Onlayn ictimai-siyasi qəzet
"Qurban Qurbanov yoxdan var yaradıb... ruhsuz adamlar başa düşmür ki...”
Ağdamın “Qarabağ” klubu avqustun 27-i axşamı bütün Azərbaycanı sevinc göz yaşlarına qərq etdi. “Köhlən atlar” ikinci dəfə Çempionlar Liqasının Liqa mərhələsinə vəsiqə qazandı.
“Qarabağ” Cənubi Qafqazın yeganə komandası olaraq, dünyanın nəhəng klublarını ölkəmizə gətirəcək.
Amma bütün bunlarla yanaşı ürəkbulandıran bir mənzərə də yaranıb. Belə ki, bəziləri Liqa mərhələsində klubumuzun heç nə edə bilməyəcəyini, hətta böyük hesablarla məğlubiyyət acısını yaşadacağını bildirirlər. Sanki anlamırlar ki, ölkə futbolunun bu qədər zəif olduğu bir ortamda əfsanəvi baş məşqçimiz Qurban Qurbanov yoxdan bir var yaradıb...
Tanınmış texnobloqer Fərid Pərdəşünasın bununla bağlı paylaşdığı status diqqətləri çəkib. O qeyd edir: “"Qarabağ” Çempionlar Liqasında biabır olacaq", "7-8 qol buraxacaq" kimi ruh düşkünlüyü yaradan ruhsuz adamlar başa düşmür ki, bir Azərbaycan klubu üçün Çempionlar Liqasına getmək nə dərəcədə əhəmiyyətlidir.
Başa düşə bilmirsinizsə, izah edim ki, Azərbaycan klubları hələ Konfrans Liqasına düşə bilmir. Yəni bu gün Qurbanovun bu komandası olmasa, bəlkə bir 15 il sonra hansısa Azərbaycan klubu belə uğur əldə edər. Qarabağın özü bu stabilliklə bunu 8 il sonra edə bildi.
Yəni indiki şərtlərdə bu, 10 ildə bir dəfə baş verən hadisəyə çevrilib. Bu bizim üçün çox əhəmiyyətlidir.
Alınacaq nəticənin ona görə önəmi yoxdur ki, bizi 8 möhtəşəm oyun təcrübəsi gözləyir. Keçən ÇL-də Play-off oynadıq, ümumilikdə 4 dəfə Play-off oynamışıq. Artıq 2-ci dəfə ÇL-ə gedirik. Bax belə-belə bir də gördünüz, tez-tez getməyə başladıq və yavaş-yavaş da nəticələr əldə olundu.
İnkişaf bununla baş verir. Dünənki oyundan sonra Qarabağ klub dəyəri qədər qazanc əldə etmiş oldu. Rəqəm “Qarabağ” üçün çox ciddidir. Ümid edirəm, rəhbərlik heç olmasa bu pulun yarısını gələn il üçün transferlərə xərcləyər.
200,000-ə alınan oyunçudan 2 milyonluq, 400,000-ə alınan oyunçudan 4 milyonluq oyunçu düzəldən Qurbanovun sehrli dəyənəyinə 2 milyonluq və ya 4 milyonluq oyunçu alıb versən, bəlkə elə 20 milyonluq oyunçu çıxaracaq? Niyə bunu yoxlamayaq? Bu pulu da elə Qurbanov qazandırıb.
“Qarabağ” daha çoxunu istəməlidir. Acgöz olmalıdır. Azarkeşlər də daha çoxunu istəməlidir. İnkişaf belə olur. Yoxsa "ay Azərbaycana oyunçu gəlmir, Bakıda külək əsir" və s. bəhanələr boş şeydir. Çempionlar Liqasında kim oynamaq istəməz ki?!”
Cavanşir ABBASLI
Musavat.com
XƏBƏR LENTİ
30 Avqust 2025
ŞƏRHLƏRŞƏRH YAZ