Onlayn ictimai-siyasi qəzet
“Müşfiq Atakişiyevin sifarişi ilə 30 min dollar müqabilində bu cinayəti törədib” – Prorektorun qətl işi
Ləğv olunmuş “Elm və Təhsil Mərkəzi Təfəkkür Universiteti”nin prorektoru Tariyel Əhmədovun öldürülməsində təqsirləndirilən həmin universitetin rektoru Müşfiq Atakişiyev, Dəyanət Quliyev və Samir Quliyevin cinayət işi üzrə məhkəmə prosesi davam edir.
Musavat.com xəbər verir ki, Bakı Ağır Cinayətlər Məhkəməsində hakim Siyavuş Hacıyevin sədrliyi ilə keçirilən prosesdə şahidlərin dindirilməsi mərhələsidir.
Fevralın 9-da keçirilən prosesdə təqsirləndirilən Samir Quliyevin anası Məlahət Quliyeva şahid qismində ifadə verib. O bildirib ki, təqsirləndirilən Dəyanət Quliyev qonşuları olub. Müşfiq Atakişiyevi isə tanımayıb. Şahid deyib ki, övladını əziyyətlə böyüdüb:
“Samir çox yaxşı övlad olub. Evimizdə bir beçənin də başını kəsməyib. And içirəm o tək Allaha ki, düzgün danışıram. Oğlum heç vaxt cinayətə meyilli olmayıb”.
Şahid bildirib ki, qonşuları Dəyanət Quliyev həbs olunandan sonra oğlu Samir Quliyev narahat olmağa başlayıb:
“Oğlum mənə dedi ki, mama, belə bir hadisə olub, yaşlı kişi qətlə yetirilib, həmin hadisədə mən də iştirak etmişəm. Mən də oğluma dedim ki, gərək etməyəydin. Bir hadisədir, baş verib, gərək olmayaydı. Mərhum həyata qayıda bilsəydi, mən öz həyatımı ona qurban verərdim”.
Məlahət Quliyevanın sözlərinə görə, oğlu ilə söhbətdən ona məlum olub ki, bu işlə bağlı Samirlə Dəyanət arasında pul söhbəti olub: “Oğluma dolanışığa kömək edəcəyinə, ev tikməyinə yardım edəcəyinə söz verib. Amma bu vədləri yerinə yetirməyib. Oğlum rayonda daxmada yaşayıb. Bütün bunları mənə oğlum Dəyanət həbs olunandan bir müddət sonra danışıb”.
Sərbəst ifadəsindən sonra şahidin istintaqa verdiyi ifadəsi elan edilib. Məlahət Quliyeva ibtidai istintaqa verdiyi ifadəsini təsdiq edib. Deyib ki, oğlunun sözlərindən ona məlum olub ki, Müşfiq Atakişiyevin sifarişi ilə 30 min dollar müqabilində bu cinayəti törədib:
“Amma həmin vəsaiti oğluma verməyiblər. Oğlumun sözlərinə görə, 300-500 manat veriblər. Sonradan oğlum Müşfiqlə görüşmək istəyib. Amma Dəyanət buna imkan verməyib. Oğlum da belə başa düşüb ki, Dəyanət onun adından Müşfiqdən pullar alıb, amma ona verməyib. Buna görə də onun Müşfiqlə görüşməsinə imkan verməyib”.
Şahid bildirib ki, oğlu günahkar deyil, qurban olub: “Oğlum cahil idi, savadı olmayıb. Ümumiyyətlə, həmin adamı belə tanımayıb. Nə desəydilər, onu da edərdi. Bir ana kimi onun bağışlanmasını istəyirəm”.
İttihama görə, “Elm və Təhsil Mərkəzi Təfəkkür Universiteti”nin prorektoru Tariyel Əhmədovun 16 sentyabr 2011-ci il tarixdə qəsdən öldürülməsi faktı ilə bağlı başlanmış cinayət işi üzrə həyata keçirilən istintaq-əməliyyat tədbirləri nəticəsində cinayəti törətməkdə təqsirləndirilən şəxslər ifşa edilib.
İbtidai istintaq zamanı həmin universitetin rektoru vəzifəsində işləmiş Müşfiq Atakişiyevin Tariyel Əhmədovu öldürməyi qohumu Dəyanət Quliyevə sifariş verməsi, sifariş əsasında isə Samir Quliyevin cinayəti törətməsinə əsaslı şübhələr müəyyən edilib. Toplanmış sübutlara əsasən, rektor vəzifəsində qalmasına və işgüzar nüfuzuna maneə kimi qəbul etdiyi üçün Müşfiq Atakişiyevin qisas məqsədilə pul müqabilində zərərçəkmiş şəxs Tariyel Əhmədovun öldürülməsini öz qohumu Dəyanət Quliyevə sifariş verməsi, onun isə 40 min ABŞ dolları müqabilində, habelə gələcəkdə maddi və mənəvi dəstək olmaq şərtilə bu cinayəti sifariş verdiyi həmkəndlisi Samir Quliyevin bir neçə gün zərərçəkmişi izlədikdən sonra Bakı şəhəri, Yasamal rayonunun Şərifzadə küçəsində yerləşən idman meydançalarından birində küt əşya ilə bir neçə dəfə onun baş və bədəninin müxtəlif nahiyələrinə zərbələr endirərək ölümünə səbəb olan xəsarətlər yetirməsi müəyyən olunub.
İttihamda qeyd edilib ki, təqsirləndirilən Müşfiq Atakişiyev “Təfəkkür Universiteti”nin rektoru işləyərkən universitetin prorektoru Tariyel Əhmədovu özünə rəqib hesab edib, gələcəkdə onun rektor ola biləcəyini düşünüb.
Atakişiyev belə qənaətə gəlib ki, Əhmədovu aradan götürməklə işləri həll edə bilər. O, bu haqda bacısı oğlu, polis əməkdaşı Dəyanət Quliyevlə danışıb. O, Dəyanatə T.Əhmədovu maşınla və ya küt alətlə vurmağı tapşırıb.
Dəyanət Quliyev bundan sonra uşaqlıq dostu Samir Quliyevlə görüşüb, prorektoru öldürmək üçün ona 40 min dollar pul verib. Plana görə, prorektor səhər gəzintisinə çıxan vaxt Samir onu vurmalı idi.
Samir Quliyev bir neçə gün izləmədən sonra səhər saat 4-5 radələrində gəzintiyə çıxan T.Əhmədovu tək yaxalayıb. O, əlindəki dəmir boru ilə bir neçə dəfə Əhmədovun baş nahiyəsindən güclü zərbə endirib, daha sonra cinayət alətini kimsəsiz əraziyə ataraq hadisə yerindən qaçıb.
Müşfiq Atakişiyev və Dəyanət Quliyev Cinayət Məcəlləsinin 32.3, 120.2.5-ci (sifarişlə adam öldürmədə təşkilatçı), Samir Quliyev isə həmin Məcəllənin 120.2.5-ci (sifarişlə adam öldürmədə) maddəsilə təqsirləndirilən şəxs qismində cəlb ediliblər.
Məlum olub ki, təqsirləndirilən Dəyanət Quliyev hadisə vaxtı daxili işlər orqanlarında işləyib. O, 2000-ci ildən 2020-ci ilə kimi Binəqədi Rayon Polis İdarəsinin 7-ci Polis Şöbəsində əməliyyat müvəkkili işləyib. Samir Quliyev isə taksi fəaliyyəti ilə məşğul olub.
Həmçinin Müşfiq Atakişiyev Elm və Təhsil Nazirliyinin İqtisadiyyat İnstitutunun icraçı direktoru və həmin İqtisadiyyat İnstitutu nəzdində iqtisad elmləri sahəsində doktorluq dissertasiya şurasının sədri vəzifəsində çalışıb.
Qeyd edək ki, iqtisad elmləri doktoru, professor Müşviq Atakişiyev Təfəkkür Universitetinin rektoru olub. Təfəkkür Universiteti 2017-ci ildə ləğv edilib.
Növbəti proses fevralın 21-də davam edəcək.
E.MƏMMƏDƏLİYEV,
Musavat.com
XƏBƏR LENTİ
24 Noyabr 2024
ŞƏRHLƏRŞƏRH YAZ