Onlayn ictimai-siyasi qəzet
Puldan ötrü ölənlər - muzdlu döyüşçü olmaq istəyənlər Rusiya və Ukraynaya axışır
Müasir müharibələrdə muzdlu döyüşçülərdən istifadə edilməsi yayğındır. Demək olar ki, bütün vuruşan ölkələr bu və ya digər şəkildə muzdluların xidmətindən istifadə edirlər. Bəzən bu simvolik səciyyə daşıyır, yanğın yerinə dimdiyində su daşıyan sərçənin misalını xatırladır.
Eyni zamanda döyüşən tərəflər mütləq bunun üzərində əks-təbliğat kampaniyası aparır, bir-birini muzdlulardan istifadədə ittiham edirlər.
Rusiyanın hərbi aqressiyası nəticəsində başlanmış Rusiya-Ukrayna savaşı da istisna deyil. Burada da vaxtaşırı “muzdlular” qovğası başlanır.
Dünən Kreml mediası kolumbiyalı muzdlu döyüşçülərin Rusiyaya qarşı hərbi əməliyyatlarda iştirak etdikləri barədə məlumat yayıb. Bildirilir ki, guya kolumbiyalılara ayda 3000 dollara qədər pul vəd edilib. Bu barədə TASS-a muzdlulardan biri olan Xose Arona Medina Arandanı müdafiə edən vəkil Maksim Korotkov-Qulyayev məlumat verib. (Qəribədir, Rusiyaya qarşı döyüşən muzdlunun vəkili rusiyalıdır).
"Müvəkkilim Medina Aranda Rusiyaya qarşı hərbi əməliyyatlarda iştirak etdiyinə görə ayda 3000 dollara qədər maaş alıb. Kolumbiyadakı Britaniya kəşfiyyatı onu rusların uşaqları zorladığına, öldürdüyünə və yediyinə inandırıb. Bildiyimə görə, digər muzdlulara da eyni məbləğdə pul vəd edilib", - vəkil bildirib.
O qeyd edib ki, Britaniya kəşfiyyat xidməti Ukrayna strukturları ilə Kolumbiya əhalisi arasında vasitəçidir.
Əslində kütləvi işsizlik üzündən kolumbiyalıların ya yerli narkokartellərin döyüşçüsü olmaq, ya da beynəlxalq miqyasda muzdlu döyüşçüyə çevrilmək təcrübələri böyükdür. Bir çox əfqanlar kimi onların da yeganə yaxşı bacardıqları iş döyüşmək, “Kalaşnikov”la gəzməkdir. Kolumbiyalılar üçün döyüşən tərəflərin hansının sırasında olmağın da əhəmiyyəti yoxdur. Əsas odur ki, döyüşün muzdunu versinlər, ondan sonra bu, əcəllə oyun hara qədər davam edər, edər.
Rusiya mətbuatı Ukrayna ordusunun tərkibində Moskvaya qarşı döyüşən əcnəbilərin əsasən, Gürcüstan, ABŞ, Polşa və Böyük Britaniyadan olduqlarını yazır. Rus hərbi ekspert Yuri Knutovun sözlərinə görə, onların sayı minlərlədir. Knutov vurğulayıb ki, Ukraynaya hərəkətləri ifrat aqressivliklə xarakterizə olunan çoxlu gürcü muzdlular göndərilib. Muzdluların arasında Kolumbiya ilə yanaşı, digər Latın Amerikası ölkələrindən olanların da olduğu iddia edilir.
“Axmat” xüsusi təyinatlı qüvvələrinin komandiri general-leytenant Apti Alaudinov isə bildirib ki, Ukraynanın tərəfində döyüşmək istəyən əcnəbilərin sayı azalmaqda davam edir, çünki əvvəllər Rusiyaya qarşı döyüşmək niyyəti ilə Ukraynaya gələn muzdlular ciddi problemlərlə üzləşirlər.
Rusiyanın tərəfində ən azı 48 ölkədən muzdlular döyüşdüyü bildirilir. Bu barədə materialları da Ukrayna və Qərb mediası yayır.
Kəşfiyyat məlumatlarına görə, təkcə Moskvada 2023-cü ilin aprelindən 2024-cü ilin mayına qədər 1300-dən çox əcnəbi Rusiya ordusuna cəlb olunub. Onların hamısı müqavilə üçün vahid seçim məntəqəsinin ünvanını yaşayış ünvanı kimi göstərib - Yabloçkova küçəsi, bina 5, mənzil 1.
Jurnalistlər bu müddət ərzində Moskva seçim məntəqəsindən keçən 1300-dən çox əcnəbinin mənşə ölkəsini müəyyənləşdiriblər. Rusiyaya gedən könüllülərin sayına görə birinci yeri Cənubi və Şərqi Asiya ölkələri tutub - 771 nəfər. İkinci və üçüncü yerlərdə keçmiş SSRİ (523 nəfər) və Afrika (72 muzdlu) ölkələri qərarlaşıb.
Əksər muzdlular Rusiyaya Nepaldan gəliblər. Bu ölkədən ən azı 603 nəfər Yabloçkovadakı qəbul məntəqəsində olub. 2023-cü ilin noyabrında Nepal hakimiyyəti Kremldən ölkə vətəndaşlarını Rusiya ordusuna cəlb etməməyi istəyib, lakin “işə qəbul” davam edib. 2024-cü ilin yanvar və fevral aylarında daha dörd Nepal vətəndaşı müqavilə üçün seçimdən keçib.
Rusiya hakimiyyətinin “qeyri-dost” elan etdiyi ölkələrin sakinləri də Rusiya uğrunda döyüşməyə gəliblər. Bu sırada ABŞ (2 nəfər), Latviya (4), Fransa (2), İtaliya (2) və başqaları var. Avropa ölkələri arasında xarici muzdluların sayına görə lider Rusiyaya dost olan Serbiyadır (8).
71 muzdlu isə Rusiyaya Yaxın Şərqdən gəlib. Bunlar aşağıdakı ölkələrdir: Misir (31), İran (7), Əlcəzair (7), İraq (2), Suriya (1), Türkiyə (1) və s. Rusiya ordusuna işsizliyin və yoxsulluğun yüksək olduğu Afrika ölkələrindən 72 nəfər cəlb olunub. Bu regionun ilk üç ölkəsi Qana (26), Kamerun (10) və Seneqaldır (8).
Müqavilə üçün Moskvaya gələnlərin heç də hamısı xidmətə başlamayıb, ən azı 13 əcnəbi könüllü Yabloçkovaya baş çəkdikdən bir gün sonra Rusiyanı tərk edib.
Bu il Rusiya ordusuna qatılan əcnəbilər daha çox Hindistandan və Şimali Koreyadan olub. Ancaq ikinciləri o qədər də muzdlu saymaq olmaz. Onların döyüş muzdu ya KXDR dövlətinə ödənilir, ya da ödənilmir. Ukrayna cəbhəsində ən çox itki verənlər də koreyalılardır. Bu ölkədə vaxtaşırı Ukrayna müharibəsində həlak olan əsgərlərin təntənəli dəfn mərasimi keçirilir. Bu cür mərasimlərdən biri də Nepalın Katmandu şəhərində keçirilib. Burada Rusiyada həlak olmuş 10 nepallı döyüşçünün xatirəsi anılıb.
RF prezidenti Vladimir Putin dəfələrlə Rusiyaya əcnəbi muzdluların lazım olmadığını bildirib, ancaq Rusiya rəsmilərinin canlı qüvvə yardımı xahişi ilə başqa ölkələrə müraciət etdiyi faktdır.
Belə ölkələrdən biri də Kubadır. Rusiya kubalıları kütləvi şəkildə Ukrayna ilə müharibəyə cəlb edir. Ancaq Kuba hakimiyyəti isə vətəndaşlarının Rusiya və ya Ukrayna üçün döyüşməsinə qarşıdır. Bu ölkədə muzdlu döyüşçü olmuş 17 nəfər həbs edilib.
Postsovet məkanı ölkələrindən Rusiya tərəfdən müharibəyə qatılan muzdlular azdır. Onların çoxu Rusiya ərazisində tutulan miqrantlardır. Polis onları həbs edir, hərbi komissarlığa aparır, orada onlarla zorla müqavilə bağlanır və ön cəbhəyə göndərilirlər.
Araz Altaylı, Musavat.com
ƏLAQƏLİ XƏBƏRLƏR
XƏBƏR LENTİ
29 Avqust 2025
ŞƏRHLƏRŞƏRH YAZ