Onlayn ictimai-siyasi qəzet
Tramp yenə Kanadanı "bombaladı": baş nazirə narkotik ittihamı
ABŞ prezidentindən Trüdo haqda sərt ittiham – “Hakimiyyətdə qalmaq üçün bu problemi istifadə edir”
ABŞ prezidenti Donald Tramp Kanada baş naziri Castin Trüdonu tarif məsələsini manipulyasiya edərək hakimiyyətdə qalmağa çalışmaqda ittiham edib.
Musavat.com xəbər verir ki, bu barədə Tramp özünün sosial media hesabında yazıb.
O, bildirir ki, Trüdo ona telefon açaraq ABŞ və Kanada arasındakı tariflərlə bağlı nə edilə biləcəyini soruşub. Tramp ona cavab olaraq "fentanil məsələsi"nə toxunaraq, bu maddənin Kanada və Meksika sərhədləri vasitəsilə ABŞ-a keçdiyini bildirib. “Çox sayda insan bu səbəbdən həyatını itirib və bunun dayandığına əmin deyiləm”, – deyə Tramp vurğulayıb.
Trüdo son zamanlar vəziyyətin yaxşılaşdığını desə də, bunun kifayət etmədiyini bildirən Tramp, telefon danışığının nisbətən dostyana tonda bitdiyini qeyd edib. Lakin Trüdonun ona Kanadada seçkilərin nə vaxt keçiriləcəyini demədiyini və bunun onda şübhə doğurduğunu bildirib. “Sonra anladım ki, o, bu problemi hakimiyyətdə qalmaq üçün istifadə etməyə çalışır. Uğurlar, Castin!”, – deyə Tramp sözlərini tamamlayıb.
Qeyd edək ki, Kanada və ABŞ arasında ticarət tarifləri və gömrük rüsumları məsələsi uzun müddətdir müzakirə mövzusudur. Trüdo hökuməti isə Trampın bu iddialarına hələlik münasibət bildirməyib.
Musavat.com -un mövzuya dair arayışı: Fentanil nədir?
Fentanil güclü sintetik opioid analjezikdir və morfindən təxminən 50 dəfə, heroinlə müqayisədə isə 100 dəfə daha güclüdür. Əsasən şiddətli ağrıları, xüsusilə də xərçəng xəstələrinin ağrılarını aradan qaldırmaq üçün tibbi məqsədlə istifadə olunur. Lakin qeyri-qanuni istehsalı və istifadəsi son illərdə ciddi qlobal problemə çevrilib.
Fentanilin yüksək təsir gücünə görə, çox kiçik dozalarda belə ölümcül ola bilər. Qeyri-qanuni narkotik bazarında tez-tez heroin, kokain və ya digər maddələrlə qarışdırılaraq satılır ki, bu da istifadəçilərin təsirini bilmədən həddindən artıq dozada qəbul etməsinə və ölüm hallarının artmasına səbəb olur.
Xüsusilə ABŞ və Kanadada fentanil istifadəsi ilə bağlı böhran yaşanır. ABŞ-da opioidlərə bağlı ölüm halları arasında fentanil əsas səbəblərdən biri kimi göstərilir. Bu maddənin Meksika və Kanada vasitəsilə qeyri-qanuni yollarla ABŞ-a gətirildiyi iddia edilir və bu, siyasi və təhlükəsizlik sahəsində ciddi müzakirələrə yol açıb.
Musavat.com
XƏBƏR LENTİ
06 Mart 2025
05 Mart 2025
ŞƏRHLƏRŞƏRH YAZ