Onlayn ictimai-siyasi qəzet
Ştaynmayerin “siftəni kor etməsi”- tarixi səhv, yoxsa...
Azərbaycanın haqlı etirazı öz nəticəsini dərhal verdi; Berlin Bakıdan üzr istədi
Almaniya Federativ Respublikasının ölkəmizdəki fövqəladə və səlahiyyətli səfiri Ralf Horlemann Xarici İşlər Nazirliyinə çağırılıb. Bu barədə XİN-dən məlumat verilib.
Qeyd olunub ki, görüş zamanı Almaniya Federativ Respublikasının Prezidenti Frank-Valter Ştaynmayerin Ermənistana səfəri çərçivəsində rəsmi İnstagram səhifəsində Azərbaycanın keçmiş işğal olunmuş ərazilərində yaradılmış qondarma rejimin “bayrağını” paylaşmaqla ölkəmizin ərazi bütövlüyü və suverenliyinə qarşı edilmiş paylaşıma görə kəskin etiraz bildirilib. Bölgəyə səfər zamanı bu açıq siyasi təxribatın qəbuledilməz olduğu, Almaniya tərəfinin bu paylaşıma görə ictimai şəkildə üzrxahlıq etməsinin zəruriliyi diqqətə çatdırılıb. Almaniya Prezidentinin bu paylaşımının Azərbaycanın ərazi bütövlüyü və suverenliyinin dəstəkləndiyi barədə bəyanatlara və davam edən sülh prosesinə zidd olduğu vurğulanıb.
Qeyd edək ki, Almaniya Prezidenti Frank-Valter Ştaynmayer ilk dəfə olaraq Cənubi Qafqaza səfər edib. Ştaynmayer Ermənistanda prezident Vahaqn Xaçatryan və baş nazir Nikol Paşinyanla görüşüb. O, həmçinin TUMO İT tədris mərkəzinə baş çəkib və mədəni qəbulda iştirak edib. Ermənilər bu təxribatı qəsdənmi edib və sairə suallar ətrafında Azərbaycan tərəfdə ciddi narahatlıq yaranıb. Almaniya Prezidentinin regiona səfəri çərçivəsində ilk olaraq, Ermənistana getməsi də Azərbaycan ictimaiyyətində sərt etirazlar doğurub.
Alman səfirin XİN-ə çağırılması öz nəticəsini dərhal verib. Belə ki, Almaniya Prezidenti Administrasiyası bu ölkənin prezidentinin sosial media profilində yerləşdirilmiş postla bağlı Azərbaycan tərəfinə üzrxahlıq edib.
Qeyd edək ki, Almaniya Prezidentinin sosial media profilində artıq keçmişin qalığı olan qondarma rejimin bayrağının yerləşdirilməsi və onun altında yazılan mətn Azərbaycan tərəfinin ciddi narazılığına səbəb olub.
Dərhal iki ölkənin prezident administrasiyaları və xarici işlər nazirlikləri arasında təmaslar başlayıb. Almaniya tərəfi bu postun səhvən yerləşdirildiyini etiraf edərək onu dərhal çıxarıb.
Almaniya Prezidenti Administrasiyasının rəhbəri adından ünvanlanmış məktubda baş vermiş bu hadisəyə görə üzrxahlıq ifadə olunaraq, məktubun mediaya verilməsinə razılıq bildirilib.
Məktubu təqdim edirik:
“Hörmətli Hikmət Hacıyev!
Federal Prezidentin sosial media hesabında qısa müddət ərzində Azərbaycanın bir regionuna aid bayrağın yanlış təsviri və onunla bağlı mətn dərc olunub. Səhv aşkar edildikdən sonra paylaşım dərhal silinib. Bu paylaşım texniki səhv səbəbindən dərc edilib və Almaniyanın Azərbaycanın ərazi bütövlüyünə dair məlum mövqeyi ilə bağlı heç bir məna kəsb etmir. Belə bir səhvə yol verilməsinə görə çox məyusam. Paylaşımın Azərbaycanda bəzi insanlarda yaratdığı yanlış təəssürata görə səmimi-qəlbdən üzr istəyirəm.
Federal Prezidentin qarşıdan gələn səfəri Azərbaycan-Almaniya tərəfdaşlığını möhkəmləndirmək və regionda davam edən sülh prosesinə dəstək vermək məqsədi daşıyır".
Fikrət Yusifov
Sabiq maliyyə naziri, siyasi və iqtisadi məsələlər üzrə ekspert Fikrət Yusifov “Yeni Müsavat”a bildirdi ki, Ştaynmayerin yol verdiyi bu yanlış Azərbaycan-Almaniya münasibətlərinə zərər gətirə bilməz: “Heç şübhəsiz ki, Almaniya Prezidenti bu paylaşımı edərkən, onun belə nəticələr verəcəyini düşünə bilməmişdi. Biz erməniləri çox yaxşı tanıyırıq. Onlar hər fürsətdən öz fitnəkar əməlləri üçün istifadə etməyi məharətlə bacarırlar. İnanıram ki, ermənilər bu dəfə də Almaniya Prezidenti Frank-Valter Ştaynmayerə "dərin bir qonaqpərvərlik" nümayiş etdiriblər və o da bu qonaqpərvərliyin əvəzini belə vermək qərarına gəlib. Ancaq nə yazıq ki, bu paylaşımı edən zaman başı dumanlı olduğundan, Azərbaycan tərəfin buna necə reaksiya verəcəyini hesablaya bilməyib. Biz haqq edib Almaniya səfirini həmin paylaşıma görə Xarici İşlər Nazirliyinə dəvət etdik. Və elə bundan sonra da Frank-Valter Ştaynmayer də ciddi səhv etdiyinin fərqində olub, paylaşdığı postu sildi. Artıq Azərbaycan tərəfindən Almaniya üzr də istəyib. Prezident Frank-Valter Ştaynmayerin yol verdiyi bu yanlış Azərbaycan-Almaniya münasibətlərinə zərər gətirə bilməz. Bu bir texniki yanlış idi, onu edən də həmin yanlışı aradan qaldırıb üzr istədi və bununla da məsələ qapandı. Almaniya Avropa Birliyini öz çiyinlərində saxlayan əsas dayaqlardan biri və birincisidir. Biz bu ölkə ilə münasibətlərimizi qoruyub saxlamalı və onun inkişaf etdirilməsi yolunu tutmalıyıq. Bu, olduqca önəmlidir. Avropa Birliyinin ikinci dayağı olan Fransa kimi ermənipərəst bir dövlətin bizə qarşı etdiyi haqsızlıqlar fonunda Almaniya ilə münasibətlərin normal bir səviyyədə saxlanması və inkişaf etdirilməsi bizim xarici siyasətimizin əsas xətlərindən biri olmalıdır. Bu mənim şəxsi fikrimdir".
Azər Badamov
Milli Məclisin deputatı Azər Badamov Almaniya prezidentini azərbaycanlılardan üzr istəməyə çağırdı: “Almaniya Prezidentinin birinci Ermənistana səfər etməsini və səfər ərəfəsində İnstagram səhifəsində erməni təxribatına imkan verilməsini, onun regionumuza olan ədalətsiz yanaşmasını ikili standartların göstəricisi hesab edirəm. Düzdür, Almaniya səfiri XİN-ə dəvət edilib, narazılığımız bildiriləndən sonra Frank Valter Ştaynmayerin İnstagram səhifəsindən həmin paylaşım silindi. Qarşı tərəf bu səhvə görə üzr də istədi. Amma prezident kimi ölkəni təmsil edən bir şəxsin rəsmi səhifələrində belə səhvlər olmur. Əgər həqiqətən bu səhv olubsa, Ştaynmayer özü də xalqımızdan rəsmi şəkildə üzr istəməlidir. Əgər bu baş verməyəcəksə, baş vermiş təxribat heç də səhv olmadığı və düşünülmüş şəkildə edildiyi kimi qəbul olunmalıdır. Ştaynmayer öz rəsmi İnstagram səhifəsində uzun illər ərzində xalqımıza qara yara kimi əziyyət vermiş erməni separatçılığını təbliğ edirsə, onun ölkəmizə gəlməyinin arxasında heç də saf niyyətlər dayanmaz. Həm də Ermənistan özünü sülhsevər kimi təqdim edərək müxtəlif tribunalardan istifadə etməklə öz çirkin niyyətlərindən əl çəkmək istəmir. Almaniyanın "Deutçe Velle" kanalında nümayiş etdirilmiş film və prezident Frank-Valter Ştaynmayerin Cənubi Qafqaza səfəri çərçivəsində İnstagram səhifəsində nümayiş etdirilən əski parçası heç də təsadüfdən irəli gəlmir. Bu, Ermənistanın olduğu kimi, Fransanın və onun təsiri altında olan Almaniyanın Azərbaycana olan münasibətinin göstəricisidir. Əgər onlar ədaləti dəstəkləsəydilər, 1 milyon qaçqın və məcburi köçkünümüzün yaşadığı acı taleləri, yerlə yeksan edilmiş 300-dən çox yaşayış məntəqəmizi və Cənubi Qafqazın Hirosiması adlandırılan Ağdamın məhv edilməsini televiziya kanallarında nümayiş etdirərdilər. Təbii ki, biz heç kimdən nə inciməli, nə də heç nə gözləməməliyik".
Cavanşir ABBASLI,
“Yeni Müsavat”
XƏBƏR LENTİ
03 Aprel 2025
ŞƏRHLƏRŞƏRH YAZ