarət müstəqilliyini bərpa etmək məqsədilə bu tarifləri tətbiq edəcəyini vurğulayıb və ölkəsinin iqtisadi gücünün yenidən yüksələcəyini bəyan edib. Açıqlamalara görə ABŞ-ın yeni tarifləri aprelin 5-dən etibarən qüvvəyə minəcək və minimum tarif dərəcəsi 10 % olacaq.
Bəs Trampın bu qərarı Azərbaycanın hansı məhsullarının bahalaşmasına səbəb olacaq?
Vüsalə Əhmədova
İqtisadçı-alim Vüsalə Əhmədova mövzunu Musavat.com-a şərh edərkən deyib ki, Azərbaycan və ABŞ qarşılıqlı olaraq 10%-lik idxal vergisi tətbiq edir. Trampın bu qərarı Azərbaycanda hər hansı məhsulların bahalaşmasına səbəb ola bilməz:"Bu qərar ancaq, Azərbaycan məhsullarının ABŞ-də müəyyən qədər bahalanmasına gətirib çıxara bilər. Ümumiyyətlə götürsək, Azərbaycandan ABŞ-na ixracın həcmi də, ixrac məhsullarının çeşitliliyi də çox deyil. Azərbaycanın ixracında ABŞ-nin payı heç bir faiz təşkil etmir. Əksinə, ABŞ-dən Azərbaycana idxalın həcmi yüksəkdir. Ölkəyə idxal olunan məhsulların ümumi dəyərinə nəzər yetirsək, Çin, Rusiya, Türkiyə və Almaniyadan sonra ABŞ beşinci yerdə qərarlaşır. Məsələn, ötən ilin ilk üç ayında ABŞ-dən təxminən 152 milyon dollar dəyərində məhsul idxal etmişik. Ümumilikdə, 2024-cü il ərzində ABŞ-dən Azərbaycana 1.61 milyard dollar mal idxal olunub. Azərbaycandan ABŞ-na isə cəmi 135 milyon dollar dəyərində məhsul ixrac olunub. İdxal olunan ABŞ məhsullarının daxili bazarda qiymətinin aşağı olmasını istəyiriksə əksinə, Azərbaycan tətbiq etdiyi tarifləri endirməlidir. Bu isə qarşılıqlı proteksionist siyasət baxımından real görünmür. Trampın tətbiq etdiyi vergi siyasəti isə ola bilər ki, ixracatçılarımızın yükünü artırsın. Azərbaycanın ixrac məhsullarının ABŞ-də qiymət baxımından rəqabətqabiliyyətliliyi azala bilər. Bu da, ixracatçılarımızı yeni bazarlar axtarışına yönəldə bilər".
Afaq Mirayiq,
Musavat.com
ƏLAQƏLİ XƏBƏRLƏR
XƏBƏR LENTİ
04 Aprel 2025
ŞƏRHLƏRŞƏRH YAZ