Onlayn ictimai-siyasi qəzet
Paşinyanın 2025 üçün böyük “ev tapşırığı”: Nikol üçün sülh hekayəsi yenidən başlayır...
Ermənistan küçələrində 2025-ci ilin soyuq qış küləyi əsir. Hökumət binasının işıqları gecənin qaranlığını yarır, Paşinyan kabinetində tək oturub gələcəyin xəyallarını və keçmişin ağırlığını düşünür. Masasında açıq qalmış sənədlərdən birində böyük hərflərlə “Sülh Sazişi” yazılıb. Bu sənəd onun üçün adi bir sənəd deyil; Ermənistanın və özünün gələcək taleyi, var oluşudur...
Ancaq Nikolun ən böyük problemi ondadır ki, bu sənəd hələ də imzalanmamış qalır, son addımı atmağa cəsarət etmir...
Musavat.com xatırladır ki, 2024-cü il boyu Bakı və Ankara İrəvana sülh təklifini masada saxlasa da, bu təkliflər “havadan asılı” vəziyyətdə qaldı. Ermənistan hökuməti isə sanki həm silahlanmaqla, həm də sərhəd mövzularında bir addım irəli, iki addım geri atmaqla keçən il ərzində özünü daha da təcrid etdi. Halbuki, 2024-cü ilin sonuna yaxın müəyyən irəliləyişlər də var idi: sülh müqaviləsinin preambula hissəsi və 17 maddədən 15-i razılaşdırılmışdı, dinc sərhəd demarkasiyası baş tutmuş və Azərbaycanın 4 kəndi geri qaytarılmışdı. Amma həlledici məqamlar hələ də həllini tapmamışdı.
Paşinyanın qarşısında ən böyük maneə Ermənistan konstitusiyasındakı Azərbaycan ərazilərinə dair ərazi iddiaları ilə bağlı maddənin ləğv edilməsidir. Bakı üçün bu, sülh prosesində “qırmızı xəttdir”. Azərbaycan Prezidentinin tələbi aydındır: “O müddəa ləğv olunmadan nə sülh müqaviləsi imzalanacaq, nə də iki ölkə arasında normal diplomatik əlaqələr mümkün olacaq.” Ankara da bu məsələdə Bakının yanında dayanıb və bu mövqedə heç bir dəyişiklik gözlənilmir.
2025-ci ilin gəlişi ilə Paşinyan yalnız Bakının deyil, Ermənistanın öz xalqının da təzyiqlərini hiss edir. Ölkədəki iqtisadi böhran, gənclərin kütləvi şəkildə xaricə köçü və beynəlxalq təcrid şəraiti İrəvanı çıxılmaz vəziyyətə salıb. Bununla yanaşı, Ermənistanın keçən il də genişmiqyaslı silahlanma kampaniyasına davam etməsi Bakı tərəfindən ciddi xəbərdarlıqla qarşılandı. Prezident İlham Əliyev Yeni il müraciətində İrəvanı açıq şəkildə xəbərdar etdi:
“Ermənistanın genişmiqyaslı silahlanma kampaniyası bölgə üçün növbəti təhdid mənbəyidir. Bu təhlükəli yoldan geri qayıtmalıdırlar, əks halda nəticələr ağır olacaq.”
Zəfərin 5-ci ildönümünə doğru
Bəs Paşinyan 2025-ci ildə nə edəcək? O, xalqını yeni bir hərbi məğlubiyyətdən qorumaq üçün tarixi qərarlar qəbul edə biləcəkmi? Bu il həm Ermənistan, həm də Azərbaycan üçün taleyüklü ola bilər. 2020-ci il Zəfərinin 5-ci ildönümünə qədər sülh sənədinin imzalanması mümkün olacaqmı? Paşinyan üçün “ev tapşırığı” aydındır: Ermənistanın təcrid vəziyyətindən çıxışı yalnız qonşularla sülh müqavilələrinin imzalanmasından keçir.
Sülh sənədinin imzalanması, sərhədlərin tam demarkasiyası və ərazi iddialarının konstitusiyadan çıxarılması Ermənistan üçün təkcə Bakının deyil, həm də dünyanın qapısını açacaq. Amma bu, Paşinyanın qərarlılığından və Ermənistanın keçmişdən ibrət götürməsindən asılıdır. 2025 Ermənistan üçün yalnız “itirilmiş illərin” davamı olacaq, yoxsa sülhün və sabitliyin başlanğıcı? Cavab hələ də Paşinyanın masasındakı sənədin səhifələri arasında gizlidir.
Musavat.com
ƏLAQƏLİ XƏBƏRLƏR
XƏBƏR LENTİ
07 Yanvar 2025
ŞƏRHLƏRŞƏRH YAZ