Onlayn ictimai-siyasi qəzet
Parazit Ermənistanın müftə YEM axtarışı – Rusiyanı bu qiymətə satmaq istəyir
Nankorluq bir toplum üçün adi həyat tərzinə çevrilirsə, ana südü kimi nəsildən-nəslə ötürülürsə, onda onun kollektiv məsuliyyətindən danışmaq yersizdir. Söhbət sözsüz ki, ermənilərdən gedir.
Öz gözündə “tiri” görmək istəməyib daim başqasının gözündə tük axtaran, bütün dünyanı nəyə görəsə özünə borclu sayan, başına gələn faciələrə görə özündən başqa hamını günahlar bilən, dağıtmaqdan, xaraba qoymaqdan, fitnə-fəsad yaymaqdan maniakal şəkildə zövq alan, əlindən yaxşı heç nə gəlməyən mənfur qonşularımızı deyirik. Allahın yaratdığına yəqin ki, peşman olduğu unikal və əbləh tayfanı.
Azərbaycan üçün ən böyük təhlükə, bəla əslində elə budur – qonşuluqda qeyri-adekvat, törətdiyi bəşəri cinayətlərin nəticələrini zərrəcə dərk etməyən, haqq elədiyi qapazlardan dərs götürməyən anormal və zay bir kütlənin mövcudluğu...
Neçə vaxtdır Rusiya ilə Qərb arasında var-gəl edir bu toplum. Qlobal geosiyasət bazarında özünü təzə ağaya daha baha satmağın yollarını axtarır. İndi də Avropa Birliyinə (AB) Ermənistanın mifik üzvlüyü ilə bağlı gözlənilən referendumdan dolayı düşüblər Rusiyanın üstünə. Onu erməni xalqına qarşı cümlə cinayətlərdə, o sırada “artsaxın Azərbaycan-Türkiyə tandemi tərəfindən işğalı”nda, hətta nankorluqda (gör kim kimi) ittiham edir, Qərbə üz tutmağı “yeganə xilas yolu” kimi təbliğ edirlər.
Əlbəttə, Rusiya mələk deyil, bilirik. Ancaq ermənilər də rusdan narazı qalacaq, şikayətçi düşəcək ən axırıncı qövm! Çünki məhz Rusiya qədim Türk torpaqlarında onlara yer düzəldib, “Ermənistan” adlı süni dövlət qurub, hayların nazını çəkib və çəkməkdədir.
Hakimiyyətdə qərbyönlü Nikol Paşinyan olsa belə, 6 ildir Ermənistanı ən ucuz qaz və elektriklə təmin edən, onun xarici sərhədlərini qoruyan, yüz minlərlə erməni üçün iş yeri, məhsulları üçün ucuz və sərfəli bazar olan da Rusiya deyilmi? Postsovet coğrafiyasında Moskvanın ən böyük yaxşılığı dəymiş tək millətdir erməni. 70 illik sovet dövründə də Ermənistan mərkəzdən ən çox dotasiya alan parazit (müttəfiq) respublika olub. Rus indi bu “kranları” bir-bir bağlasa...
Dəflərlə yazılıb. Rusiya və onun dominant olduğu KTMT 2-ci Qarabağ savaşında işğalçı Ermənistanın yanında ola bilməzdi, çünki keçmiş Dağlıq Qarabağ yuridik olaraq “Rus NATO-su”nun məsuliyyət zonasına daxil deyildi. Bunu Putin bir necə dəfə bəyan da edib. Onu da bildirib ki, heç Ermənistanın özü saxta “dqr”i tanımamışdı. Hərgah 44 günlük müharibədə Rusiyadan İrəvana özəl reyslərlə, o cümlədən İran üzərindən hərbi yüklərin daşınması danılmaz faktdır. Həmin uçaqların nömrələri, marşrutları internet resurslarında qalır. Qısası, Moskva o dar macalda da işğalçı ölkəyə köməyini əsirgəməyib.
Amma və lakin yenə həyasızcasına “artsax Rusiyaya görə işğal olundu” absurdunu söyləməkdən, yazmaqdan, çığır-bağır salmaqdan yorulmurlar. Sən demə, Azərbaycan öz ərazisini işğal edibmiş! Daha absurdu odur ki, beynəlxalq hüquq “Dəmir yumruq”dan sonra hayların yadına düşüb. Bu zaman öz konstitusiyalarında Azərbaycan və Türkiyənin beynəlxalq səviyyədə tanınmış ərazilərinə iddiaların saxlanmasının üstündən sükutla keçirlər. Buna normal baxır, “bu bizim daxili işimizdir” deyirlər. Revanşa hazırlaşırlar. Heyrət doğuracaq bir riyakarlıq...
Üstəlik, abır-həya bilmədən özlərini indi də Ukrayna ilə müqayisə edir, “işğala məruz qalan ölkə” kimi (!) Azərbaycana qarşı kollektiv Qərbdən maliyyə, silah-sursat umurlar. Hansı üz və haqla? Axı Ukraynanın durumuna məhz Azərbaycan uyğun gəlir. Bəsit səbəbə: hər ikisi öz qonşusu tərəfindən hərbi təcavüzə məruz qalan suveren dövlətlər!
Ermənistana kim, nə vaxt təcavüz edib ki? 30 illik işğal dövründə Azərbaycan torpaqlarının altını üstünə çevirən, şəhər və kəndlərimizi yerlə bir edən, torpaqlarımızda saysız soyqırımları, etnik təmizləmə aparan vandallar Marsdanmı gəlmişdilər? Adları üstündə – erməni, erməni, erməni...
O ki qaldı hayların ağa dəyişməyə hazırlaşmasına, ruslarda belə bir məsəl var: “Дураку туда и дорога”. Mənası belədir ki, axmaq özünə axmaq yol seçibsə, deməli, öz aqibətinə layiqdir. İndi “Qafqaz qaraçıları” da. Çox sarsaqcasına yenə parazit kimi özlərinə havayı yem axtarır, zənn edirlər ki, xilaskarları Qərbdədir. Nə Qərbdir, nə də Rusiya. Azərbaycan və Türkiyədir!
Elə bilirlər rusa təzədən atmaqla Qərbdən yaxşı bir ənam alacaqlar. Amma unudurlar ki: “Yalançının evi yandı, heç kim inanmadı”. Haylar isə peşəkar yalançı olmaqla bərabər, son dərəcə saxtakar, iliyinədək nankor və məkrli bir tayfa. Düşünmürük ki, “qoca qitə” və ABŞ hamının bildiyi sadə həqiqətlərdən bixəbərdir...
Zahid SƏFƏROĞLU 
XƏBƏR LENTİ
13 Yanvar 2025
ŞƏRHLƏRŞƏRH YAZ