Onlayn ictimai-siyasi qəzet
İmamoğlu casus çıxdı: İstanbul siyasətini silkələyən istintaq genişlənir
Musavat.com xəbər verir ki, İstanbul Böyükşəhər Bələdiyyəsinin keçmiş sədri, hazırda həbsdə saxlanılan Əkrəm İmamoğlu barəsində casusluq ittihamı ilə yeni istintaq başlanılıb. Türkiyə mediasının məlumatına görə, istintaq çərçivəsində həmçinin İmamoğlunun seçki kampaniyası direktoru Necati Özkan və jurnalist Mərdan Yanardağ haqqında da araşdırma aparılır. Bildirilir ki, Mərdan Yanardağ artıq saxlanılıb.
İstintaqın başladılmasına səbəb kimi əvvəlcə xarici dövlətlərlə əlaqədə şübhəli bilinən və daha əvvəl “agentlik fəaliyyəti” ittihamı ilə həbs edilmiş bir şəxsin elektron məlumat bazasından çıxarılan sənədlər göstərilir. Həmin rəqəmsal materiallarda xüsusi rabitə yazışmaları, şifrəli əlaqə kanalları və üçüncü ölkə strukturları ilə mümkün əməkdaşlıq izləri olduğu iddia olunur.
Prokurorluğun açıqlamasına əsasən, araşdırma çərçivəsində İstanbul Böyükşəhər Bələdiyyəsinə məxsus bəzi elektron platformalardakı seçici məlumatları və istifadəçi bazalarının xaricə ötürülməsi ehtimalı da dəyərləndirilir. Məhz bu iddia istintaqın daha da genişləndirilməsinə səbəb olub.
İmamoğlu bundan əvvəl korrupsiya və vəzifə səlahiyyətlərindən sui-istifadə ittihamı ilə saxlanılmışdı. O, hakimiyyət dairələri tərəfindən Prezident Rəcəb Tayyib Ərdoğanın ən güclü siyasi rəqiblərindən biri kimi qiymətləndirilirdi. Yeni casusluq istintağı isə ölkə daxilində siyasi temperaturu daha da artırıb.
CHP rəhbərliyi iddiaları “tamamilə siyasi sifariş” adlandırıb və İmamoğlunun xalq arasında nüfuzunun yüksəlməsindən narahat olan dairələrin bu yolla onu siyasi proseslərdən tam şəkildə uzaqlaşdırmaq istədiyini bəyan edib. CHP rəsmiləri bildirir:
“Bu, hüquqi yox, siyasi əməliyyatdır. Məqsəd 2028 seçkiləri öncəsi ən güclü namizədi sistemdən çıxarmaqdır.”
Hakimiyyətə yaxın siyasi dairələr isə iddiaların məhz hüquqi əsaslara söykəndiyini və istintaqın siyasi məqsəd daşımadığını vurğulayır.
Hazırda iş üzrə həm MİT, həm də İstanbul Baş Prokurorluğu birgə fəaliyyət göstərir. İstintaq davam edir. Məlumatlar genişləndikcə İstanbul siyasətinin gələcək mənzərəsi də daha aydın görünəcək.
Musavat.com
XƏBƏR LENTİ
24 Oktyabr 2025
ŞƏRHLƏRŞƏRH YAZ